Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Le’baki anjo, anggappami Abram pappiso’na siagang nalangngere’mi Batara angkana ri kalenna, "Teako mallakki Abram. LaKujagaiko battu ri balaya, siagang laKusareko pahala lompo."
2 Mingka nakanamo Abram, "O Batara Kaminang Tinggia, tena naKisarea’ ana’. Tau langgappayai barang-barangku poro Eliezer bawang, iamintu atangku battua ri Damsyik. Jari apa matu-matunna anjo pahalaya mae ri nakke?"
3 (15:2)
4 Nampa nalangngere’mo Abram akkana pole Batara ri ia angkana, "Teai atannu langgappai barang-barannu, mingka ana’ bura’ne kalennu."
5 Nierammi Abram ri Batara assulukang, nampa Nakana Batara ri ia, "Ciniki langika, siagang coba sai nubilang sikamma bintoenga; lasangkammai anjo bintoenga jaina turungannu."
6 Tappa’mi Abram ri Batara. Nalanri kammana nanitarimamo ri Batara salaku tau appakasannanga ri atinNa.
7 Nampa Nakana pole Batara ri ia, "INakkemi Batara, le’baka anrurungangko assulu’ battu ri pa’rasangang Ur ri Babilonia, sollanna Kupassareang anne buttaya mae ri kau untu’ nukammai."
8 Mingka akkuta’nammi Abram nakana, "O Batara Kaminang Tinggia, antekamma batena nakkulle kuasseng angkanaya inakke lampatangi anne buttaya?"
9 Appialimi Batara angkana, "Angngalleko untu’ iNakke sikayu sapi gana, sikayu bembe gana siagang sikayu gimbala’ laki, ia massing tallun taunga umuru’na, kammayatompa sikayu jangang-jangang bukkuru’ siagang sikayu jangang-jangang bodobangkeng."
10 Naallemi Abram sikamma anjo olo’-olo’ kammaya untu’ Allata’ala. Anjo sapia, bembea siagang gimbalaka, massing napue ruami, nampa napadongko’ najijiri’ massing sidallekang lalang ruang barrisi’ anjo le’baka napue rua. Mingka anjo jangang-janganga tenaja napuei.
11 Battumi jangang-jangang angnganrea dageng andongkoki anjo dagenga, mingka nibongkai ri Abram.
12 Ri wattu appakkaramulanamo labu alloa, attinromi Abram. Ti’ring nibattuimi ri pakkasia’ malla’ dudua.
13 Nakanamo Batara ri ia, "U’rangi, angkanaya la’jari tubattu-battui turungannu ri se’reang pa’rasangang maraeng; la’jari atai ke’nanga anjoreng siagang lanijallakkangi patambilangngang taung sallona.
14 Mingka anjo bansa ampa’jari atayai turungannu laKuhukkungi. Siagang punna nabokoi turungannu anjo pa’rasanganga, langngerangi ke’nanga jai barang-barang.
15 Na ikau lala’bui umuru’nu. Lamateko lalang kasannangang, nunampa nitarawang.
16 Punna narapi’mo patang lapisi’ turungannu, lammotere’mi cucu-cucunnu mae anrinni, nasaba’ talaKubongkayapi a’lampa tu Amori punna tenapa ta’liwa’ ja’dala’na ke’nanga sa’genna parallu nihukkung."
17 Ri wattunna bangngimo, ti’ring nia’mo ammumba pappalluang a’rumbu siagang sulo a’rinra, nampa numalo ri alla’na anjo dageng-dageng le’baka nipue.
18 Anjo wattua memang, appare’mi Batara parjanjiang siagang Abram. Nakana Batara, "A’janjiA’ angkanaya laKusarei turungannu sikontu anne buttaya, appakkaramula battu ri pa’baeng-baenna pa’rasangang Mesir sa’genna mange ri Binanga Efrat,
19 kammayatompa butta Keni, Kenas, Kadmon,
20 Het, Feris, Refaim,
21 Amori, Kanaan, Girgasi, siagang Yebus."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA