Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sarai, ndehara Abram, la lit anakna. Tapi lit sekalak singuda-nguda budak Sarai, Hagar gelarna, ia kalak Mesir.
2 Emaka nina Sarai man Abram, "Tehndu maka la ibereken TUHAN aku mupus; dage medemlah kam ras budakku ah, ntah mawen banci ipupusna man bangku sada anak." Payo iakap Abram kai si ikataken Sarai ndeharana.
3 Jenari iberekenna Hagar man Abram. (Kejadin enda terjadi kenca Abram nggo 10 tahun ringan i Kanaan.)
4 Emaka ersada kula me Abram ras Hagar, kenca bage mehuli kula Hagar. Tapi kenca nggo ieteh Hagar maka nggo mehuli kulana, jadi sombong ia, lanai iergakenna Sarai.
5 Erkiteken si e nina Sarai man Abram, "Kam nge si salah maka Hagar sombong man bangku. Kubereken ia man bandu, tapi kenca itehna maka mehuli kulana lanai iergaina aku. TUHAN lah si jadi hakim i bas kita, ntah ise kita ersalah."
6 Erjabap Abram nina, "Budakndu kap ia. Kam erkuasa man bana emaka uga akapndu mehuli bage ban." Jenari tuhu-tuhu mesui kal ate Hagar ibahan Sarai, seh maka kiam ia i bas Sarai nari.
7 Ijumpai malekat TUHAN si Hagar deher sada ulu lau i padang pasir dalan ku Sur,
8 janah nina, "Hagar, budak Sarai, i janari kam e ndai, janah ku ja atendu?" Erjabap Hagar nina, "Aku kiam nadingken tuanku Sarai."
9 Nina malekat ndai, "Mulihlah man bana, janah tetaplah kam jadi budakna.
10 Nterem pagi kubahan sinursurndu, seh maka la lit kalak si ngasup meligaisa.
11 Ipupusndu pagi sada anak dilaki, bahan denggo gelarna Ismael, erkiteken nggo ibegiken TUHAN pingko-pingkondu ras kiniseranndu.
12 Tapi anakndu e denggo bali ras kalde si meliar; kerina kalak ilawanna janah kerina kalak ngelawan ia. Ia serap nggeluh i bas kerina kade-kadena nari."
13 Nina Hagar i bas ukurna, "Tuhu-tuhu kin nggo kuidah Dibata si mperdiateken aku?" Emaka igelarina TUHAN si nggo ngerana man bana ndai "Dibata si mperdiatekenca".
14 Erkiteken si enda me maka igelari kalak sumur ndai, "Sumur Dibata Si Nggeluh si nggo mperdiateken aku." Inganna kelang-kelang Kades ras Beret.
15 Emaka ipupus si Hagar sekalak anak dilaki. Bapa anak ndai eme Abram, janah ibahanna gelar anakna e Ismael.
16 Tupung si e umur Abram 86 tahun.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA