Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pangeh Yésus nepebala, idi Ieh netengook déi' langit, kebalaNeh, "O Ama' karebneh pangeh macing. Ngegala' rayeh AnakMu, pad AnakMu pana' miak ngegala' rayehMu.

² Iko pangeh nemaré lalud kuanNeh pa luun amung-amung lemulun, pad Ieh miak maré ulun luk meruked kuan anid-anid burur luk biréMu Neneh.

³ Ini ulun luk meruked, ieh ineh pad ideh miti Namu, Allah luk Sebuleng idi matu, idi Yésus Keristus luk Iko nengecuk ineh.

⁴ Ui pangeh nengerayeh Namu bang tana', idi nengeriput kekamen luk Iko nemaré kuanKu.

⁵ Idi nekini, O Ama', ngerayeh Negku pa kiungMu sebuleng dengan rayeh luk Ui nekali' pa kiungMu kareb nateh tana' ini pinudut.

⁶ "Ui pangeh nengegala' ngadanMu kuan lemulun bang tana' ini luk biréMu kuanKu. Ideh kuanMu, idi Iko nemaré nedeh kuanKu, idi ideh pangeh nemaya' balaMu.

⁷ Nekini ideh kali' idi amung-amung luk biréMu kuanKu ineh macing rat Namu.

⁸ Ui nemaré kuandeh bala luk bilaMu Negku, idi ideh pangeh nengalap ineh. Ideh nekali' dengan matu idi Ui nacing rat Namu. Idi teh ideh manu ratnan Iko luk nengecuk Negku.

⁹ "Ui ini mutuh kuandeh, Na Ui mutuh kuan uang tana' ini, iamo' kuan lemulun luk biréMu Negku, ngaceku ideh kuanMu.

¹⁰ Amung-amung luk kuanKu, ineh teh kuanMu, idi luk kuanMu, ineh teh kuanKu, idi rayehKu ginala' bang nedeh.

¹¹ Idi nekini Ui amé' Namu. Na Ui tudo bang tana' ini teh, iamo' ideh tudo bang tana' ini. O Ama' luk meligan! Ngasa' nedeh ku lalud ngadanMu luk biréMu Negku, pad ideh mangun ku sebuleng mepad kudeng Kiteh.

¹² Laba' Ui tudo dengandeh, Ui ini nengimet nedeh bang ngadanMu luk biréMu Negku. Ui pangeh nematar nedeh, idi seburur pana' rat arangdeh na metutu', iamo' lemulun luk na miak na metutu', pad ngacing bala bang Surat Allah.

¹³ Iamo' nekini Ui amé' Namu; idi Ui mala amung ini serukedKu tudo bang tana' ini, pad ideh miak ngalap awangKu bang niatdeh dengan meriput.

¹⁴ Ui ini nengacing balaMu kuandeh; idi uang tana' ini megateh nedeh, ngaceku ideh baken ratnan tana' ini, mepad kudeng Ui teh baken ratnan tana' ini.

¹⁵ Na Ui mutuh Namu ngalap nedeh rat bang tana' ini, iamo' pad Iko ngimet nedeh ratnan luk Dat ineh.

¹⁶ Mepad kudeng Ui ini baken ratnan tana' ini, ideh pana' baken ratnan tana' ini.

¹⁷ Ngeligan nedeh bang luk matu; balaMu, ineh luk matu.

¹⁸ Ui nengecuk nedeh amé' bang tana' ini, mepad kudeng Iko nengecuk Negku.

¹⁹ Ui ngeligan bururKu ngaceku ideh, pad ideh pana' uen ngeligan bang luk matu.

²⁰ "Ui mutuh baken kuandeh mo', iamo' kuan idé-idé pana' luk manu Negku ngaceku ratnan bada'deh.

²¹ Ui mutuh pelé amungdeh mangun ku sebuleng mepad kudeng Iko bang Negku, O Ama', idi Ui pana' bang Namu, idi ideh pana' mangun ku sebuleng bang Nekiteh, pad uang tana' ini miak manu ratnan Iko luk nengecuk Negku.

²² Ui nemaré kuandeh rayeh luk pangeh biréMu Negku; pad ideh pana' mangun ku sebuleng, mepad kudeng Kiteh ini mangun ku sebuleng peh.

²³ Ui ini bang nedeh. Idi Iko bang Negku, pelé ideh miak mangun meligan bang sebuleng rurum; pad uang tana' ini miak kali' ratnan Iko luk nengecuk Negku idi mawa nedeh mepad kudeng Iko mawa Negku.

²⁴ "O Ama', pianKu idi lemulun luk pangeh biréMu Negku ineh idi denganKu iapeh-iapeh luk inanKu, pad ideh miak nier rayehKu luk pangeh biréMu Negku, ngaceku Iko pangeh mawa Negku atun ratnan tana' ini pinudut.

²⁵ O Ama' luk matu, tana' ini na miti Namu, iamo' Ui ini miti Namu, idi ideh pana' pangeh nekali' ratnan Iko luk nengecuk Negku.

²⁶ Ui nengegala' Namu kuandeh, idi Ui sikal ngegala' Namu teh, pad awa luk mepad kudeng awaMu kuanKu ineh, lutep bang nedeh, idi Ui pana' lutep bang nedeh teh."

Yohanes

Video Yohanes 17

Ikuti Kami:

KONTAK | PARTISIPASI | DONASI