Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai iulakkon si Abraham ma mambuat boru, na margoran si Ketura.
2 Jadi itubuhkon ma bani si Simran pakon si Joksan, si Medan pakon si Midian, si Jisbak pakon si Suah.
3 Si Joksan do na manubuhkon si Seba pakon si Dedan. Ia ginompar ni si Dedan, ai ma halak Assur, halak Letus pakon halak Leum.
4 Anak ni si Midian ai ma si Epa, si Eper, si Hanok, si Abida pakon si Elda. Ai ma ganup ginompar ni si Ketura.
5 Dob ai ibere si Abraham ma ganup na dong bani ai hubani si Isak.
6 Tapi anggo bani anak ni parinangonni, panggantihi ai, sibere-bere do ibere si Abraham; dob ai ipajae ma sidea humbani si Isak anakni ai hu tanoh na hampit hapoltakan, sanggah bani goluhni ope.
7 Ia dokah ni umur ni si Abraham manggoluh saratus pitu puluh lima tahun do.
8 Dob ai matei sayurmatua ma si Abraham, dob sombuh uhurni bani hagoluhan on, jadi ipatumpu ma ia hubani ompungni.
9 Dob ai itanom si Isak pakon si Ismael anakni ai ma ia, hu liang Makpela, hu juma ni si Epron, anak ni si Zohar, marga Het, na hampit hapoltakan ni Mamre,
10 hu juma, na binoli ni si Abraham humbani anak ni si Het; hujai do itanom si Abraham pakon si Sarah parinangonni ai.
11 Jadi dob matei si Abraham, ipasu-pasu Naibata ma si Isak, anakni ai; ilambung ni parigi Lachai-Roi do marianan si Isak.
12 On do ginompar ni si Ismael, anak ni si Abraham, tinubuhkon ni si Hagar boru Masir, jabolon ni si Sara ai.
13 On do goran ni anak ni si Ismael mangihutkon partubuh ni sidea: Si Nebayot, bunga tubuh ni si Ismael, dob ai si Kedar, si Abdeel, si Mibsam,
14 si Misna, si Duma, si Masa,
15 si Hadad, si Tema, si Jetur, si Napis pakon si Kedma.
16 Ai ma anak ni si Ismael, anjaha ai ma goran ni sidea mangihutkon hutani pakon parbarung-barungan ni sidea bei, sapuluh dua raja mangihutkon marga ni sidea.
17 Ia dokah ni si Ismael manggoluh saratus tolu puluh pitu tahun do; dob ai matei ma ia anjaha ipatumpu ma ia hubani ompungni.
18 Marianan do sidea olat ni Hewila das hu Sur, ai ma hampit hapoltakan ni Masir dompak Assur. Sai marsilawanan do sidea ampa sanina ni sidea.
19 On do ginompar ni si Isak, anak ni si Abraham. Si Abraham marniombahkon si Isak.
20 Marumur ompat puluh tahun do si Isak sanggah na binuatni ai si Rebekka, boru ni si Betuel, halak Aram ai, botou ni si Laban halak Aram ai, bahen parinangonni.
21 Dob ai igogohkon si Isak ma manonggohon parinangonni ai bani Jahowa, ai na lambang do ia; jadi itangihon Jahowa ma tonggoni, boratan rumah ma si Rebekka parinangonni ai.
22 Dob ai marsionjaran ma dakdanak ai ibagas parnaibataan. Nini si Rebekka ma, “Anggo sonin do hape, mase pala sonon ahu?” Jadi laho ma ia manungkunkonsi bani Jahowa.
23 Nini Jahowa ma hu bani, “Dua do bangsa ibagas parnaibataanmu, anjaha dua do marga mandarat hun boltokmu; anjaha gogohan do bangsa na sada humbani na sada nari, anjaha marguru bani sianggian do sikahanan.”
24 Jadi dob jumpah panorangni tubuhan tuah, tonggor ma, sirindu-rindu do na iboltokni ai.
25 Jadi kaluar ma na parlobei ai, gerger do rupani, haganup angkulani songon hiou na marambulu; jadi ibahen ma goranni si Esau.
26 Dob ai kaluar ma anggini, ijolom do tambihul ni si Esau; jadi ibahen ma goranni si Jakob. Marumur onom puluh tahun do si Isak bani na tubuh ai sidea.
27 Jadi lambin banggal ma dakdanak ai; gabe sahalak parburu na pandei ma si Esau, sahalak na marosuh marianan i talun, tapi anggo si Jakob sahalak parlamlam do, na marosuh marianan i barung-barung.
28 Kasian ni si Isak do si Esau, halani marosuh ia mangankon na binuru; tapi kasian ni si Rebekka do anggo si Jakob.
29 Dob ai manlompah sipanganon ma sahali si Jakob, jadi roh ma si Esau hun talun, anjaha loja tumang do ia.
30 Nini si Esau ma hubani si Jakob, “Mahua bere ma ahu mangankon sipanganon na gerger in, ai domma loja tumang ahu.” Halani ai do ase margoran si Edom ia.
31 Tapi nini si Jakob ma, “Jual ma bangku lobei hak hasikahanonmu!”
32 Nini si Esau ma, “Tonggor ma, na laho matei do ahu; bahen aha ma bangku hak hasikahanon in?”
33 Nini si Jakob ma, “Anggo sonai, bijahon ma bangku sadari on.” Jadi ibijahon ma bani, anjaha ijual ma hak hasikahanonni ai hubani si Jakob.
34 Dob ai ibere si Jakob ma hubani si Esau sagu-sagu pakon dali na nilompahni ai, jadi mangan ma ia anjaha minum, dob ai jongjong ma ia laho misir. Sonin ma hampung ni uhur ni si Esau bani hak hasikahanonni ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA