Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saellana jareya dhari dhalem kaleng busbus PANGERAN adhabu kantha reya ka Ayyub,

² "Sapa ba’na, me’ bangal mangmang ka Tang kabicaksana’an, makalowar ca’-oca’ se budhu ban kosong kantha jareya?

³ Sateya adhebbi Sengko’, duduwagi ja’ ba’na lalake’, saodi kabbi se etanya’agi Sengko’ reya.

⁴ Apa ba’na la badha e bakto Sengko’ agabay bume ban saesena? Mon ba’na bannya’ pangataowanna, balai Sengko’ sateya! Apa ba’na tao jawabanna?

⁵ Sapa se nantowagi lebarra dunnya? Sapa se masang tale okoranna? Apa ba’na tao jawabanna?

⁶ Baramma lar-pelar tongkana bume me’ manjeng koko? Sapa se masang bato padduna?

⁷ E bakto pajjar tang-bintang anyanye abareng, ban lok-mahlok sowarga padha asorak kaperagen.

⁸ Sapa se notop labang nahan aeng tase’ raja, e bakto aeng kalowar dhari tabu’na bume?

⁹ Sengko’ se madhateng ondhem epangodhunge tase’, se abungkos tase’ epapetteng sampe’ ta’ etangale’e.

¹⁰ Sengko’ se nantowagi batessa tase’ raja, se masang labang se epalang sopaja aengnga ta’ ngalowa.

¹¹ Ca’na Sengko’, ‘Areya’ batessa ba’na, ja’ lebadi! Omba’na ba’na ambu gan dhinna’ bai.’

¹² Ayyub, ba’na ba’ taowa, maske pera’ sakaleyan e dhalem odhi’na, marenta’agi sopaja para’ seyang dhatengnga?

¹³ Ba’ taowa ba’na nyoro pajjar neggu’i bume, magundhek pangetegganna oreng jahat sampe’ kabbi padha kalowar?

¹⁴ Gunong ban cora etangale ce’ terrangnga polana tera’na seyang, akantha leppedanna juba ban eccap e lempong se leca’.

¹⁵ Tera’na seyang terrang gallu ka oreng se ta’ andhi’ Pangeran, daddi ta’ bisa ngalakone kakerrasan.

¹⁶ Ba’ taowa ba’na ka somber e dhasarra tase’? otabana lan-jalanan e dhasarra tase’ raja?

¹⁷ Ba’ taowa badha oreng noduwagi ka ba’na labang saketheng se raja e batessa alam maot se petteng calemodan?

¹⁸ Ba’ bisa’a ba’na ra-ngera lebarra dunnya reya? Mon pajat tao, mara jawab sateya keya.

¹⁹ Ba’ taowa ba’na dhari dhimma asalla terrang, ban e dhimma somber se madhateng petteng?

²⁰ Ba’ bisa’a ba’na nantowagi batessa terrang ban petteng, otaba nyoro terrang ban petteng ondur saellana dhateng?

²¹ Tanto bai ba’na bisa sabab ba’na la towa, ban e bakto bume reya ekagabay ba’na la badha e dhissa’!

²² Ba’ taowa ba’na maso’ ka Tang dhang-gudhang, panyaba’anna salju ban ojan bato

²³ se bi’ Sengko’ esempen kaangguy jaman malarat, kaangguy re-are e jaman paperrangan?

²⁴ Ba’ taowa ba’na are reya e dhimma bungkana, ban angen temor dhari dhimma asalla?

²⁵ Sapa se ngale li-giliyanna ojan raja, ban se aberri’ jalan ka galudhuk ban dhap-keddhap?

²⁶ Sapa se magili ojan ka ra-ara se tadha’ men-tamennanna ban ka tana se ta’ ekennengnge manossa?

²⁷ Sapa se nyerame tana se kerreng ban gali, sampe’ rebba nyenna kabbi?

²⁸ Apa ojan andhi’ eppa’? Ebbun reya sapa ramana?

²⁹ Apa es reya andhi’ ebu? Sapa se alahirragi ebbun se gali?

³⁰ Sapa se madaddi bato dhari aeng? Sapa se magali bagiyan attassa tase’?

³¹ Ba’ bisa’a ba’na agintel bintang Karteka, otabana malocot sambunganna bintang Belanti’?

³² Ba’ bisa’a bi’ ba’na tang-bintang etonton sabban mosemma, bintang Biduk raja ban kene’ etantowagi jalanna?

³³ Apa ba’na tao ka kom-hokom se ngator langnge’? Ba’ bisa’a ba’na ngangguy kom-hokom jareya e bume?

³⁴ Ba’ bisa’a ba’na aera’ marenta ondhem, nyoro madhateng ojan sampe’ banjir notobi kennengnganna ba’na?

³⁵ Mon ba’na nyoro kelap patang galirap, apa kerana lap-kelap jareya dhateng sarta nyaoda, ‘Mator sandika, Guste’?

³⁶ Mano’ ibis tao dhari sapa bila Songay Nil ngalowa’a aengnga? Ajam lake’ tao dhari dhimma ja’ ojan bakal dhatengnga?

³⁷ Sapa se ce’ penterra sampe’ bisa ngetong ondhem e langnge’, ban abalik ondhem jareya sampe’ toron ojan aeng,

³⁸ ojan se magali abu ban tana sampe’ apel-kempel?

³⁹ Ba’ taowa ba’na aburu mamangsan kaangguy pakanna macan, otabana makennyang tabu’na dhu’-budhu’na,

⁴⁰ mon macan jareya teppa’na ngetek e dhalem guwana, otabana dhep-ngendhep e dhalem rongkangnga?

⁴¹ Sapa se makane dhangdhang se kalaparan, se ngabber san-kassannagi nyare kakan? Sapa se nolong dhu’-budhu’na, mon ok-kaogan ka Sengko’ menta pakan?