Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Araq sopoq ahli Taurat lẽman golongan dengan Parisi aranne Nikodemus.

² Lẽq sopoq kelem ie parek ojok Deside Isa, dait matur, "Bapaq Guru, tiang pade nenaoq Pelungguh teutus siq Allah. Sẽngaq nẽnten araq sopoq dengan juaq saq bau miaq keajaipan maraq Pelungguh, lamun Allah nẽnten bareng ie."

³ Jawab Deside Isa, "Tiang badaq side: Setetune ndẽq araq sopoq manusie saq bau serioq Kerajaan Allah lamun ie ndẽq tebijeang malik."

⁴ Jawab Nikodemus tipaq Deside Isa, "Segerah dengan saq sampun toaq tebijeang malik? Napi ie iniq tame malik lẽq dalem tian inaqne beterus tebijeang malik?"

⁵ Jawab Deside Isa, "Tiang badaq side, setetune lamun dengan ndẽq tebijeang lẽman aiq dait lẽman Roh Allah, dengan nike ndẽq gen bau tame Kerajaan Allah.

⁶ Manusie secare jasmani tebijeang siq dengan toaqne, laguq secare rohani tebijeang lẽman Roh Allah.

⁷ Ndaq bengaq lantaran Tiang badaq side: Side selapuq harus tebijeang malik.

⁸ Angin lalo ojok mbẽ ie mẽlẽ; ite dengah suarene, laguq ndẽq nenaoq lẽman mbẽ datengne dait ojok mbẽ aningne. Maraq nike ẽndah dengan saq tebijeang lẽman Roh Allah."

⁹ Nikodemus metakẽn, "Berembẽ nike iniq telaksane?"

¹⁰ Jawab Deside Isa, "Side guru lẽq Israel; segerah side ndẽq nenaoq hal-hal nike?

¹¹ Tiang badaq side: Setetune tiang pade nyampẽang mengenai napi saq tiang pade taoq, dait tiang pade ngebẽng kesaksian mengenai napi saq sampun tiang pade serioq; laguq side pade ndẽq mẽlẽ nerimaq kesaksian tiang pade.

¹² Side pade ndẽq percaye lamun Tiang nyeriteang side mengenai hal-hal lẽman dunie niki; berembẽ side pade bau percaye, lamun Tiang nyeriteang side hal-hal mengenai sorge?

¹³ Ndẽq araq sopoq dengan juaq saq sampun taẽk ojok sorge, kecuali Ie saq turun ojok dunie, nike Bije Manusie.

¹⁴ Pade maraq Musa saq taẽkang ulah tembage lẽq sopoq kayuq lẽq padang gurun, maraq nike ẽndah Bije Manusie harus tetaẽkang,

¹⁵ adẽq selapuq dengan saq percaye lẽq Ie mauq idup sejati dait kekel.

¹⁶ Sẽngaq belẽq gati kasih Allah tipaq manusie lẽq dunie niki, jangke Ie ngicanin Bije-Ne saq nunggal, adẽq sebilang dengan saq percaye lẽq Ie ndẽqne binase, laguq mauq idup sejati dait kekel.

¹⁷ Sẽngaq Allah ngutus Bije-Ne nẽnten jari hakimin dunie niki, laguq adẽq langan Ie, dunie niki teselametang.

¹⁸ Dengan saq percaye lẽq Ie ndẽq gen tehukum. Laguq dengan saq ndẽq percaye sampun tehukum siq Allah, sẽngaq ie ndẽq percaye lẽq dalem pesẽngan Bije Nunggal saq asalne lẽman Allah.

¹⁹ Hukuman nike: Cahaye nike sampun rauh ojok dunie, laguq manusie demenan peteng ketimbang menah, sẽngaq perbuatan-perbuatan ie pade jahat.

²⁰ Sebilang dengan saq gawẽq jahat, meriq lẽq cahaye; ie ndẽq mẽlẽ dateng lẽq cahaye nike, adẽq perbuatanne saq jahat ndẽq penggitan.

²¹ Laguq dengan saq ngelaksaneang napi saq kenaq, dateng tipaq cahaye nike adẽqne jari nyate bahwe napi saq ie laksaneang sesuai pekayunan Allah."

²² Sesampun nike Deside Isa dait pengiring-pengiring-Ne lumbar ojok Yudea. Lẽq derike Ie mererepan pire jelo ngonẽqne teiring siq ie pade sambil baptis dengan saq betobat.

²³ Waktu nike Yahya ndẽqman tame bui. Ie baptis dengan lẽq Ainon, ndẽqne jaoq lẽman Salim, sẽngaq lẽq derike luwẽq aiq. Dengan-dengan pade dateng ojok derike terus Yahya, baptis dengan-dengan nike.

²⁴ (3:23)

²⁵ Terus pengiring-pengiring Yahya mulai pade betungkasan kance dengan Yahudi mengenai aturan penyucian.

²⁶ Ie pade lumbar ojok Yahya, dait bebase, "Paq Guru, napi pelungguh masih iling lẽq dengan saq bareng kance pelungguh lẽq itoqan Kokoq Yordan nike saq piranan sampun pelungguh ceriteang tiang pade? Ie ẽndah baptis dengan, dait selapuq dengan lumbar ojok Ie!"

²⁷ Jawab Yahya, "Ndẽq araq sopoq dengan juaq saq bau nerimaq napi-napi lamun ie nẽnten teicanin siq Allah.

²⁸ Side pade sampun dengah raos tiang, 'Tiang ndẽqne Mesias saq tesebut ẽndah Almasih. Tiang teutus senjuluq Ie.'

²⁹ Pengantẽn nine nike ẽpẽne pengantẽn mame. Sahabat pengantẽn mame nike cume nganjeng lẽq dẽkẽtne dait dengahang, dait ie besukecite lamun dengah suare pengantẽn mame. Maraq nike ẽndah tiang. Mangkin tiang seneng gati.

³⁰ Ie harus sayan belẽq, laguq tiang harus sayan kodẽq."

³¹ Sai saq rauh lẽman atas ngelebihin selapuqne; sai saq asalne lẽman dunie, ie manusie warge dunie dait ngeraos mengenai hal-hal lẽq dunie. Sai saq rauh lẽman sorge ngelebihin selapuqne.

³² Ie bebaos mengenai napi saq sampun Ie cingakin dait Ie pirengang, laguq ndẽq araq sopoq dengan juaq saq percaye lẽq kesaksian-Ne.

³³ Dengan saq percaye lẽq kesaksian-Ne nike, ngakuq bahwe Allah kenaq.

³⁴ Sẽngaq dengan saq teutus siq Allah nyampẽang Manik Allah, sẽngaq nẽnten araq tutuqne Allah ngicanin Roh-Ne.

³⁵ Bapa ngasihin Bije, dait sampun nyerahang selapuq kuase lẽq Ie.

³⁶ Dengan saq percaye lẽq Bije nike gen mauq idup sejati dait kekel. Laguq dengan saq ndẽq taat lẽq Bije nike ndẽqne mauq idup. Ie tehukum siq Allah selaẽq-laẽqne.

Yohanes

Video Yohanes 3

Ikuti Kami:

KONTAK | PARTISIPASI | DONASI