Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kenca bage ngaloi TUHAN man Jop i bas angin meter nari.

² [Nina TUHAN,] "La kin kam tek kerna kepentarenKu? Ise kin kam maka pang kam melasken cakap bodoh bangKu?

³ Adi dilaki kin kam tuhu, jabap dage genduari penungkunenKu.

⁴ I je kin kam nai tupung Kutepa doni enda? Adi beluh kin, turiken bangKu jabapna.

⁵ Ise nai nentukenca belang doni enda? Adi tehndu kin, ise nai pegesteng tinali sibar-sibarna?

⁶ Kai palas binangunna? Ise si namaken palasna,

⁷ sanga bintang erpagi-pagi rende kerina, dingen malekat-malekat ersurak dem riahna.

⁸ Ise nutup pintu gerbang lawit gelah ula mambur, asum lau mulai erburak i bas beltek doni nari?

⁹ Aku me si nutupi lawit salu embun, janah Kutimpus salu kegelapen.

¹⁰ Kutetapken belangna, janah Kutambak alu pintu gerbang si lit eruk-erukna.

¹¹ Kukataken man lawit, 'Terjeng jenda ngenca! Galumbangndu si mehantu arus ngadi i jenda.'

¹² O Jop, kidekah geluhndu, pernah kin iperentahkenndu matawari pultak erpagi-pagi, jenari siang wari?

¹³ Pernah kin iperentahkenndu matawari pultak lako nangkap doni, jenari ngkisamken kalak jahat bas inganna cebuni nari?

¹⁴ Wari siang mahanca deleng ras berneh tangkas teridah, desken lipaten uis ras bekas setempel bas taneh dah.

¹⁵ Terangsa akap kalak jahat ngidah sinalsal matawari, si ngambati ia ngelakoken si la mehuli.

¹⁶ Pernah kin kam ku ulu lau i kelbung lawit? Pernah kin kam erdalan arah dasar lawit?

¹⁷ Pernah kin ituduhken kalak man bandu pintu gerbang, dalan ku doni kematen si gelap la teralang?

¹⁸ Asa kai kin akapndu belangna doni enda? Adi itehndu kin, turikenlah jabapna.

¹⁹ Itehndu kin i ja nari rehna terang? Janah kai sumbul kegelapen?

²⁰ Ngasup kam nuduhkenca apai balengna gelap ras terang ntah nuruhsa ka ku inganna mulihken?

²¹ Ugapa pe itehndu, perban nggo metua kal kam! Janah tupung doni enda ijadiken, nggo i je kam!

²² Pernah kin idahindu ingan pemunin ingan muniken baho ras salju,

²³ si Kusimpan guna paksa kesusahen bage pe guna paksa perang ras si musuhen?

²⁴ Pernah kin kam ku ingan i ja pultak matawari, tah pe ku ulu angin si rembus i Timur nari?

²⁵ Ise kin baluren man udan meder, janah si pekena dalan man kilap si erbinar?

²⁶ Ise mahanca udan ndabuh ku ingan si la iingani jelma, ras ku gurun pasir si la lit i je manusia?

²⁷ Ise kin namaken lau ku taneh kerah-kerah, seh maka dukut turah jadi meratah?

²⁸ Lau udan, lit kin bapana? Lau namur, ise petubuhsa?

²⁹ Ise kin nandena es batu, janah ise si mupusken salju,

³⁰ si nalihken lau jadi batu, dingen lau lawit jadi beku?

³¹ Ngasup kin kam meriksa Bintang Kartika, tah pe ngosari iketen Bintang Timur si Mbisa?

³² Ngasup kin kam petetap perdalanen bintang-bintang rikutken musimna, janah negu-negu bintang-bintang si galang ras kitik arah dalanna?

³³ Itehndu kin aturen-aturen langit? Banci kin ipakendu e guna ngaturken doni enda?

³⁴ Banci kin isergangndu embun, gelah udan meder ndabuh ku kam?

³⁵ Janah adi iperentahkenndu perkas ersora, nggit kin ia reh ndahi kam, nina, "Enda kami, suruhlah"?

³⁶ Ise ngatakenca man iblis ndigan Lau Nil banjir, janah ise nurikenca man manuk sabungen katawari reh udan meder?

³⁷ Ise kin kalakna si bage pentarna maka ngasup ia engkira embun, jenari engkisamkenca seh maka ndabuh udan,

³⁸ udan si mahanca abu salih jadi gulbak si piher?

³⁹ Ngasup kin kam erburu guna ndatken nakan man singa, jenari mesuri beltek anak-anakna,

⁴⁰ tupung ia cebuni i bas lubang gua, tah pe gempang i bas asarna?

⁴¹ Ise kin nikapken nakan man perik kak asum ia kabang-kabang ku jah ku jenda perban lihena, tupung anak-anakna mindo nakan bangKu?