Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ (40-25) Tumaram ma boi toguonmu buaya marhitei hail, barang odohkononmu dilahni bani tali?

² (40-26) Tumaram ma boi halihironmu igungni marhitei hotang, barang tupukonmu huyumni bani hail bosi?

³ (40-27) Tumaram ma ia ninuhurmu ra mambahen pangindoan bam, barang marhata na lamlam bam?

⁴ (40-28) Tumaram ma ra ia marpadan pakon ho, gelah ra ia lalab jadi jabolonmu?

⁵ (40-29) Tumaram ma boi parguro-gurohononmu ia songon manuk-manuk, barang tambatkononmu ia bahen guro-guro ni borumu?

⁶ (40-30) Tumaram ma ra halak pardengke mantiga-tigahonsi? Barang ra ma halak partiga-tiga marbagi ai?

⁷ (40-31) Mangasup do ho manomtomkon lombing hubani hulingkulingni, barang uluni bani pantom-pantom?

⁸ (40-32) Lajou ma sahali manangkapsi! Ingat ma parporanganni! Tontu lang be ra ho manlajousi.”

⁹ (41-1) Tonggor ma, labuh do pangarapanmai, mangidahsi pe domma malitonduy ho.

¹⁰ (41-2) Ise pe lang na pag mangkeheisi; i lobei-Hu ise na tahan jongjong?

¹¹ (41-3) ise ma na dob mamberehon Bangku, ase hubalas ai bani? Haganup na i toruh ni langit, Ahu do simadasi.

¹² (41-4) Seng pasipon-Ku pasal pagorini ai, barang gogohni na surung ai, barang potongan ni badanni ai.

¹³ (41-5) Ise ma na ongga mananggali pakeianni? Ise ma na pag manroroh hubagas iponni sidua baris ai?

¹⁴ (41-6) Ise ma na ongga mambuha osangni ai? Jangin do inggot iponni ai.

¹⁵ (41-7) Gurungni tarjadi humbani gantar na patitir, marrapat-rapat songon na tinokan.

¹⁶ (41-8) Rapat do na sada bani na sada nari, logou pe seng siat hun holangkolangni.

¹⁷ (41-9) Ganup longkot bani na legan, marsirapitan seng hasirangan.

¹⁸ (41-10) Anggo marbarsi ia kaluar sinalsal, anjaha matani songon salibon ni sibalik huning.

¹⁹ (41-11) Humbani babahni kaluar rigapan na marjilam-jilam, anjaha abab mandarat hunjai.

²⁰ (41-12) Humbani bungbung ni igungni kaluar timus, songon humbani hudon na gurgur, na ginorgoran marhitei ranggas-ranggas.

²¹ (41-13) Hosahni boi pagara arang, anjaha gajag ni apuy kaluar humbani babahni.

²² (41-14) Marianan do hagogohon bani tangkuhukni, anjaha songgot-songgot mardalan i lobeini.

²³ (41-15) Sibuk ni badanni toguh, songon na tinuang bani, seng tardugur.

²⁴ (41-16) Mapir do atei-ateini songon batu, mapir tene songon batu ni pandudaan na partoruh.

²⁵ (41-17) Anggo hehe ia bajoraon do halak na garang, malitonduy halani biarni.

²⁶ (41-18) Podang pe lang tolap bani, age tanja, gijig-gijig atap anak ni panah pe.

²⁷ (41-19) Doskon anggala do ietong bosi, anjaha tombaga doskon hayu masik-masik.

²⁸ (41-20) Seng maporus ia bahenon ni anak ni panah, doskon anggala do bani batu ni umbalang.

²⁹ (41-21) Doskon hayu ni omei do ihira antuk-antuk, anjaha itatawai do parngingis ni tanja.

³⁰ (41-22) Boltokni doskon sanga-sanga na marot, anjaha bogasni ibagas hubang doskon bogas ni gareta pardogei.

³¹ (41-23) Bah na i toruh gurgur ibahen songon bah na ibagas hudon, anjaha laut ai doskon serek panlompahan ni tambar.

³² (41-24) Limbasni i pudini mirlak-irlak itadingkon, anjaha doskon uban sisik ni bah ai idahon.

³³ (41-25) Seng dong usihanni anggo i darat, na tinompa na so marhabiaran do ia.

³⁴ (41-26) Mapas uhurni mangidah sagala na gijang, ia do raja bani sagala binatang panoroh.”