Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia tonna mangkamo Puang Isa mpaui joo, mentingngarami de' langi' nakua, "Oo Ambe', nadete'mi wattunna. Pakala'bihmo' tee Aku' Anak, angkupakala'bih tooki'.

² Tapakuasamo' ngkuasaii to sininna tolino, jaji kuasa toomo' mbenni katuoan melo te'da cappa'na to totapangbenmo lako Aku'.

³ Iamo tee to katuoan melo te'da cappa'na, ke naissen tonganmiki' tau kumua Kita'mo Puang Allataala tongan, anna issen toona' kumua Aku'mo Puang Isa Almaseh to mangka tasua.

⁴ Mangkamo' mpakala'bihki' lan tee lino, nasaba' mangkamo' njamai to jaman tasuanna'.

⁵ Oo Ambe'! Pakala'bihmo' tee too. Ben pole'mo' to kamala'biran kuampuimo tontasola unapa, tonna te'dapa nadipaden tee lino.

⁶ Kupangpeissenanmiki' lako sininna tau to mangkamo tabenna' lan tee lino. Ia tuu lako tau tabenna', taun-Ta', nanturu'mo kadan-Ta',

⁷ naissenmo tee too kumua sininna to apa tabenna' pole jio ngasan mai Ambe'.

⁸ Kupauanmo kadan-Ta' to mangka tapauanna', na natarimamo. Naissen toomo kumua tonganna' topole jio mai Ambe'. Nakatappa'imo kumua Kita'mo to mangka ssuana'.

⁹ Kupassambajanganmo tuu lako tau. Te'da kupassambajangan ngasanni to tolino, apa ia mandara to tomangkamo tabenna', sanga taun-Ta' tuu lako tau.

¹⁰ Sininna to taung-Ku' taun-Ta' too, na sininna to taun-Ta' taung-Ku' too. Na ia to kamala'biran-Ku' pajan lan tangnga-tangngana tuu lako taun-Ta'.

¹¹ Na ia tee too la polemo' lako Ambe'. Te'damo kulatorro lan lino, apa lan unapi lino tuu lako taun-Ta'. Oo, Ambe' mala'bih! Kuasan-Ta', to mangka tabenna', nnampaii tuu lako taun-Ta', na memmesa' susi Ambe' na Aku'.

¹² Ia tongkusola unapa, kuasan-Ta' kupake nnampaii. Kuampai melomo anna moi mesa' te'da namasolang, saliwanna to pura dipattantumo anna jaji to diuki' lan Sura' Allataala.

¹³ Na ia tee too la polemo' lako Ambe'. Kupau ngasanni tee tongkulan unapa lino, anna wa'ding liwa' masannang tuu lako taun-Ta' susi Aku' masannang.

¹⁴ Kupauanmi to kadan-Ta'. Iamo joo nakaba'cii totangmatappa', nasaba' tangngia taunna, susi Aku' tangngia toona' taunna.

¹⁵ Te'da kumeta'da kumua antaalaimi lan mai lino tuu lako taun-Ta', apa meta'dara' lako kale-Ta' antaampaii jio mai kuasanna togaja'.

¹⁶ Susi Aku' tangngiana' taunna totangmatappa', moi tuu lako taun-Ta' tangngia too taunna.

¹⁷ Dennaa upa' ia tuu lako taun-Ta' nturu' kadan-Ta' na mpangmesa lako mandai Puang Allataala to katuoanna. Katonganan to kadan-Ta'.

¹⁸ Susi Ambe' mangkamo ssuana' tama lino, susi toomi Aku' mangkamo ssuai tuu lako taun-Ta' male lako padanna rupa tau.

¹⁹ Mangkamo kuturu' to kadan-Ta' angkumpangben kale-Ku' susi karoba, anna pumeloi tuu lako taun-Ta'. Kupugaukki susi joo dikua anna ia tuu lako taun-Ta' nturu' toda kadan-Ta' na mpangben toda kalena lako kale-Ta' namenjaji tau mesan-Ta'.

²⁰ Te'da na ia manda tee taun-Ta' kupassambajangan, apa kupassambajangan too to la matappa' lako Aku', ke napangpeissenanmi tuu lako taun-Ta' to Kareba Kasalamatan.

²¹ Oo Ambe', meta'dana' ke wa'dingngi anna memmesa' sola ngasanni susi Ambe' na Aku' memmesa', na Aku' memmesa' sola Ambe'. Dennaa upa' namemmesa' sola Ambe', anna matappa' to sininna tolino kumua Ambe' to ssuana'.

²² Mangkamo kuben kamala'biran to tabenna', anna memmesa' sola ngasan susi Ambe' na Aku' memmesa'.

²³ Memmesa'mo' sola tuu lako taun-Ta', na Ambe' memmesa' sola Aku', anna mattongan-tongan memmesa'mo sola ngasan. Ia ke susii joo na la naissen tolino kumua tasuana', na issen tooi kumua tapakamoja'i tuu lako taun-Ta' susi Aku' tapakamoja'.

²⁴ Oo Ambe', meta'dana' na ia tuu lako taun-Ta' to tabenna' la torro jio to kunii, anna kitai to kamala'biran-Ku'. Tabenmo' joo kamala'biran tonna te'dapa nadipaden tee lino, nasaba' tapakamoja'na'.

²⁵ Oo Ambe' maruruh! Te'da naissenki' tolino, apa Aku' kuissenki', na naissen ngasan taun-Ta', kumua tasuana'.

²⁶ Kupangpeissenanmiki' lako tuu lako taun-Ta', na la kupugauk tarruh susi joo, dikua naperasai to pangpakamoja'-Ta' lako Aku', susi Aku' mperasaii, angkumemmesa' sola tuu lako taun-Ta'."

Yohanes

Video Yohanes 17

Ikuti Kami:

KONTAK | PARTISIPASI | DONASI