Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jari battumi sikontu umma’ Israel, battu ri Dan bageang wara’ sa’genna Bersyeba bageang timboro’, na Gilead bageang iraya untu’ ambantui anjo pakkioka. A’rappummi siagang asse’remi ke’nanga ri Mizpa ri dallekanNa Batara.
2 Yangasenna nia’ 400.000 tantara a’jappa bangkeng. Sikamma pamimpinna massing sukua ri bansa Israel hadere’ ngaseng tongi anjoreng.
3 Lalanna anjo wattua nalangngere’mi suku Benyamin angkanaya niaki bansa Israel maraenga a’rappung ri Mizpa. Jari akkuta’nammi tu Israel mae ri anjo tu Lewi nibunoa baine piarana angkana, "Carita sai bedeng mae ri kambe antekamma kajarianna anjo gau’ ja’dalaka!" Appialimi anjo tu Lewia angkana, "Inakke siagang baine piaraku assengka’ ri Gibea, ri daerana tu Benyamin, nakua’bangngi anjoreng.
4 (20:3)
5 Nampa battu anjo tu Gibeaya ri wattu bangngina amboya’. Nalipungi balla’ pa’bangngiangku lanri eroki ke’nanga ambunoa’, mingka kale’bakkanna baine piaraku naalle napassa nagau’ sala ke’nanga sa’genna mate.
6 Nampa kualle maya’na kukerek-kere’, nampa kukiring mae ri sampuloa anrua suku bansata massing tassikere’. Nakuppakamma anjo, lanri a’gau’ ja’dala’na siagang appakasiri’na anjo tu Gibeaya ri tangnga-tangngana umma’ Israel.
7 Ikau ngaseng niaka anrinni tu Israelko. Jari Kamma-kamma anne kupalaki antekamma panggappanu!"
8 Appada-padami ammenteng anjo tau niaka a’rappung na para nakana, "Ikatte ngaseng anne tena nia’ lammotere’ mae ri kemaya yareka ri balla’.
9 Iaminne lanigaukang: Umba ammuang loterei untu’ ampattantui angkana inai musti maju ambunduki Gibea.
10 Bage sampulona sikontu tu bura’ne niaka ri Israel musti appasadiai kanre untu’ tau mangea a’bundu’. Maraenganga a’lampai mange ambunduki Gibea nampa nahukkung ke’nanga lanri kaja’dallang le’baka nagaukang ke’nanga ri tangnga-tangngana umma’ Israel."
11 Kammaminjo nassamaturu’mo umma’ Israel untu’ ambunduki Gibea.
12 Le’baki anjo akkirimmi umma’ Israel siapa are tau mange ri sikontu daerana suku Benyamin untu’ ampabattui anne kabaraka, angkanaya, "Kaja’dallang apa anne kajarianga ri kau ngaseng?
13 Passareangi anjo sikamma tau banna’ battua ri Gibea mae ri kambe sollanna napaccappu’ ikambe kaja’dallang kammaya anjo ri tangnga-tangngana Israel." Mingka tanajampangiai tu Benyamin anjo kananna tu Israel maraenganga.
14 Ba’lalo battu ngasemmi tu Benyamin niaka ri kota-kota daerana Benyamin mange ri Gibea untu’ ambunduki tu Israel maraenganga.
15 Anjo alloa a’rappummi ke’nanga battu ri kota-kotana ke’nanga 26.000 tantara. Na pantaranganna anjo nia’ tommo 700 tau nipilena Gibea a’rappung. Yangasenna sangnging tau kairi siagang sanna’ cara’de’na ammake patte’. Punna ammatte’ ke’nanga, tena nale’ba’ sala.
16 (20:15)
17 Na ri tu Israel maraenganga a’rappummi nia’ 400.000 tantara sangnging tau le’ba’ nilati.
18 A’lampai anjo tantarana umma’ Israel mange ri tampa’ ibadaya ri Betel, nakkuta’nang ri Allata’ala angkana, "O, Batara, suku kereanga battu ri kambe musti uru-uru maju ambunduki tu Benyamin?" Appialimi Batara angkana, "Suku Yehuda."
19 Ammukona bari’basa’ a’lampami ke’nanga nampa akkema ri ampi’na kota Gibea.
20 Napasidallekammi barisang pabundu’na ke’nanga mae ri anjo kotaya, nampa nabunduki.
21 Jari assulu’ tommi tantarana tu Benyamin maju a’bundu’, na nabunomo tantarana tu Israel anjo memang alloa nia’ 22.000.
22 Lanri nibetana, a’lampami umma’ Israel mange ri tampa’ ibadaya angngarru’ ri dallekanNa Batara anjoreng sa’genna bangngi. Akkuta’nangi ke’nanga angkana, "O, Batara, maka musti a’lampaiji ikambe mange ambunduki anjo tu Benyamin sari’battanna ikambe?" Appialimi Batara angkana, "Iyo, a’lampamako." Lanri kammana, lompomi pole sumanga’na tantara Israel, sanggenna naatoro’mi ke’nanga ammotere’ pasukanna sangkamma ri pakaramulanna.
23 (20:22)
24 Makapinruanna a’lampa ke’nanga ambunduki anjo tantarana tu Benyamin.
25 Nassulu’mo pole makapinruanna tu Benyamin a’bundu’. Anjo wattua nia’ 18.000 tantara le’ba’na nilati tu Israel nabuno.
26 Jari a’lampami pole umma’ Israel mange ri Betel nampa angngarru’ mae ri Batara. Anjoreng appuasai ke’nanga sa’genna bangngi siagang assarei koro’bang passiamakkang na koro’bang nitunu mae ri Batara.
27 Anjo wattua niaki Patti ParjanjianNa Allata’ala ri Betel, na Pinehas ana’na Eleazar, cucunna Harun, tugasa’ a’jari imang. Jari akkuta’nammi umma’ Israel mae ri Batara angkana, "O, Batara, maka musti a’lampaiji ikambe mange ambunduki anjo tu Benyamin, sari’battanna ikambe, yareka musti nipammarimi anne pa’bundukanga?" Appialimi Batara angkana, "Bunduki ke’nanga! Ammuko laKusareko pammetang."
28 (20:27)
29 Nalangngere’na anjo pappialinNa Batara, naboli’mi tu Israel tantarana ri tampa’-tampa’ taccokkoa ri ampi’na Gibea.
30 Nampa ri makatalluna alloa, nabundukimi tantarana tu Benyamin, napasidallekang pasukanna ke’nanga mange ri Gibea sangkamma allo-allo allaloa.
31 Battu tommi a’bakka a’bundu’ anjo tu Benyamin, na nieppang ke’nanga assulu’ battu ri kotaya. Kamma ri le’baka, appakkaramulami ke’nanga nabuno tu Israel niaka ri daera tassungkea ri pantaranganna kotaya, ri oloang mangea ri Betel siagang ri oloang mangea ri Gibea. Nia’ tallumpulo tu Israel nibuno.
32 Lanri kammana, nakapangi tu Benyamin angkanaya nabetami anjo tu Israel sangkamma allo le’ba’ allaloa. Mingka le’ba’mi narancanakang tantara Israel untu’ ammunduru’ sollanna naeppang anjo tantarana tu Benyamin mange ri agang-agang lompoa, bellaya battu ri kotaya.
33 Ri wattunna ammunduru’ pasukang lomoro’ se’rena tu Israel, na nasusung pole barisang pasukanna ri Baal-Tamar, anjo pasukanna ke’nanga niaka naboli’ ri ampi’na Gibea, assulu’mi linta’ battu ri paccokkoanna ke’nanga ri daera pantaranganna kotana.
34 Anjo ke’nanga sangnging tau nipile battu ri sikontu Israel; jaina nia’ 10.000 tau. A’jarimi pa’bundukang sannaka suara’na ri wattunna maju anjo tau 10.000 jaina ambunduki Gibea. Tena sikali nasanna-sannai tu Benyamin angkanaya tasalloami nanibeta ke’nanga.
35 Nasaremi Batara pammetang anjo tu Israel mae ri tu Benyamin, sa’genna anjo alloa nia’ 25.100 tantara Benyamin nabuno ke’nanga.
36 Nampami naasseng kalenna tu Benyamin angkanaya nibetami ke’nanga. Pasukang lomoro’ se’rena Israel nakunjungi lari ambokoi tu Benyamin lanri napattoangi ke’nanga tantarana niaka ri tampa’ paccokoanga ri ampi’na Gibea.
37 Anjo sikamma tau accokkoa akkaro-karoi antama’ nabunduki Gibea; nabagei kalenna ke’nanga ri kere-keremae lalang ri kotaya na nabuno sikontu tau niaka anjoreng.
38 Mingka le’ba’mi assamaturu’ la’bi riolo ke’nanga, angkanaya punna nia’ umbu kapala’ nai’ battu ri tangnga-tangngana anjo kotaya,
39 anjo pasukang lomoro’ se’rea ammunduruka musti a’gilingi nampa nabakkai nabunduki musua. Anjo wattua tu Benyamin le’ba’mi nabuno nia’ 30 tau tantara Israel na nakapangi ke’nanga angkanaya nabetami pole tu Israel kamma riolongannaya.
40 Mingka sikali nia’mo umbu appakkaramula nai’ battu ri tangnga-tangngana kota Gibea. Ta’bangkami tu Benyamin wattunna assaile ke’nanga na nacini’ sikontu kotana ke’nanga akkanre.
41 Na anjo memang wattua nata’gilimmo pasukang lomoro’ se’rena Israel maju ambunduki ke’nanga, sanggena silingu-linguimi anjo tantarana tu Benyamin, lanri naassennamo kalenna angkanaya mattantu lanibetami ke’nanga.
42 Jari larimi ke’nanga ambokoi tu Israel mange ri daera parang lompoa, mingka tena nakkulle ta’lappasa’ ke’nanga. Nilipummi ke’nanga ri alla’na pasukang lomoro’ se’rena Israel siagang pasukang niakamo battu ri oloang mange ri kotaya. Nibeta lompomi tu Benyamin.
43 Nilipummi ke’nanga ri tu Israel siagang niondang tulusu’mi sa’genna battu mae ri bageang rayanganna Gibea. Lalang angngondanna tu Israel nabunomi
44 nia’ 18.000 jaina tantara le’ba’na nilati ri tu Benyamin.
45 Tantarana tu Benyamin maraengannaya nagilimmi kalenna nampa lari ammalo ri daera parang lompo mangea ri moncong-moncong batu ri Rimon. Nia’ 5.000 tau battu ri ke’nanga nibuno ri tangngana aganga. Maraenganga niondang tulusuki sa’genna mange ri Gideon. Nia’ 2.000 tau battu ri ke’nanga nibuno.
46 Jari, tantarana tu Benyamin anjo alloa nia’ 25.000 nibuno — yangasenna sangnging tantara barani.
47 Mingka battu ri anjo ke’nanga laria ammalo ri daera parang lompo mangea ri moncong-moncong batu ri Rimon, nia’ 600 tau lappasa’. Ammantangi ke’nanga ri Rimon patambulang sallona.
48 Nampa ammotere’mo pole tu Israel ambunduki na nabuno ngaseng sikontu anjo tu Benyamin niaka tassesa — bura’ne, baine, ana’-ana’ siagang olo’-olo’ nabuno ngaseng. Sikontu kota niaka ri anjo daeraya natunu kabusuki ke’nanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA