Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Maka akkullei nujakkala’ buaya niarenga Lewiatan, naporo sipappa’ja pekang nupake? Maka akkullei nupaukang lilana siagang otere’ passikko’?

² Maka akkullei nusarei otere’ muncenna, yareka nusare pakkai’ bassi gigi nga’ngala’na?

³ Maka akkullei napala’ ri kau sollanna nulappassang? Yareka sipa’bicara siagang ikau, appala’ pangngamaseang?

⁴ Maka akkullei appare’ passitujuang siagang ikau, siagang a’janji tuli ero’ allayaniko?

⁵ Maka akkullei nusikko’ sanrapang jangang-jangang piara, ampakasannangai pa’mai’na ata-ata bainea?

⁶ Maka akkullei nidanggangang ri paboya jukuka nampa nabage-bage mae ri padangganga?

⁷ Maka akkulle nuto’do’ bukkulenna siagang poke tallua matanna yareka nusambilai poke sa’genna natarrusu’ ulunna?

⁸ Seromi manna sikalija bawang, na tenamo nalanupinruangi; tenamo nalanukaluppai anjo passiba’jianga satunggu-tungguna.

⁹ Inai-nai anciniki lapung Lewiatan, la’jari lammai kalenna nampa tu’guru’ pinsang lanri malla’.

¹⁰ Sanna’ larrona punna nipabangungi ri tinrona; tena manna sitau barani ammenteng ri dallekanna.

¹¹ Inai akkulle ambakkai natalokoka? Tena tau ri linoa anne akkulle anggaukangi.

¹² Maeko Nakucaritakangko ri passala’na pakkaleanna Lewiatan, ri passala’ kagassinganna siagang antekamma ga’gana.

¹³ Tena manna sitau akkulle angkekkeki baju pantara’na yareka antarrusuki baju bundu’ napakea.

¹⁴ Inai akkulle ansungkei moncong kassa’na, niaka lalang gigi-giginna sannaka heba’na?

¹⁵ Kamma pa’lapa’ assusung, iaminjo dongko’na rapa’ sikali dakki’na, sanrapang batu terasa’na.

¹⁶ Sisusung-susung, tassikko’ jarre’, sa’genna manna anging takkulle ta’lappasa’ antama’.

¹⁷ Anjo pa’lapa’ ri kalenna sanna’ jarre’na sita’gala’na sa’genna tena olona lakkulle nipasisa’la’.

¹⁸ Punna ta’rassing Lewiatan, akkila’-kilaki cahayaya; accillaki matanna rapang ammumbana alloa.

¹⁹ Nia’ lila pepe’ assulu’ battu ri bawana; akkilaki bunga-bunga pepeka ri kere-keremae.

²⁰ Assuluki umbua battu ri ka’murunna, rapang umbu kayu nitunu rawanganna uringa.

²¹ Nappasa’na apparinrai bara; rinra pepe’ assulu’ battu ri bawana.

²² Kacikoro’na tamaka kassa’na, sa’genna malla’ ngaseng sikontu apa niaka ri dallekanna.

²³ Tena tampa’ lu’mu’ nia’ ri kalenna; Tena olona reppe’ lanri sangkammai bassi baja terasa’na.

²⁴ Pa’mai’na sanrapang batu, tena sikali ranggaselana kassa’ siagang terasa’ sangkamma batu pa’gilingang.

²⁵ Punna ammentengi, manna tau kaminang gassinga tappela’ ngaseng kabaranianna, a’jari tenamo dayana lanri sanna’ malla’na.

²⁶ Tena pa’dang akkulle allokoki; poke, pana, yareka coka, takkulle ampa’risi.

²⁷ Bassia napasangkammaji alusu’na ruku’-rukuka, tambagaya sangkammaji kayu jappoka lu’mu’na.

²⁸ Tena pana akkulle ambongkai; batu nipasambilaya mae ri ia sanrapanji rarame bawang.

²⁹ Palu-palua napasangkammaji silawaraka ruku’ kalotoro’; ammakkalaki punna nia’ tau ansambilai poke.

³⁰ Sissi’na ri parru’na rapangi kaca ciduka cappa’na. Sanrapang pa’battasa’ nakkekkeseki peoka na napue.

³¹ Nagoccangi tamparanga sa’genna atanja’ je’ne’ a’rere; sanrapang panci pappalluang minynya’ a’busa-busa.

³² Ammoliki bate bangkeng accaya, napinrai tamparanga a’jari busa je’ne’, keboka tanja’na.

³³ Tena sangkammanna ri tompo’na buttaya; apa attallasa’ tenaya nangngasseng malla’!

³⁴ Olo’-olo’ kaminang gammaraka nacini’ rawa ngaseng; iami karaeng ri sikontu olo’-olo’ sekkeka."