Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Daddi ommat Isra’il laju padha dhateng kabbi dhari Dan e bagiyan dhaja sampe’ ka Bersyeba e bagiyan lao’, ban Gileyad e temor, polana se padha eolok eajaga aparembagan jareya. Kabbi padha akompol e Mizpa e ajunanna PANGERAN.
2 Bannya’na kabbi pa’ ratos ebu tantara se ajalan soko. Pamimpinna saneyap suku bangsa Isra’il dhateng keya ka jadhiya.
3 Sabatara jareya suku Benyamin la ngedhing ja’ oreng Isra’il se laen la akompol e Mizpa kabbi. Reng-oreng jareya atanya ka oreng Lewi se sellerra epate’e jareya. "Tore careta’agi, kadi ponapa caretana kajahadan ganeka!"
4 Saodda oreng Lewi jareya, "Kaula sareng seller kaula nyepper ka Gibeya e baba kakobasa’anna suku Benyamin, pas kelem e ka’issa’.
5 Neng-oneng e baja malem reng-oreng Gibeya padha dhateng nyare’e kaula. Pangenebban kaula ekeppong; kaula epateyana. Namong daddina seller kaula elakone ekambuli’i kantos mate.
6 Daddi bi’ kaula mayyidda ekala’ laju ethok-ketthok, pas ekerem ka dhubellas suku e dhalem bangsa kaula; saneyap suku ekereme settong ebang. Kan melana bi’ kaula epasapaneka lantaran reng-oreng Gibeya ganeka ngalakone barang se jahat sareng matodhusan e antarana ommat Isra’il.
7 Sampeyan sadajana se badha e ka’iya paneka oreng Isra’il. Daddi samangken kaula nyo’ona partembanganna sampeyan!"
8 Reng-oreng se akompol e jadhiya laju padha manjeng abareng sarta ngoca’, "Kaula sadaja padha ta’ palemana ka compo’ otabana ka kemah.
9 Samangken sapaneka: Tore ellot, kaangguy nantowagi pasera se kodu nyerrang Gibeya.
10 Saparpolonna lalake’an Isra’il kodu nyadhiya’agi teddha’an kaangguy reng-oreng se aperrang. Se laen nyerrang ka Gibeya ngokom reng-oreng e ka’issa’ lantaran kajahadanna se elakone e antarana ommat Isra’il."
11 Daddi ommat Isra’il saroju’ nyerrangnga Gibeya.
12 Saellana jareya ommat Isra’il ngotos reng-oreng ka saanterona baba kakobasa’anna suku Benyamin manapa’ kabar reya, "Kajahadan apa se kalakon e dhinna’ reya?
13 Mara passra’agi ka sengko’ reng-oreng se bejjat dhari Gibeya jareya, bi’ sengko’ epateyana sopaja mosna’a kajahadan jareya dhari antarana Isra’il." Tape oreng Benyamin ta’ parduli ka oca’na reng-oreng Isra’il se laenna jareya.
14 La’-mala’ dhari sakabbinna kottha e baba kakobasa’anna Benyamin jareya reng-oreng Benyamin padha entar ka Gibeya aperranga ban reng-oreng Isra’il laenna gella’.
15 Dhari tha-kotthana epakompol tantara se bannya’na nem lekor ebu oreng. Salaenna jareya oreng Gibeya dibi’ la makompol oreng peleyan bannya’na pettong atos oreng. Kabbi padha oreng kidal se ahli e dhalem ngoteppagi bato ngangguy omban. Mon reng-oreng jareya ngomban, ta’ tao leccer maske sakone’a.
16 (20:15)
17 Dineng reng-oreng Isra’il laenna la makompol parjurit se la elate epagu-onggu bannya’na pa’ ratos ebu oreng.
18 Tantarana ommat Isra’il jareya entar ka kennengnganna kabakteyan e Betel, laju atanya ka Allah, "Guste, suku se ka’dhimma e antarana bangsa abdidalem se kodu entar nyerrang oreng Benyamin kaadha’?" Dhabuna PANGERAN, "Suku Yehuda."
19 Kalagguwanna reng-oreng jareya mangkat sarta akemah e seddi’anna kottha Gibeya.
20 Angkadan perrangnga eator epangadhep ka kottha jareya, pas nyerrang.
21 Angkadan perrangnga Benyamin kalowar dhari kotthana ban e are jareya keya ngenneng mate’e tantara Isra’il dhu lekor ebu oreng.
22 Polana se kala jareya, ommat Isra’il entar ka kennengnganna kabakteyan pas nanges ka PANGERAN e jadhiya sampe’ malem. Reng-oreng jareya atanya, "GUSTE, ponapa abdidalem kodu mangkat pole merrange tan-taretan suku Benyamin?" Dhabuna PANGERAN, "Iya, kassa’ mangkat." Daddi angkadan perrangnga Isra’il laju samangat pole, pasukanna pas eator akantha e are se dha’-adha’.
23 (20:22)
24 Angkadan perrangnga Isra’il jareya nyerrang angkadan perrangnga Benyamin kadhukaleyanna.
25 Ban angkadan perrangnga Benyamin kalowar nyerrang pasukan Isra’il kadhukaleyanna keya. Se kadhukaleyanna jareya angkadan perrangnga Benyamin ngenneng mate’e tantara Isra’il se la elate bannya’na ballu bellas ebu oreng.
26 Ommat Isra’il laju entar pole ka Betel ban nanges ka PANGERAN. E jadhiya reng-oreng jareya apowasa sampe’ malem ban ngatorragi kurban karokonan ban kurban obbaran ka PANGERAN.
27 E jaman jareya Petthe Parjanjiyanna Allah badha e Betel, ban Pinehas pottrana Eleyazar, bajana Harun, daddi imam e jadhiya. Ommat Isra’il laju atanya ka PANGERAN, "Adhu, GUSTE, ponapa abdidalem kodu mangkat pole merrangana tan-taretan suku Benyamin, otabana ponapa abdidalem kodu padha ambu ta’ nerrossagi paperrangan ka’dhinto?" Dhabuna PANGERAN, "Kassa’ mangkat pole! Lagguna ba’na epamennanga bi’ Sengko’."
28 (20:27)
29 Ngedhing dhabuna PANGERAN se kantha jareya reng-oreng Isra’il laju ngator tantarana se esaba’ epangetek e ngan-kennengngan se ta’ etangale’e oreng e sabingkerra Gibeya.
30 Saellana jareya e are se kapeng tello’ reng-oreng jareya laju nyerrang angkadan perrangnga Benyamin; e bakto jareya pasukan Isra’il eator epangadhep ka Gibeya akantha e bakto se nyerrang pasukan sabellunna.
31 Reng-oreng Benyamin kalowar alabana, ban ekenneng panceng kalowar dhari kottha. Akantha re-are sabellunna, reng-oreng Benyamin molae mate’e reng-oreng Isra’il e dhaera se tabukka’ e lowar kottha e lorong se ka Betel ban e lorong se ka Gibeya. Badha tello polo oreng Isra’il se epate’e.
32 Daddi reng-oreng Benyamin nyangka la mennang ka reng-oreng Isra’il akantha se dha’-adha’na. Tape tantara Isra’il pajat etengnget nyorot polana mancenga reng-oreng Benyamin sopaja tantara Benyamin kalowar ka rong-lorong raja, jau dhari dhalem kottha.
33 E bakto pasukan intina Isra’il nyorot, ban ngator barisanna pole e Ba’al-Tamar, reng-oreng Isra’il se esaba’ e sabingkerra Gibeya duli kalowar dhari pangetegganna e dhaera se bannya’ gumo’ batona e lowarra kottha.
34 Reng-oreng jareya peleyan dhari sakabbinna oreng Isra’il; bannya’na sapolo ebu oreng. Perrangnga talebat rajana e bakto oreng Isra’il se sapolo ebu oreng jareya nyerrang Gibeya. Reng-oreng Benyamin ta’ nyangka sakale ja’ para’ kala’a.
35 Bi’ PANGERAN reng-oreng Isra’il epamennang ka oreng Benyamin, sampe’ e are jareya oreng Isra’il ngenneng mate’e sagame’ ebu saratos oreng tantara Benyamin.
36 E bakto jareya reng-oreng Benyamin buru apangrasa ja’ aba’na la kala. Pasukan intina Isra’il pajat etengnget buru dhari reng-oreng Benyamin sabab nyagerragi tantarana se badha e pangetegganna e sabingkerra Gibeya.
37 Reng-oreng se ngetek jareya laju padha duli maso’ nyerrang Gibeya; reng-oreng jareya padha mencar ka man-dhimman e dhalem kottha jareya ban mate’e sakabbinna oreng se badha e jadhiya.
38 Tape reng-oreng Isra’il jareya sabellunna la padha ajanji ja’ mon badha okos ngebbul ka attas dhari nga’-tengnga’anna kottha,
39 pasukan inti se nyorot gella’ kodu abali merrange moso. E bakto jareya reng-oreng Benyamin la ngenneng mate’e oreng Isra’il tello polo oreng bannya’na ban padha nyangka la makala reng-oreng Isra’il akantha se dha’-adha’na.
40 Tape o-tao dhari nga’-tengnga’anna kottha Gibeya laju ngebbul okos. Reng-oreng Benyamin takerjat e bakto atole nangale’e kotthana la katonon kabbi.
41 Ban e bakto jareya keya pasukan intina Isra’il se buru gella’ laju padha abalik nyerrang, sampe’ tantara Benyamin daddi gupo sabab apangrasa ja’ aba’na tanto kala.
42 Daddi, reng-oreng jareya padha buru ka ra-ara beddhi nyenglae oreng Isra’il, tape padha ta’ ngenneng lolos. Reng-oreng Benyamin jareya takeppong e antarana pasukan intina Isra’il ban pasukan se e bakto jareya teppa’na kalowar dhari dhalem kottha. Reng-oreng Benyamin nyandhang kakala’an se talebat rajana.
43 Reng-oreng Isra’il ngeppong sarta terros nyerser reng-oreng Benyamin jareya sampe’ ka settong kennengngan e temorra Gibeya. Sambi nyerser, reng-oreng Isra’il mate’e
44 ballu bellas ebu oreng se la massa’ lateyanna e dhalem angkadan perrangnga Benyamin.
45 Tantara Benyamin se laenna abali laju buru lebat e ra-ara beddhi ka nong-gunong bato e Rimon. E antarana reng-oreng se buru jareya, lema ebu oreng ekenneng pate’e e tengnga lorong. Se laen eserser terros sampe’ ka Gideyom. Dhari reng-oreng jareya badha dhu ebu se ekenneng pate’e.
46 Daddi, tantarana Benyamin se epate’e e are jareya badha sagame’ ebu oreng; kabbi padha tantara se soga’ tor bangalan.
47 Tape e antarana reng-oreng se buru lebat e ra-ara beddhi entara ka nong-gunong bato e Rimon badha nem atos oreng se lolos. Reng-oreng jareya enneng e Rimon pa’ bulan abidda.
48 Saellana jareya reng-oreng Isra’il abali pole nyerrang ban mate’e sakabbinna re-karena oreng Benyamin, lake’ bine’, na’-kana’ sarta keban. Tha-kottha e dhaera jareya bi’ oreng Isra’il eobbar kabbi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA