Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idah Jakup si Esau reh ras 400 anak buahna, emaka ibagi Jakup anak-anak si Lea, Rahel, ras anak-anak suruh-suruhenna duana si nggo jadi ndeharana e.
2 Ipelebena suruh-suruhen si nggo jadi ndeharana ras anakna arah lebe kal, jenari Lea ras anakna, janah si arah pudina eme Rahel ras Jusup.
3 Jakup erdalan ngelebei kerina, jenari nembah mungkuk ia pitu kali seh ku taneh ndeheri seninana.
4 Tapi kiam Esau njumpai ia, idakepina Jakup ras iemaina. Tangis ia duana.
5 Asum ipernehen Esau sekelewetna janah idahna diberu-diberu ras anak-anak, nungkun ia, "Ise enda kerina si ras kam e?" "Kalak enda kerina, o Tuan, eme anak-anak si nggo ibereken Dibata man bangku erkiteken lias AteNa," nina Jakup njabapsa.
6 Emaka reh suruh-suruhen si nggo jadi ndeharana ras anak-anakna erjimpuh nembah.
7 Kenca bage reh Lea ras anak-anakna, janah si perpudina kal reh Rahel ras Jusup; erjimpuh ia kerina nembah.
8 Nungkun Esau, "Uga kerna terpuk si sada nari si aku jumpa ndai? Kai ertina e?" Nina Jakup njabapsa, "E mindo perkuah atendu, Tuanku."
9 Tapi nina Esau, "Bas aku pe nggo bias agingku, la padah iberekenndu bangku."
10 Nina Jakup, "Lang, la banci bage; adi payo kin mekuah atendu, alokenlah pemerengku e. Ngidah ayondu saja bali kuakap bagi natap ayo Dibata, perban ulina perbahanenndu man bangku.
11 Emaka alokenlah pemere enda, si nggo kubaba man bandu. Nggo seh kal ulina perbahanen Dibata man bangku, nggo IberekenNa bangku kerina keperlunku." Mesek-sek ipindona man Esau emaka ialokenna dungna.
12 Nina Esau, "Ersikaplah kita gelah sitadingken ingan enda. Aku erdalin i lebendu."
13 Nina Jakup njabapsa, "Tehndu nge kap anak-anak enda la megegeh. Janah aku arus ngukuri biri-biri, bage pe lembu ras anakna denga. Adi terus erdalan sada wari, mate me asuh-asuhen e kerina.
14 Lebe lah kam, reh aku arah pudi manjar-anjar asa ngasup kami rikut ras lembu bage pe anak-anak enda. I Edom kita jumpa."
15 Nina Esau, "Adi bage kin kutadingken saja deba anak buahku ras kam." Tapi nina Jakup, "Adi la akapndu dalih, labo padah tadingken anak buahndu e."
16 Bage me i bas wari e mulih me Esau ku Edom.
17 Tapi Jakup lawes ku Sukot. Ipajekkenna rumahna i je bage pe sapo-sapo man ingan cicio asuh-asuhenna. Em sabapna maka gelarna ingan e Sukot.
18 I bas perdalanenna mulih i Mesopotami nari, seh ia alu mejuah-juah i Sikem i taneh Kanaan. Ipajekkenna kemahna i bas sada mbalmbal deher kota e.
19 Itukurna juma e i bas keturunen Hamor bapa Sikem, ergana 100 duit pirak.
20 Ipajekkenna sada batar-batar ingan ersembah i je, janah ibanna gelarna: El, Dibata Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA