Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ishak laju adikane Yakub. Yakub eberkadi, pas epessen kantha reya, "Ba’na ja’ abine oreng Kana’an.
2 Kassa’ ba’na entar ka Mesopotamia ka bengkona Betuwel, embana ba’na, ba’na abine e dhissa’, menta sala settonga ana’na majadhi’na ba’na se anyama Laban.
3 Moga-moga ba’na ban binena eberkadana Allah Se Mahakobasa, ban moga-moga ba’na eparengngana bannya’ ana’na, sopaja ba’na daddiya bangatowana sa-bangsa!
4 Moga-moga Allah aberkadana ba’na ban toronanna akantha se aberkadi Ibrahim, sopaja tana se ekennengnge ba’na reya, se la eparengngagi ka Ibrahim bi’ Allah, ekaandhi’a ba’na!"
5 Bi’ Ishak Yakub epakon mangkat ka Mesopotamia, ka oreng se anyama Laban, iya areya ana’na Betuwel oreng Aram rowa, kaka’na Ribka se andhi’ ana’ Yakub ban Esau.
6 Esau ngedhing ja’ bi’ Ishak Yakub la eberkadi sarta epakon entar nyare bine ka Mesopotamia. Esau ngedhing keya ja’e bakto aberkadi Yakub, Ishak adhabu sopaja Yakub ta’ abine oreng Kana’an.
7 Esau tao ja’ Yakub atoro’ ka dhabuna eppa’na ban ebuna, laju entar ka Mesopotamia.
8 Daddi Esau ngarte ja’ Ishak ta’ lebur ka babine’ Kana’an.
9 Daddi Esau laju entar ka Isma’il, pottrana Ibrahim, laju abine ana’na Isma’il se anyama Mahalat, ale’na Nebayot.
10 Yakub pas mangkat ka Haran dhari Bersyeba.
11 E bakto compet are napa’ ka settong kennengngan, pas ngenep e jadhiya. Yakub ngala’ bato, pas marobbu, batona ekabantal.
12 Teppa’na tedhung laju amempe nangale’e andha se manjeng e bume; konco’na andha jareya napa’ ka langnge’. Kat-malaekat ongga toron e andha jareya.
13 PANGERAN ngadek e erenganna, pas adhabu, "Sengko’ reya PANGERAN, Allahna Ibrahim ban Ishak. Tana se ekatedhunge ba’na jareya bi’ Sengko’ ebagiya ka ba’na ban na’ potona.
14 Na’ potona ba’na bakal bannya’na akantha bannya’na beddhi e bume ban bakal mencara ka bara’ ban ka temor, ka dhaja ban ka lao’; ban lantaran ba’na ban na’ potona, Sengko’ aberkadana sakabbinna bangsa e bume.
15 Mon ba’na entar dha’ emma’a bai, bi’ Sengko’ terros ebarengngana ban elindhungana. Ban pole, bi’ Sengko’ ba’na epabaliya pole ka nagara reya. Sengko’ ta’ adina’agiya ba’na, ban sabarang se ejanjiyagi Sengko’ ka ba’na bi’ Sengko’ eteptebbana kabbi."
16 Yakub ngedhing, pas ngoca’, "PANGERAN badha e dhinna’, e kennengngan reya, sengko’ buru tao!"
17 Yakub arassa tako’, laju ngoca’, "Marengessa kennengngan reya! Tantona reya kalenggiyanna Allah, labang sakethengnga sowarga."
18 Kalagguwanna Yakub jaga gu-laggu. Batona se ekabantal ekala’, pas epamanjeng menangka bato parengeddan. Bato jareya eserame mennya’ jaitun menangka tandha ja’ bato jareya eatorragi ka Allah.
19 Kennengngan jareya laju enyamae Betel. Lamba’ nyamana Lus.
20 Yakub laju asompa ka Allah, oca’na, "Manabi Junandalem asarengnge sareng ajaga abdidalem e dhalem parjalanan ka’dhinto, marenge abdidalem teddha’an sareng salenan,
21 kantos abdidalem salamet abali ka kalenggiyanna eppa’. Junandalem, Guste PANGERAN, badhi daddiya Allah se esemba’a abdidalem.
22 Abdidalem ngatorragiya ka Junandalem saparpolonna dhari sadajana se eparengngagi Junandalem ka abdidalem. Bato parengeddan e epamanjeng sareng abdidalem ka’dhinto badhi kennengngan kaangguy abakte ka Junandalem."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA