Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi sogam do uhur ni si Jona pasal ai, jadi manringis ma ia.
2 Jadi martonggo ma ia bani Jahowa, nini ma, “Ale Jahowa, ai lang on do na huhatahon sanggah i tanohku ope ahu? Halani ai do ase tarolos ahu maporus hu Tarsis, ai hubotoh do, Naibata paridop ni uhur ampa pardear layak do Ham, nanget manringis anjaha parholong atei banggal anjaha na ra manolsoli diri-Ni pasal hamagouan.
3 Ai pe ale Jahowa, buat Ham ma rahanan hosahku humbangku, ai dearan ma ahu matei humbani na manggoluh.”
4 Nini Jahowa ma mambalosi, “Ai patut ma manggila ho?”
5 Dob ai luar ma si Jona hun huta ai, jadi ipahundul ma dirini hampit hapoltakan ni huta ai. Ipauli ma bani ijai sopo-sopo anjaha hundul ma ia ijai marlinggom-linggom, paima ididah barang aha do na sihol masa bani huta ai.
6 Jadi iadongkon Jahowa ma sada hayu na dulas ganjang ibabou ni si Jona bahen linggom ni uluni, laho paluahkonsi humbani paruhuranni na seda ai. Malas tumang do uhur ni si Jona mangidah hayu ai.
7 Tapi bani parnaik ni sibalikkuning patarni ai, iadongkon Jahowa ma sada gilok-gilok; iruangi ma hayu ai gabe melus ma.
8 Bani parpoltak ni mata ni ari iparoh Jahowa ma logou na milas hun hapoltakan. Idoit mata ni ari ai ma ulu ni si Jona pala mandatei iahap. Iparsinta uhurni ma matei, nini ma, “Dearan ma ahu matei ase manggoluh!”
9 Dob ai nini Jahowa ma dompak si Jona, “Ai patut ma ho manggila halani hayu in?” Nini ma mambalosi, “Patut do ahu mangila das ronsi na matei.”
10 Jadi nini Jahowa ma, “Gari ho pusok do uhurmu halani hayu in, na so hinangalutkonmu anjaha na so pinabanggal-banggalmu, tubuh ibagas saborngin anjaha magou ibagas saborngin.
11 Samintolah ma Ahu, mintor lang ma idop uhur-Hu mangidah Ninive, huta na banggal in, na marisi lobih saratus dua puluh ribu jolma, na so mambotoh parleganan ni siamun barang sambilou, ambahni ai pinahan na sain bueini?”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA