Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN man Nuah, "Bengketlah kam ras kerina keluargandu ku bas kapal e. Sada kam nari ngenca i bas doni enda erbahan si mehuli Kuakap.
2 Buat pitu pasang tep-tep erbage rubia-rubia si la ipantangken rikutken aturen agama. Tapi rubia-rubia si pantangen buat sepasang saja tep-tep erbage.
3 Buat ka perik pitu pasang tep-tep erbage. Enda ibahan gelah tep-tep erbage rubia-rubia ras perik-perik la lesap, janah gelah ertambah-tambah ka ia pagin i doni enda.
4 Pitu wari nari Kupesusur me udan empat puluh wari empat puluh berngi dekahna, gelah icedakenna kerina si nggeluh si nggo Kujadiken."
5 Kasa kai si iperentahken TUHAN, kerina ilakoken Nuah.
6 Sanga banjir si mbelin e jadi i doni enda umur Nuah nggo 600 tahun.
7 Emaka bengket me Nuah ras ndeharana, anak-anakna ras permenna ku bas kapal e, gelah ula ia mate ibahan banjir e.
8 Bage pe tep-tep pasang rubia-rubia ras perik-perik subuk pantangen ras si la pantangen, kerina bengket ras Nuah ku bas kapal e, sue ras si iperentahken Dibata.
9 (Kej 7:8)
10 Pitu wari kenca si e, jadi me banjir si mbelin e.
11 Asum umur Nuah 600 tahun, i bas wari sepulu pitu bulan si peduaken, talang me kerina pintun lau si mbelang i teruh taneh, ras kerina pintu gerbang lau si mbelin i datas langit.
12 Emaka reh me udan meder empat puluh wari empat puluh berngi dekahna ku doni enda.
13 I bas wari eme Nuah ras ndeharana bengket ku bas kapal e rikut pe ras telu kalak anakna dilaki, Sem, Ham, Japet, ras teluna permenna.
14 Ikut pe ku bas kapal e, tep-tep erbage rubia-rubia si melemuk ras si meliar, kitik ras mbelin, bage pe tep-tep erbage perik-perik.
15 Kasa kai si nggeluh, bengket kerina tep-tep pasang ku bas kapal e ras Nuah,
16 bagi iperentahken Dibata. Kenca Nuah bengket, ipintu TUHAN pintun kapal ndai.
17 Banjir si mbelin e nggo empat puluh wari dekahna, emaka nggo kenca cukup bagesna lau e, terangkat me kapal e seh bombang.
18 Lau ndai terus erbagesna, emaka kapal ndai bombang-bombang i babo lau.
19 Erkiteken lau e erbagesna, tampuk deleng si meganjangna pe gedap ibahanna.
20 Lau tambah denga terus seh pitu meter nggo ganjangen asa tampuk deleng-deleng.
21 Kasa kai si nggeluh i bas doni mate; perik-perik, rubia-rubia, jelma, kerina mate.
22 Kasa kai si erkesah si lit i bas doni enda mate kerina.
23 Ikernepken TUHAN kerina si nggeluh i bas doni enda -- manusia, rubia-rubia bage pe perik-perik. Nuah ras si ikut i bas kapalna e ngenca tading.
24 Seratus lima puluh wari dekahna lau lalap la surut-surut.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA