Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nampa nakio’mi sikamma ana’na Yakub, nampa nakana, "A’rappungang mako anrinni, ri ampikku. Lakupauangko apa lakajarianga mae ri kalennu ri allo ri boko:
2 A’rappungangko, e, ikau ana’-ana’na Yakub pilangngeri Israel, manggenu.
3 Ruben, anakku toaya, ikaumi kagassingangku, rappo uruna kaporeangku. Ikau kaminang gammara’ siagang kaminang gassing ri alla’na sikontu anakku.
4 Lu’mukko ta’goccang sanrapang je’ne’, sa’genna teai mako makase’re; saba’ attinroko siagang baine piaraku, nura’massi katinroanna manggenu.
5 Simeon na Lewi massari’battang; sanjatana ke’nanga katerassang.
6 Talamminawangnga’ ri passitujuanna ke’nanga, kammayatompa ri pakkumpulanna ke’nanga. Saba’ ammunoi ke’nanga lalang larrona, napara’bai sapi lakia untu’ kasannanganna.
7 Nitunrai kalarroanna ke’nanga, lanri sarrinna. Nitunrai kasekkekanna ke’nanga, lanri palla’na. Lakupasisa’la’-sa’laki ke’nanga ri sikontu Israel. Lakupasiaraki ke’nanga ri alla’na sikontu bansaya.
8 Yehuda, ikau angkokkoki kacikoro’na musunnu; lanipujiko ri sikamma sari’battannu siagang su’juki ri dallekannu.
9 Yehuda sanrapangi singa rungka; punna le’baki ammuno, ammotereki mange ri ru’munna; anggilingi nampa attinro manna sitau tania’ barani mange anronrongi.
10 Yehuda lanna’gala’ takkang kakaraengang. Turunganna lammarenta satunggu-tungguna. Bansa-bansaya langngerangi passare, nasu’ju’ tundu’ ri dallekanna.
11 Ana’ keledaina nipaukang ri poko’, poko’ anggoro’ mabajika. Anggoro’ lanapasassa ri pakeanna, anggoro’ eja sanrapang cera’.
12 Eja matanna lanri angnginung anggoro’, kebo’ giginna lanri angnginung dadi’.
13 Zebulon lammantang ri ampi’ tamparang; lalabui sikamma kappalaka ri biring tamparanna; sa’genna Sidon pa’baeng-baeng daerana.
14 Anjo Isakhar rapangi keledai magassing attinroa ri alla’ karanjeng pattekekanna.
15 Naciniki antekamma baji’na anjo tampaka antekamma ga’gana anjo pa’rasanganga, na’dundumo rella nipitekeki, na nipassa anjama a’jari ata.
16 Ikau Dan, langngadeli bansanu la’jari suku sangkamma suku maraeng ri Israel.
17 Ikau rapang ulara’ ri biring agang, ulara’ a’racung ri biring lorong, lanupittoki kacunu’ jaranga natassambila tu’baena.
18 O Batara, kasalamakkang Kipassareanga, iaminjo sarro kutayanga.
19 Ikau Gad, lanibakkaiko ri paella’, mingka ikau la’giling angngellaki ke’nanga.
20 Asyer, lalla’bi kanre baji’nu. Kau lassadiakangi kanrena sikamma karaenga.
21 Naftali, sanrapang jonga lappasa’, ga’ga sikalia ana’-ana’na.
22 Yusuf rapangi keledai rungka, keledai liara’ ri ampi’ timbuseng je’ne’, lari-laria rate ri moncong.
23 A’bakka tojemmi musua, angngondangi siagang pana.
24 Mingka tuli kassa’na limanna, tuli jarre’na panana, lanri koasana Pakalawaki Magassing, Allata’alana Yakub, Pajagana Israel.
25 Allata’alana manggenu antulungko; Kaminang Koasaya ambarakkakiko siagang je’ne’ bosi battu ri langi’ na je’ne’ battu rawa ri butta. Siagang ana’ kammayatompa sapi,
26 gandung kammayatompa bunga. La’biangangi barakka’Na Allata’alana manggenu nakalumanynyanna bulu’-bulu’ sannaka toana. Poro turungi sikamma anjo barakkaka ri tompo’ ulunna Yusuf, ri tompo’ abanna. Iami kaminang pore ri sikamma sari’battanna.
27 Benyamin, iami rapang serigala sekke’. Anjakkalaki kanrena ri bari’basa’na. Ri bangngina nabage-bagei."
28 Iaminjo sampuloa anrua suku Israel, siagang kana-kana kala’busang napaua manggena ke’nanga ri wattunna nasare barakka’ passibokoi massing-massing ke’nanga.
29 Nampa appasammo Yakub mae ri ana’-ana’na nakana, "Sinampe’ mami nakuammoterammo sangkamma boe-boeku. Tarawanga’ sallang lalang ri kali’bong Makhpela ri sa’rinna ke’nanga, rayanganna Mamre ri butta Kanaan. Le’ba’mi naballi Abraham anjo kali’bonga siagang koko niaka ri tammulilina. Naballi battu ri Efron, anjo tu Het, untu’ nipare’ pa’jerakkang.
30 (49:29)
31 Anjorengi nitarawang Abraham siagang Sara, Ishak siagang Ribka. Anjoreng tommi nitarawang Lea.
32 Anjo kokoa siagang kali’bong niaka anjoreng le’ba’mi niballi battu ri tu Het. Tarawamma’ anjoreng."
33 Le’baki Yakub appasang ri ana’-ana’na, anra’bami naung nampa mate.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA