Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idilo Jakup anak-anakna si dilaki, jenari nina, "Pulunglah kam kerina gelah kuturiken kai si jadi man bandu i bas wari si reh enda.
2 Pulung lah, begiken lah, o anak-anak Jakup. Begiken lah kata bapandu Israel.
3 Ruben anakku sintua, kam kap gegehku, kam buah si pemena kinidilakinku. Kemegahenku si megegehna i bas kerina anak-anakku.
4 Kam desken lau si ergalun merawa, tapi labo kam anakku si pentingna, sabap ipedemindu gundikku, ingan medem bapandu icemarkenndu.
5 Simeon ras Lewi ersenina, ipakena perkakasna ngamburken dareh kalak.
6 Alu erbuni-buni arih-arih ia, ncampurisa aku la nggit. I bas kerina perjumpanna pe bage ka, ikut ningen aku labo nggit. Sabap ibunuhna kalak ban rawana nahe lembu ipenggelkenna guna kesenangenna.
7 Kena sumpah lah rawana, perban bage hantuna. Kena sumpah lah pernembehna, perban bage kejamna. Ateku ngkerapken ia i belang-belang taneh Israel, ateku nirang-nirang ia i tengah-tengah penduduk Israel.
8 Juda, kam ipuji senina-seninandu, kerahung musuh-musuhndu ijenggelndu, senina-seninandu mungkuk i lebe-lebendu.
9 Juda desken sada singa, kenca njerngem mulihken nangkih ku liangna, ngenat, jenari gempang, si nggangguisa ise pe la pang.
10 Juda me si ncikep tungkat kinirajan, kesusurenna erkuasa seh rasa lalap, bangsa-bangsa maba persembahen man bana, nembah alu patuh i lebe-lebena.
11 Itambatkenna kaldena ku batang anggur, ku batang anggur si mejilena. Icucina uisna alu lau anggur, bali ras dareh megara rupana.
12 Matana megara perban minem lau anggur, ipenna mbentar minem susu.
13 Sebulon ringan i tepi lawit, i je me ingan kapal ngadi-ngadi. Mbelang daerahna seh ku Sidon.
14 Isakar megegeh desken kalde, singenat itindan babanna.
15 Tapi iidahna ingan pengadi-ngadin e mejile, janah taneh e pe la teralang jilena, emaka itarekenna gurungna ngangkat babanna, janah ipaksa ia erdahin desken sekalak budak.
16 Dan, ia me jadi peminpin bangsana seh bali ras suku-suku Israel si debanna.
17 Desken nipe i tepi pasar me kap ia, nipe si erbisa i duru dalan, itagutna padit-padit kuda, seh maka sualak ku pudi si ngersaksa.
18 O, TUHAN, keselamaten i bas Kam nari eme si kutima-timai.
19 Gat, iserbu gerombolen pengerampok, tapi erkusur ia, pengerampok e iayakina.
20 Aser, asil tanehna pangan si ntabeh, isikapkenna pangan, metunggung man pangan raja.
21 Naptali desken belkih pulah-pulah anak-anak si ipupusna mejile rupana.
22 Jusup desken sada batang kayu si turah i duru ulu lau. Meramis buahna i bas dahanna sindauh njurjur ngepari bidena.
23 Musuhna megasgas la teralang, ngayaki ia ersenjataken panah,
24 tapi panah Jusup tetap paguh, janah tanna tetap megegeh, erkiteken gegeh Permakan si Mada Kuasa Dibata Jakup, Sekawal Israel.
25 Dibata bapandu nge si nampati kam, alu mereken udan i das nari ras lau i teruh nari alu mereken asuh-asuhen ras anak nterem.
26 Alu mereken pangan ras rudang-rudang, alu mereken deleng-deleng si nuria, ras barang-barang si mejile i uruk-uruk si rasa lalap nari. Kerina pasu-pasu enda nusurlah ku babo takal Jusup ku babo perdempakenna, ia si iserapken i bas senina-seninana nari.
27 Benyamin desken serigala si merawa. Pagi-pagi iterkamna panganna, karaben icaing-caingna denga."
28 Enda me sepulu duana suku bangsa Israel, janah enda ndai me kata pemasu-masun si ibereken bapana, si sentudu man bana sekalak-sekalak.
29 Dungna nina Jakup man anak-anakna si dilaki, "Dage, erkiteken lanai bo ndekah umurku, kuburkenlah aku pagi ras nini-niningku i bas gua si lit i juma Epron kalak Heti e,
30 i Mahpela arah Timur Mamre, i taneh Kanaan. Itukur Abraham gua ras juma e i bas si Epron kalak Heti nari man taneh kuburen.
31 I je me Abraham ras ndeharana Sara ikuburken; i je ka pe Isak ras ndeharana Ribka ikuburken. I je ka me pe nggo kukuburken Lea.
32 Juma ras gua e itukur i bas kalak Heti e nari, emaka i je lah aku ikuburken."
33 Kenca nggo dung Jakup mereken pedah-pedahna man anak-anakna, medem ia mulihken je mate ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA