Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yakub nangale’e Esau dhateng ngeba oreng pa’ ratos. Daddi na’-ana’na laju egi-bagi, sabagiyan epabareng Liya, sabagiyan epabareng Rahel ban sellerra se kadhuwa.
2 Sellerra ban na’-ana’na esaba’ e adha’, Liya ban na’-ana’na esaba’ e budhiyanna, dineng Rahel ban Yusup esaba’ e dhi-budhi.
3 Yakub ajalan e dha’-adha’ kadibi’. Sambi nyander ka kaka’na, Yakub asojud sampe’ pettong kale.
4 Tape Esau pas nyander ka Yakub. Yakub laju egellu’ ekaloskos. Se kadhuwa laju padha nanges.
5 E bakto nangale’e babine’an ban na’-ana’na jareya kabbi, Esau atanya, "Sapa se ekabareng ba’na reya?" "Paneka ana’ kaula sadaja," ca’na Yakub. "Paparengnga Allah ka kaula."
6 Saellana jareya sellerra se kadhuwa padha nyander abareng ban na’-ana’na, pas asojud.
7 Samarena pas egante bi’ Liya ban na’-ana’na, ban dhi-budhina Rahel ban Yusup padha nyander, pas padha asojud kabbi.
8 Ca’na Esau, "Apa maksodda reng-oreng laenna se tatemmo kaadha’ ban sengko’ gella’ rowa?" Ca’na Yakub, "Nyo’ona kabellasanna sampeyan."
9 Tape Esau ngoca’, "Tang dhi’-andhi’ bannya’, Le’, ba’na ta’ osa ari’-berri’ ka sengko’."
10 Ca’na Yakub, "Ampon, ja’ sapaneka! Manabi sampeyan ampon neser ka kaula, tarema’agi le-olle kaula ka’issa’. Monggu ka kaula, nengale robana sampeyan saos padha sareng manabi kaula nengale Allah, sabab sampeyan ce’ saena ka kaula.
11 Panyo’on kaula, tarema’agi tor-ator kaula ka’issa’. Allah bellas ka kaula, sadajana kaparlowan kaula ecokobi, tadha’ korangnga." Yakub ce’ maksana, sampe’ dhi-budhina Esau endha’ narema le-ollena Yakub jareya.
12 Ca’na Esau, "Mara terros mangkat bai. Sengko’ ajalana kaadha’."
13 Ca’na Yakub, "Sampeyan oneng na’-ana’ kaula paneka ta’ kowat, kaula jugan kodu te-ngate ajaga dumba sareng sape kaula se nyosowe. Manabi egiring epagancang, sanare namong saare, tanto ebin gapaneka mate sadaja.
14 Eatore sampeyan meyos kaadha’, kaula ngerenga re-lere. Kaula ajalana menorot kakowadanna ebin kaula, kantos nyapo’ ka sampeyan e Edom."
15 Ca’na Esau, "Mon kantha jareya reng-oreng se egiba sengko’ reya bi’ sengko’ sabagiyan edina’a ka ba’na." Tape ca’na Yakub, "Ampon ta’ osa pot-repot, kaula namong terro masennengnga sampeyan."
16 Daddi e are jareya Esau abali ka Edom.
17 Tape Yakub entar ka Sukot, pas maddek bengko e jadhiya, ebinna egabayyagi kandhang. Daddi kennengngan jareya enyamae Sukot.
18 E dhalem parjalanan dhari Mesopotamia Yakub napa’ salamet ka Sikhem e nagara Kana’an. E jadhiya laju maddek kemah e temorra kottha jareya.
19 Saellana jareya Yakub laju melle tana andhi’na na’-ana’na Hemor, eppa’na Sikhem, argana saratos pesse salaka. Tana jareya se egabay kennengnganna kemahna.
20 Yakub pas agabay mezba e jadhiya, se enyamae "Allahna Isra’il reya Allah".
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA