Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai luar ma ganup halak Israel, hun Dan das hu Barseba sonai homa hun tanoh Gilead; martumpu ma tumpuan ai, songon sada halak hu lobei ni Jahowa i Mispa.
2 Jadi jongjong ma kopala ni ganup bangsa Israel mar sasamarga mambobahon kuria ni bangsa ni Naibata, ompat ratus ribu halak bilanganni, mardalan nahei, na marsinjatahon podang.
3 Ibogei halak Benjamin ma, paboa na dob tangkog halak Israel hu Mispa. Nini halak Israel ma, “Patugah ma sonaha parjadi ni hajahaton ai.
4 Nini halak Levi, paramangon ni puang-puang na tarbunuh ai ma mambalosi, ʻDas ma ahu pakon parinangonku hu Gibea, huta ni halak Benjamin, sihol marborngin ijai namin.ʼ
5 Dob ai jongjong bei ma par Gibea dompak ahu, anjaha iinggoti sidea ma rumah ai borngin laho mandorab ahu; itahihon uhur ni sidea do sihol mambunuh ahu, anjaha iparseda do parinangonku pala matei.
6 Hubuat ma parinangonkai, hutoktoki ma ia anjaha hupantongoskon ma hu ganup tanoh parbagianan ni halak Israel, halani na so adat pakon hasamboron do na binahen ni halak ai i tongah-tongah ni halak Israel.
7 Tonggor ma, haganup nasiam halak Israel ijon do nuan. Bere nasiam ma partimbangan nasiam pakon sipasingat nasiam.”
8 Jadi jongjong ma ganup bangsa ai, hira sada halak mangkatahon, “Seng bulih barang ise hun banta laho hu lampolamponi, sahalak pe lang bulih mulak hu rumahni.
9 On pe, pasal sibahenonta hubani Gibea, marruji-ruji ma hita laho mamorang sidea.
10 Buat hita ma sapuluh halak humbani na saratus humbani ganup marga ni Israel, anjaha saratus humbani na saribu, anjaha saribu humbani na salaksa, laho pasirsir bohal hubani na mabuei on, ase rohkonsi sidea bahenon ma hubani Gibea-Benjamin romban hu bani hasamboron, na binahen ni sidea ai i tongah-tongah ni halak Israel.”
11 Sonai ma martumpu ganup halak Israel mangimbang huta ai, martumpu songon sada halak.
12 Dob ai isuruh marga-marga ni Israel ma suruhanni hubani marga Benjamin mangkatahon, “Hajahaton aha do na masa i tongah-tongah nasiam in?
13 On pe, ondoskon nasiam ma dalahi, paruhur na jahat na i Gibea in, ase ibunuh hanami sidea, laho mamurpurhon sapata ni hajahaton in hun tongah-tongah ni Israel.” Tapi seng itangihon halak Benjamin hata ni sanina-saninani, halak Israel ai.
14 Lambin martumpu tene halak Benjamin hun huta na legan hu Gibea, laho marporang dompak halak Israel.
15 Tarbilang halak Benjamin sadarini ai hun huta na legan ai: dua puluh onom ribu halak, na marsinjatahon podang, seng ipadihut parhuta Gibea, na tarbilang pitu ratus dalahi na pinilih.
16 Humbani ganup na mabuei ai adong pitu ratus dalahi na tarpilih, halak parjaluk; ganup do sidea pandei mangumbalangkon batu na so ongga pilit ronsi sada jambulan pe.
17 Tapi halak Israel, seng ipadihut halak Benjamin, ompat ratus ribu halak do bilanganni, na marsinjatahon podang, haganupan ai halak parporang do.
18 Bingkat ma halak Israel laho hu Betel, laho manungkun Naibata, nini ma, “Ise do hun bennami mambobahon laho marporang dompak halak Benjamin? Balos ni Jahowa, ʻHalak Juda do na parlobei.ʼ
19 Jadi girah sogod bingkat ma halak Israel, anjaha marsaran ma sidea mangkubu Gibea.”
20 Dob ai luar ma halak Israel laho marporang dompak halak Benjamin; iatur halak Israel ma barisan ni bala ni sidea mangimbang sidea dohorhon Gibea.
21 Luar homa ma halak Benjamin hun Gibea, gabe radag ma sadarini ai dua puluh dua ribu halak Israel ibunuh sidea.
22 Tapi patumpu gogoh ma use bala ni Israel, lanjar iatur sidea ma use barisan ni bala ni sidea bani ianan ni sidea hinan.
23 Dob ai tangkog ma halak Israel, jadi doruh-doruh ma sidea i lobei ni Jahowa das ronsi bodari; isungkun sidea ma Jahowa, “Bulih ope ulakonnami marporang dompak halak Benjamin, angginami ai? Balos ni Jahowa, ʻTangkog ma hanima mandorab sidea.ʼ
24 Jadi patarni ai idohori halak Israel ma halak Benjamin.”
25 Luar homa ma halak Benjamin hun Gibea manjumpahkon sidea bani ari na paduahon ai; radag use ma halak Israel sapuluh ualuh ribu halak ibunuhi halak Benjamin; haganupan ai halak na marsinjatahon podang do.
26 Dob ai tangkog use ma halak Israel rap pakon ganup bangsa ai hu Betel anjaha doruh-doruh; hundul ma sidea ijai i lobei ni Jahowa, anjaha marpuasa sadarini ai das ronsi bod ari, lanjar manggalangkon galangan situtungon pakon galangan pardameian i lobei ni Jahowa.
27 Isungkun halak Israel ma Jahowa bani panorang ia, ijai do poti parpadanan ni Naibata,
28 anjaha si Pinehas anak ni si Eleasar, anak ni si Aron do na gabe malim ijai -- nini sidea ma, “Bulih ope ulakonnami bingkat marmunsuh dompak halak Benjamin, angginami ai, barang parontihononnami ma? Nini Jahowa ma mambalosi sidea, ʻTangkog ma hanima, patar ondoskonon-Ku ma sidea hubagas tanganmu.ʼ
29 Dob ai isuruh halak Israel ma halak monggop inggot Gibea.”
30 Jadi tangkog ma halak Israel patolu-ariankon dompak halak Benjamin, anjaha iatur ma barisanni dompak Gibea songon na dob salpu.
31 Luar ma halak Benjamin manjumpahkon bangsa ai; hona pinah ma sidea hun huta ai hu dalan na bolon, na laho dompak Betel sada, na sada nari dompak Gibea, anjaha ipungkah sidea ma mambunuh halak Israel songon na dob salpu hira-hira tolu puluh halak bani ladang ai.
32 Jadi nini halak Benjamin ma, “Domma radag sidea i lobeita songon bani mungkahni ai.” Tapi domma manriah hinan halak Israel: Lintun ma hita laho maminah sidea hu dalan na bolon.
33 Dob ai jongjong ma ganup halak Israel hun iananni, anjaha iatur ma barisanni i Baal-Tamar; luar ma homa halak Israel pangonggopi ai humbani iananni hu ianan na lumbang dohorhon Geba hampit hasundutan ni Gibea.
34 Anjaha bingkat ma sapuluh ribu jolma pilihan humbani halak Israel mandorab Gibea, gabe jobu tumang ma parporangan ai; tapi lang ibotoh halak Benjamin na dohor ma hamagouan mangonai sidea.
35 Jadi italuhon Jahowa ma halak Benjamin na mangimbang halak Israel, gabe radag ma sadarini ai humbani halak Benjamin dua puluh lima ribu saratus halak, ganupan halak na marsinjatahon podang.
36 ididah halak Benjamin ma na dob talu sidea. Maporus ma halak Israel i lobei ni halak Benjamin, ai domma marhatengeran sidea bani halak panggompangi, na sinuruh ni sidea laho mandorab Gibea.
37 Dob ai ioloskon na manggompangi ai ma mandorab Gibea, maju ma sidea, anjaha itampuli ma parhuta ai bani podang.
38 Tanda na dob niriahkon ni halak Israel pakon halak panggompangi ai, ai ma, anggo domma maripul timus na banggal ibahen sidea hun huta ai,
39 maningon marhusor ma sidea marporang. Domma ipungkah halak Benjamin mangonjar halak Israel, anjaha ibunuhi hira-hira tolu puluh halak humbani halak Israel, nini sidea ma, “Domma talu tumang sidea use marimbang hita songon bani parporangan na parlobei ai.”
40 Tapi dob mamungkah maripul hu atas tanda timus ai hun huta ai, mangkawah ma halak Benjamin hu pudi; tonggor ma, domma matutung ganup huta ai anjaha apuyni martimpul hu atas.
41 Dob ai marhusor ma halak Israel, gobir ma halak Benjamin, ai domma ididah sidea dohor ma hamagouan bani sidea.
42 Jadi maporus ma sidea hun lobei ni halak Israel dompak halimisan; tapi seng tarlembangi sidea parporangan ai, anjaha halak na roh hun huta ai marraseihon sidea, sagala na i tongah-tongah ni sidea.
43 Iinggoti sidea ma halak Benjamin, ipardakdak ma sidea anjaha iluntak-luntak das ronsi tontang ni Gibea hampit hapoltakan.
44 Jadi radag ma humbani halak Benjamin sapuluh ualuh ribu halak, ganupan halak na bisang.
45 Dob ai marhusor ma sidea, maporus dompak halimisan hu Dolog batu Rimon; lima ribu halak humbani sidea rasei i dalan na bolon ai, anjaha ipardakdak do sidea das hu Gideon, anjaha ibunuh do humbani sidea dua ribu halak.
46 Ase ganup jolma na rasei humbani halak Benjamin sadarini ai dua puluh lima ribu halak do, na marsinjatahon podang, anjaha ganupan ai halak na bisang do.
47 Tapi onom ratus halak do na marhusor anjaha na maporus hu halimisan das hu Dolog batu Rimon, lanjar marianan i Dolog batu Rimon ompat bulan dokahni.
48 Dob ai mulak ma halak Israel hubani halak Benjamin, anjaha itampuli ma sidea bani podang, jolma pakon pinahan pakon sagala na jumpah sidea. Anjaha sagala huta na dapot sidea itutung sidea do.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA