Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Siapa are wattu ribokoanganna Naso’rimi Allata’ala kajarrekanna tappa’na Abraham. Nakio’mi Allata’ala anjo Abraham angkana, "Abraham!" Appialimi Abraham angkana, "Iye’ Batara."
2 Nakanamo Allata’ala, "A’lampako mange ri butta Moria siagang Ishak, anjo ana’ sitau-taunu, sannaka nukarimangnginna. Anjoreng, ri se’reang bulu’ laKujo’jokangako, musti nupassareangi antu ana’nu a’jari koro’bang mae ri Nakke."
3 Ammukona bari’basa’, ammisa’-misa’mi kayu Abraham untu’ lanapake angngerang koro’bang nampa nasikko’ anjo kayua irate ri dongko’na keledaina. A’lampami siagang Ishak kammayatompa rua surona mange ri tampa’ Napaua Allata’ala ri ia.
4 Ri makatalluna alloa nacini’ battu bellami Abraham anjo tampaka.
5 Nakanamo mae ri anjo ruaya surona, "Ammantang mako kau sipa’rua siagang anne keledaia anrinni. Inakke siagang anakku la’lampa’ mange anjoreng untu’ anynyomba ri Batara. Sinampe’ nammotere’ ikambe mae anrinni."
6 Napapisangiammi Abraham ri salangganna Ishak anjo kayu untu’ tunuang koro’banga. Na kalenna angngerammi lading siagang bara pepe’ untu’ kayu tunuanga. Ri wattu a’jappanamo ke’nanga sipa’rua,
7 nakanamo Ishak, "Bapa’!" Appialimi Abraham angkana, "Apa kutadeng, ana’?" Akkuta’nammi Ishak angkana, "Angngerang maki’ pepe’ siagang kayu, mingka kemae ana’ gimbala’ eroka nipa’jari koro’bang lanitunua?"
8 Appialimi Abraham angkana, "KalenNa Allata’ala lampasadiai anjo ana’ gimbalaka." Nampa napatulusu’ lampana ke’nanga.
9 Battui ke’nanga mange ri anjo tampa’ le’baka Napau Allata’ala ri Abraham, ambangummi se’re tampa’ pakkoro’bangngang siagang napa’lonjo’mi anjo kayu tunuanga irateanganna. Nampa nasikko’ anjo ana’na siagang napara’ba ri anjo tampa’ pakkoro’bangnganga, ri tompo’na anjo kayu tunuanga.
10 Le’baki anjo, naallemi ladinna naero’ nasamballe anjo ana’na.
11 Mingka akkio’mi malaeka’Na Batara battu ri langika mae ri ia angkana, "Abraham, Abraham!" Appialimi Abraham angkana, "Iye’ Batara!"
12 Nakanamo Batara tete ri anjo malaekaka, "Teako pa’risi antu anaka yareka teako apa-apai. Kamma-kamma anne Kuassemmi angkanaya nupakalompoA’ siagang mannurukiko ri Nakke, nasaba’ tena nanutollaki untu’ ampassareangi ana’ sitau-taunu mae ri Nakke."
13 Assailemi Abraham mae ri tammulilina anjo tampaka, nampa nia’mo nacini’ sikayu gimbala’ laki ia tassambanga tanru’na ri rompo’-rompoka. Naallemi Abraham anjo gimbalaka nampa napassareang mae ri Batara untu’ a’jari koro’bang tunuang sambe ana’na.
14 Naaremmi Abraham anjo tampaka "Napasadiai Batara apa niparalluanga." Na sa’genna kamma-kamma anne tuli nakanana taua "Irate ri bulu’Na Napasadiai Batara apa niparalluanga".
15 Sikalipi pole akkio’ malaeka’Na Batara battu ri langika mae ri Abraham, angkana,
16 "Nakana Batara: AssumpA’ lanri areng KalengKu, lanri nugaukanna anne kammaya siagang tena nanutollaki untu’ ampassareangi anjo ana’ sitau-taunu mae ri Nakke,
17 laKubarakkakiko alla’bi-la’bi siagang laKupa’jari jai turungannu sanrapang bintoenga jaina ri langi’ siagang sanrapang kassika jaina ri biring tamparanga. Sikamma ana’-cucunnu lanabeta ngasengi sikamma musunna ke’nanga.
18 Sikontu bansaya ri lino lanapalaki ri kau sollanna Kubarakkaki ke’nanga, sangkamma Kubarakkakinna turungannu, lanri mannurukinnu ri parentaKu."
19 Le’baki anjo ammotere’mi Abraham mange ri anjo ruaya surona. Nampa a’lampa ke’nanga siagang mange ri Bersyeba, siagang ammantang tulimi Abraham anjoreng.
20 Nia’ daenna Abraham niareng Nahor. Le’ba’na anjo kajarianga ri Bulu’ Moria, nalangngere’ kabara’mi Abraham angkana Milka, iamintu bainenna Nahor, nia’mo sagantuju ana’ bura’nena, iamintu:
21 Us, ia kaminang toaya, Bus, andi’naya, Kemuel, ia a’jaria manggena Aram,
22 Kesed, Hazo, Pildas, Yidlaf, siagang Betuel,
23 ia a’jaria sallang manggena Ribka. Iaminjo sagantuju ana’ nalassukanga Milka battu ri bura’nenna Nahor, sari’battanna Abraham.
24 Nahor nia’ baine maraenna ia niarenga Reuma. Iaminne baine maraenna angnganakkangi Tebah, Gaham, Tahas siagang Maakha.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA