Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana jareya Allah laju aberkadi Ennoh ban tra-pottrana, sarta pas adhabu, "Mara ana’-rana’ pabannya’, sopaja na’ potona ba’na mossa’e bume reya.
2 Keban, no’-mano’ e bang-abang ban juko’ e dhalem aeng bakal tako’a kabbi ka ba’na. Jareya kabbi bi’ Sengko’ epassra’agiya ka dhalem kakobasa’anna ba’na.
3 Ban-keban jareya kabbi, sarta bu-tombuwan se biru, bi’ Sengko’ ebagiya ka ba’na, gabay kakanna.
4 Coma daging se gi’ badha dharana ta’ olle kakan, sabab e dhalem dhara jareya gi’ badha nyabana mahlok se odhi’.
5 Mon badha oreng mate’e oreng laen, oreng se mate’e jareya bi’ Sengko’ eokoma. Keban se mate’e manossa bi’ Sengko’ eokoma mate keya.
6 Sengko’ agabay manossa epamerep ban Sengko’ dibi’; daddi pa’-sapa’a mate’e oreng, oreng jareya bakal epateyana oreng keya.
7 Mara ba’na ana’-rana’ pabannya’, sopaja na’ potona ba’na mossa’ana bume reya."
8 Allah adhabu ka Ennoh ban ka tra-pottrana,
9 "Sateya Sengko’ mabadha’a parjanjiyan ban ba’na sarta ban na’ potona ba’na,
10 bariya keya ban sakabbinna mahlok se odhi’ se abareng ba’na, iya areya sakabbinna mano’, ebin ban keban se kalowar abareng ban ba’na dhari parao reya.
11 Tang parjanjiyan ban ba’na kantha reya: Sengko’ ajanji ja’ molae dhari sateya reya mahlok se odhi’ e bume reya bi’ Sengko’ ta’ epatompessa bi’ banjir akantha se sateya reya pole, ta’ bakal badha’a pole banjir se marosaga saantero bume."
12 Allah pas adhabu pole, "Menangka tandhana Tang parjanjiyan se langgeng ban ba’na, ban sakabbinna mahlok se odhi’,
13 Sengko’ nyaba’a Tang gandhiba e langnge’, menangka tandhana Tang parjanjiyan ban dunnya.
14 Mon Sengko’ madhateng ondhem se notobi langnge’, sarta pas badha andhang se etangale’e e langnge’ jareya,
15 Sengko’ bakal enga’a ka Tang janji ka ba’na ban ka sakabbinna mahlok se odhi’ ja’ Sengko’ ta’ madhatengnga banjir se matompes sakabbinna mahlok se odhi’ e bume reya pole.
16 Mon badha andhang e ondhem, Sengko’ tanto nangale’e andhang jareya, ban Sengko’ bakal ngenga’ana parjanjiyan se langgeng e antarana Sengko’ ban sakabbinna mahlok se odhi’ e bume reya.
17 Jareya tandhana Tang parjanjiyan bi’ sakabbinna mahlok se odhi’ e bume reya."
18 Tra-pottrana Ennoh se kalowar dhari parao rowa iya areya Sem, Ham ban Yafet. (Ham reya eppa’na Kana’an.)
19 Pottrana Ennoh se katello jareya se noronnagi manossa se mencar daddi sabume reya.
20 Ennoh daddi oreng tane, kaetong oreng se atane anggur dha’-adha’ kadibi’.
21 E settong are, samarena adha’ar aengnga anggur, Ennoh mabu’, pas asaren abangkang e kemahna.
22 E bakto Ham, eppa’na Kana’an nangale’e eppa’na, pas ecareta’agi ka tan-taretanna se badha e lowar.
23 Sem ban Yafet ngala’ juba se ebarbar e budhiyanna balikadda, eteggu’ ekadhuwai dhari bauna bang-sebang, laju ajalan nyorot maso’ ka kemah se ekennengnge eppa’na. Jubana laju esapo’agi ka eppa’na; se masang ta’ addhep ka eppa’na sopaja ta’ nangaleya ka eppa’na se abangkang.
24 Saellana Ennoh emot dhari mabu’na, sarta meyarsa tengkana pottra bungsona ka salerana,
25 laju adhabu, "Mandar ta’ salamedda ba’na, Kana’an! Ba’na bakal daddiya dunorra tan-taretanna.
26 Poji PANGERAN, Allahna Sem! Kana’an bakal daddiya dunorra Sem.
27 Moga-moga Allah namba’ana berkadda ka Yafet kalaban malebar kennengnganna. Moga-moga toronanna apolonga ban toronanna Sem. Tape Kana’an bakal daddiya dunorra Yafet."
28 Saellana banjir jareya Ennoh gi’ odhi’ tello ratos saeket taon aggi’.
29 Ennoh seda e bakto yuswana sangang atos saeket taon.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA