Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 A’nikkami pole Abraham siagang sitau baine niarenga Ketura.
2 Anjo bainenna allassukammi ana’, ia massing niarenga: Zimran, Yoksan, Medan, Midian, Isybak, siagang Suah.
3 Yoksan manggena Syeba siagang Dedan. Na ia turunganna Dedan iamintu tu Asyur, tu Letus, siagang tu Leum.
4 Na sikamma ana’na Midian iamintu: Efa, Efer, Henokh, Abida, siagang Eldaa. Yangaseng ke’nanga turungang battu ri Ketura.
5 Manna nanapassareang ngaseng sikamma pa’barang-baranganna a’jari sossoranna Ishak,
6 mingka ri wattu attallasa’na jai tonji hadia barang-barang napassareang mae ri ana’-ana’ battua ri baine maraenna. Nampa nasuro anjo sikamma ana’na a’lette’ mange ri daera niaka ri bageang rayanganna Kanaan, sollanna napakabella kalenna battu ri Ishak ana’na.
7 Matemi Abraham ri wattu toa dudunamo, iamintu 175 taung umuru’na.
8 (25:7)
9 Nitarawammi ri ana’-ana’na, iamintu Ishak siagang Ismael, lalang ri Kali’bong Makhpela, niaka ri kokoa ri bageang rayanganna Mamre. Anjo kokoa riolo Efron ana’na Zohar, tu Het pata.
10 Mingka le’ba’mi naballi Abraham. Bainenna Abraham, iamintu Sara, anjoreng tongi nitarawang.
11 Ri wattu matenamo Abraham, Nabarakkakimi Allata’ala anjo Ishak, ana’na Abraham. Anjo wattua ammantangi Ishak ri ampi’na bungung niarenga "Iami Amparhatikanga’".
12 Ismael, iamintu ana’na Abraham battua ri Hagar, baine battua ri Mesir, surona Sara.
13 Ismael nia’ sampulo anrua ana’na. Iaminne areng-arenna situru’ kalassukanna: Nebayot, Kedar, Adbeel, Mibsam, Misyma, Duma, Masa, Hadad, Tema, Yetur, Nafis, siagang Kedma. Ia ngasemmi anne a’jari boe-boena sampuloa anrua suku bansa, siagang desana siagang kemana ke’nanga niarengi situru’ massing arenna ke’nanga.
14 (25:13)
15 (25:13)
16 (25:13)
17 Umuru’na Ismael ri wattunna mate iamintu 137 taung.
18 Turunganna ke’nanga ammantang ri alla’na daera Hawila siagang Syur, ri bageang rayanganna Mesir a’lampa mangea ri Asyur. Tassa’la’mi ke’nanga battu ri turunganna Abraham maraenga.
19 Iaminne riwaya’na Ishak, ana’na Abraham.
20 Ishak, patampulo taung umuru’na ri wattunna a’nikka siagang Ribka, andi’na Laban, ana’na Betuel, tubattu ri Aram ri Mesopotamia.
21 Lanri tena nanggappa ana’ Ribka, appala’ doammi Ishak ri Batara untu’ bainenna. Na nisaremo pappala’na Ishak ri Batara, sa’genna attianammo Ribka.
22 Attianammi ana’ akkambara’. Ri tenanapa nalassu’ anjo ana’-anaka, assilutturu’mi ke’nanga lalang ri battanna. Nakanamo Ribka, "Angngapa namusti kajariang anne kammaya ri kalengku?" Nampa appala’mo pitunju’ mae ri Batara.
23 Nakanamo Batara ri ia, "Nia’ rua bansa lalang ri battannu; lallassukangko rua bansa lasimusu; kassakangngangi andi’na na daenna ia toaya la’jari palayang mae ri bungkoa."
24 Narapi’mi wattunna Ribka untu’ lammana’. Allassukammi rua ana’ bura’ne akkambara’.
25 Ia toaya eja-ejai bukkulenna, nasangkamma a’bului bukkulenna sanrapang bulunna jubaya. Lanri kammanami anjo naniareng Esau.
26 Ri wattunna nilassukang ana’ makaruaya, limanna anna’galaki ri kacunu’ bangkenna Esau. Iaminjo saba’na naniareng Yakub. Annampulo taung umuru’na Ishak, wattu lassu’na ke’nanga.
27 Pila’ katambammi lompona anjo ruaya ana’. Esau a’jarimi pasoso’ sannaka cara’de’na, nanangai ammantanga ri parang. Mingka Yakub sannangi sipa’na siagang nangai ammantanga ri balla’.
28 Ishak la’bi nangaiangngangi Esau, lanri nangaina Ishak angnganre dageng nisosoka. Mingka Ribka la’bi nangaiangngangi Yakub.
29 Ri se’reang allo ri wattunna sitabang appallu Yakub gangang campe’ eja, battumi Esau, ammotere’ battu assoso’. Na sanna’ cipuru’na anjo wattua.
30 Nakanamo ri Yakub, "Teai sipato’ cipurukku. Saresa’ sike’de’ anjo campe’ ejaya." (Iaminjo saba’na naniareng Edom.)
31 Appialimi Yakub angkana, "Baji’mi, assala’ nusareanga’ la’bi riolo ha’ bungasa’nu."
32 Nakanamo Esau, "Talakujampangi anjo ha’ kammaya ri kalengku. Kamma lamatea’ kusa’ring napakamma cipuru’!"
33 Nakanamo pole Yakub, "Assumpamako rolong angkanaya nupassareammi anjo ha’nu mae ri nakke." Assumpami Esau nampa napassareang anjo ha’na mae ri Yakub.
34 Le’baki anjo nisaremi ri Yakub roti siagang sipa’gang anjo campe’ ejaya. Angnganremi siagang angnginummi Esau nampa a’lampa. Kammaminjo nanabawang-bawangngang ha’ bungasa’na Esau.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA