Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ba’ bisa’a ba’na mega’ baja Lewiyatan ngangguy panceng, otabana naja’ jilana ngangguy tale?

² Ba’ bisa’a ba’na masang tongar ka elongnga, otabana e’-kae’ besse ka tolangnga cangkemma?

³ Apa kerana Lewiyatan jareya menta ocol ka ba’na, otabana se-ngase menta kabellasan?

⁴ Apa kerana keban jareya mabadha parembagan ban ba’na, ngabdiya ka ba’na salanjangnga?

⁵ Apa kerana bi’ ba’na etaleyana akantha mano’ peyara’an, se masenneng atena la-kabula babine’an?

⁶ Apa kerana keban jareya ekadaganga bi’ reng-oreng majang, egi-bagi e antarana oreng dagang?

⁷ Ba’ bisa’a ba’na nyoddu’agi tombak amata tello’ ka kole’na, otabana ngontallagi lembing sampe’ terbas cethagga?

⁸ Kodda’ sedding sakaleyan bai, tanto ba’na ta’ kera adhukale’e; saomorra ba’na ta’ kera loppa se akeket ban keban jareya.

⁹ Pa’-sapa’a se nangale Lewiyatan, tanto lempo, pas kalengnger robbu ka tana.

¹⁰ Galagga ta’ jama’ mon epajaga dhari tedhunga; tadha’ oreng bangal manjeng e adha’anna.

¹¹ Sapa bisa nyerrang Lewiyatan ban abali salamet ka bengkona? Tadha’ oreng settonga se sanggup e dunnya reya.

¹² Mara bi’ Sengko’ ba’na ebala’ana bagiyanna badanna Lewiyatan, saapa rajana ban kakowadanna badanna.

¹³ Tadha’ oreng se bisa nyebbit kalambi lowarra, otabana maloka kalambi perrang se eangguy aba’na.

¹⁴ Sapa se bisa mokka’ colo’na se kowat, se aesse gigi se nako’e manossa?

¹⁵ Balikadda akantha tameng se ason-soson, cekka’ rapet, gali akantha bato.

¹⁶ Se settong nompang cekka’ ka settonganna, sampe’ ta’ ekenneng lebadi angen balakka’.

¹⁷ Tameng jareya asambung cekka’ ce’ kokona, sapa’a bai ta’ kera bisa mokka’.

¹⁸ Mon Lewiyatan aassim kalowar sonar akantha mardha, matana mancorong akantha are se moncar.

¹⁹ Apoy rabbang kalowar dhari colo’na, bur-nyembur ka lowaranna.

²⁰ Dhari lobangnga elongnga kalowar okos, akantha okossa kaju se rabbang e baba’anna polo’.

²¹ Mardha rabbang mon ekenneng nyabana; apoy rabbang kalowar dhari colo’na.

²² Le’er budhina talebat kowadda, sapa se tatemmo tako’ sampe’ gujuden.

²³ Tadha’ bagiyan se lembu’ e kole’na; kabbi padha ban baja galina.

²⁴ Atena se akantha bato ta’ tao mangmang, koko gali akantha bato gilingan.

²⁵ Mon Lewiyatan jaga, oreng se paleng kowat sakale laju ngetter, ta’ bisa apa-rapa lantaran katako’en.

²⁶ Tadha’ peddhang se bisa maloka kole’na; badanna ta’ meddhas lembing, tombak otaba pana.

²⁷ Besse eanggep padha ban darameyan, dimbaga eanggep lembu’ akantha kaju se bucco’ etombuwi kolat.

²⁸ Ta’ ekenneng oddak ban pana; mon ekotep ban bato eanggep darameyan.

²⁹ Gada eanggep rebba kerreng salambar, mon oreng ngontallagi tombak ekala’-gella’.

³⁰ Sesse’ e tabu’na akantha belling se tajem konco’na, nyongkar tana lempong akantha nanggala.

³¹ Tase’ egaluy sampe’ padha ban aeng se ngalkal, akantha mennya’ se ngelbuk e dhalem kattha.

³² Lampadda sokona asonar tera’, aeng tase’ eoba daddi kapo’ se pote barnana.

³³ E attas bume tadha’ tandhinganna; mahlok jareya tadha’ tako’na.

³⁴ Keban se paleng raja ban kowat eanggep tadha’ argana; e antarana sakabbinna burun alas, jareya ratona."