Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana jareya PANGERAN ngaton ka Abram, laju adhabu, "Ja’ tako’, Abram, Sengko’ alindhungana ba’na dhari babaja; ban pole bi’ Sengko’ ba’na eberri’ana opa se talebat rajana."
2 Abram nyaot, "Guste ALLAH Se Mahatenggi, Pangeran kaula, ponapa gunana opa paparengnga Junandalem ka abdidalem? Sareng Junandalem abdidalem ta’ eparenge ana’, daddi se bakal narema’a sangkolan dhari abdidalem Eliyezer, dunor abdidalem oreng Damsyik ka’dhissa’."
3 (15:2)
4 Tape PANGERAN adhabu pole, "Se narema’a sangkolanna ba’na ana’na ba’na dibi’, banne dunorra."
5 PANGERAN laju abakta Abram ka lowar, pas adhabu, "Kodda’ bitong bintang e langnge’ rowa; bi’ Sengko’ ba’na eberri’ana toronan se bannya’na padha ban bintang e langnge’ jareya."
6 Abram parcaja ka PANGERAN, daddi Abram katarema ban ekasokane bi’ PANGERAN.
7 Saellana jareya PANGERAN adhabu pole ka Abram, "Sengko’ reya PANGERAN se ngeba ba’na kalowar dhari nagara Ur e Babilonia, Sengko’ magiya tana reya ka ba’na."
8 Abram atanya, "Adhu, Guste ALLAH Se Mahatenggi, Pangeran kaula, kadi ponapa abdidalem ka’dhinto se onenga ja’ tana ka’dhinto bakal daddiya gadhuwan abdidalem?"
9 PANGERAN adhabu, "Kassa’ Sengko’ ngala’agi sape babine’ settong, embi’ babine’ settong, ban dumba lake’ settong, omorra se padha tello taonan. Ngala’agi keya keteran ban dara settong ebang."
10 Abram mondhut ban-keban se edhabuwagi PANGERAN gella’. Sape, embi’ ban dumbana esambelli, eseba’ dhuwa. Ba’-saseba’na esaba’ epadhep-adhebban, epadaddi dhu jijir. Tape no’-mano’na ta’ eseba’ dhuwa.
11 Dagingnga ban-keban jareya eentare no’-mano’ se ngakanan babathang, tape bi’ Abram eagga sampe’ buru kabbi.
12 E bakto para’ compet are, Abram asaren ce’ ngeddhana. O-tao panggaliyanna pas arassa ce’ tako’na.
13 PANGERAN adhabu, "Kaenga’e, ya, na’ potona ba’na bakal daddiya oreng manca e nagara laen; e nagara jareya na’ potona ba’na bakal epadaddiya dunor sarta bakal eseksa’a odhi’na sampe’ pa’ ratos taon abidda.
14 Tape bangsa se nyeksa na’ potona ba’na jareya bi’ Sengko’ eokoma, ban e bakto na’ potona ba’na jareya ondura dhari nagara jareya bakal ngeba’a arta sabannya’na.
15 Ba’na dibi’ bakal odhi’a sampe’ ce’ towana; ba’na bakal mateya kalaban taremtem, laju ekoburragi.
16 Saellana pa’ toronan, buru na’ potona ba’na jareya abaliya dha’ enna’, sabab bangsa Amori bi’ Sengko’ gi’ ta’ eojuga sampe’ bangsa jareya talebat jahadda, daddi kodu eokom."
17 E bakto are la compet ban petteng, o-tao pas badha apoy se ngokos ban obur se rabbang e antarana thok-ketthoganna daging gella’.
18 E bakto jareya PANGERAN laju mabadha parjanjiyan ban Abram, dhabuna, "Bi’ Sengko’ tana reya ebagiya kabbi ka na’ potona ba’na, molae dhari batessa nagara Messer sampe’ ka Songay Efrat,
19 iya areya tanana bangsa Keni, Kenas, Kadmon,
20 Het, Feris, Refa’im,
21 Amori, Kana’an, Girgasi ban Yebus."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA