Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nampa a’bicaramo Batara battu lalang ri anging lompoa mae ri Ayub, Nakana,
2 "Inaiko antu, nubarani kamma ranggasela ri kacara’dekangKu lalang ri anjo bicara dongo’nu siagang tenaya bonena?
3 Kamma-kamma anne dallekamMa’ sangkammako bura’ne, siagang pialimi anne sikamma pakkuta’nangKu.
4 Nia’ memang makoka ri wattunna Kupa’jari linoa? Punna jai padeng pangngassengannu, pauamMa’!
5 Inaika ampattantui luara’na linoa? Inaika angngukkuruki siagang otere’? Maka nuassengi pappialinna?
6 Antekamma batena najarre’ ammenteng benteng-benteng pattumpa’na linoa? Inai ampadongkoki batu pundasi tangnga majarre’,
7 ri wattu akkelong sikamma bintoeng bari’basaka siagang akkio’ rannu sikamma apa attallasaka ri suruga?
8 Inaika antongkoki pakke’bu’na untu’ antahangi je’ne’ tamparanga, ri wattunna assulu’ je’neka battu lalang ri battanna buttaya?
9 INakkemi ampayungi tamparanga siagang rammang, anrokoki siagang sassang.
10 INakke ampattantui pa’baeng-baenna tamparanga lompoa siagang antahangi je’ne’na siagang pakke’bu’ ta’joli.
11 Kukana ri ia, ‘Iaminne pa’baeng-baenna. Teako lalloi! Anrinni musti ammantang sikamma bombang lomponu.’
12 He, Ayub, maka le’bakko manna sikalija bawang assuroi battu subu-subua?
13 Le’bakko assuroi alloa anta’galaki buttaya siagang nabe’besang tau ja’dalaka battu ri tampa’ paccokkoanna ke’nanga?
14 Singara’na alloa ampa’nassai nicini’na monconga siagang ka’bunga sanrapang sitempele’ ri butta pi’ siagang ri juba nilappaka.
15 Ta’lalo singara’na alloa mae ri tau tenaya Batarana, na natahang ke’nanga anggaukangi katerassanga.
16 Maka le’bakko naung ri kabattuanna siagang dapara’na tamparanga? Le’bakko a’jappa-jappa ri dapara’na tamparang lompoa?
17 Niakka tau le’ba’ ampicinikiangko pakke’bu’ lompoa ri dallekanna lino kamateang sassang makkapuka?
18 Maka akkulleko angkira-kirai luara’na linoa? Appiali mako punna nuassengi.
19 Maka nuassengi battu kemae anjo singaraka? Siagang kemae sitojenna kabattuanna sassanga?
20 Maka akkulleko ampattantui pa’baeng-baenna sassanga siagang singaraka? Yareka ansuroi ke’nanga ammotere’ punna niaki battu?
21 Tantu akkulleko, lanri toa mako, siagang lanri nia’ memang mako, ri wattunna nipa’jari linoa!
22 Le’bakkako mange angkunjungi gudang-gudangKu tampa’ je’ne’ eska siagang je’ne’ batua,
23 Kuboli’ untu’ wattu kasukkarang, untu’ wattu pa’bundukang siagang passibuno-bunoang?
24 Maka nuassengi tampa’ pammantanganna mataalloa? Yareka battu kemae assala’na anging battu rayaya?
25 Inaika ampangngekeangi kaloro’ bosi lompoa siagang assarei oloang gunturuka siagang kilaka?
26 Inaika appaturung bosi ri parang lompoa, siagang ri tompo’na butta napammantangia rupataua?
27 Inaika ansirangi butta kalotoroka siagang ta’ronanga sa’genna accu’la ngaseng sikontu timbo-timboanga?
28 Apaka nia’ mangge tangka’na bosia? Inai bapa’na atti’-atti’na je’ne’ saliuka?
29 Apaka nia’ amma’na je’ne’ eska? Inai allassukangi saliu’ a’batua?
30 Inai ampinrai je’neka a’jari batu, siagang ampa’jari ka’doroki tompo’na tamparanga?
31 Maka akkullei nusikko’ akkawarrang bintoeng Kartikaya? yareka nula’gasa’ passikko’na bintoeng Belanti’?
32 Maka akkulleko angngului sikamma bintoenga ri wattunna, siagang nupattantu oloanna bintoeng Bidu’ lompoa siagang ca’dia?
33 Maka nuassengi sikamma hukkunga ri langika? siagang akkullei nugaukang ri anne linoa?
34 Akkulleko ampakkiokangi parentaya mae ri rammanga, siagang napiturungiko bosi lompo?
35 Siagang punna nusuro akkila’-kila’ kilaka, maka battui ke’nanga angkana, "Iye’ karaeng!"?
36 Battu kemae naasseng jangang-jangang ibisi’ angkana ringngapanna nalanai’ je’neka ri Binanga Nil? Inai ampauangi jangang lakia angkana labattui bosia?
37 Inai ganna’ cara’de’na anrekengi rammanga nampa nabulinta’ sollanna turung bosia,
38 bosi ampakaterasakai limbu’buka na’jari peo’ siagang buttaya nassidakki’-dakkiki?
39 Akkullekoka ampangngondangangi singaya untu’ kanrena, ampakabassoroki battanna ana’-ana’na,
40 punna a’la’lang ke’nanga ri kali’bonna yareka ammantang ke’nanga ri pa’ru’munganna?
41 Inai ambantui jangang-jangang kalaa’ cipuruka anri’baka ri kere-keremae a’boya kanre? Siagang inai todong antulungi punna ammarrang ana’-ana’na mae ri nakke appala’ kanre?
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA