Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Cilakai Yerusalem, nigallaraka tampa’ pakkoro’bangngang untu’ Allata’ala! Cilakai kota tampa’na Daud akkema. Boli’mi kamma assisambe-sambe taunga siagang passua’-suarranna ke’nanga.
2 Mingka laNapabattui Allata’ala balaya irate ri anjo kotaya, sa’genna ammarrang siagang akkunrareng taua. Kabusu’na kotaya lasangkammai tampa’ pakkoro’bangngang attalaka cera’.
3 LaNabunduki Allata’ala anjo kotaya siagang laNatammulili battu ri kabusu’na kabattuanga.
4 Rapangi kokoci’ sallang Yerusalem, eroka ampappilangngerangi sa’ra ca’dina battu lalang ri buttaya, battu ri limbu’buka.
5 Mingka sikontu bansa maraeng pallaka anjo, lalalanynya’ ngasengi rapang limbu’bu’ yareka awang niri’bakang ri anging. Ti’ring battui siagang tanisanna-sannayai kabattuanna.
6 LaNapakabebasaki Batara Kaminang Makoasaya anjo kotaya siagang anging lompo kammayatompa Napata’ge’goso’ lompoi buttaya. Lappabattui anging kancang siagang pepe’ a’jalloka rinrana.
7 Nampa sikontu pasukang bansa maraeng battua ambunduki Yerusalem, kota tampa’ pakkoro’bangnganga mae ri Allata’ala, yangasenna tau niaka antammulili siagang ambunduki anjo kotaya, lalanynya’ ngasengi rapang so’na ri wattu bangngina.
8 Sikamma bansa niaka a’rappungang untu’ ambunduki Yerusalem lasanrapangi tau cipuruka asso’na angnganre, nampa ambangung natena bonena battanna; yareka rapangi ke’nanga tau turere asso’na angnginung, nampa ambangung nakalotoro’ kacikoro’na.
9 Tulusu’ kalanna’-lannassang mako siagang tulusu’ tongko’mi matannu rapang tau butaya! A’jari tau nasa’ringko, mingka teai lanri angnginunnu anggoro’. Ta’royong-royongi jappanu, mingka teai lanri angnginunnu inungang terasa’.
10 Napa’jari ta’do’dokko siagang attinro nyamangko Batara. Natongkoki matanna sikamma na’bia siagang nabomboki rupanna sikamma pacinika.
11 Taccokkomi battuanna sikamma pangunjuka mae ri kau, rapang kitta’ nitongko’ jarreka. Punna nierang anjo kittaka mae ri tau angngassenga ammaca sollanna nabacakangko, lanakana takkulleai, lanri nitongkoki anjo kittaka.
12 Punna nierangi mae ri tau buta hurupuka, lappiali angkana takkulleai ammaca.
13 Nakana Batara, "Anjo taua nasombA’ siagang bawana, mingka atinna lalang bellai ri Nakke. Agamana ke’nanga poro atorang napare’ji rupataua, untu’ niapele’ji bawang.
14 Lanri kammana anjo laKupata’bangkai ke’nanga siagang pattunrung a’mole-molea. Tau cara’deka la’jari toloi, siagang sikontu kacara’dekanna ke’nanga latena ngaseng matu-matunna."
15 Cilakai tau eroka ancokkoi rancanana battu ri Batara! Appanggaukang cokko-cokkoi ke’nanga, nampa nakapang angkana tena manna sitau anciniki yareka angngassengi apa nagaukang ke’nanga.
16 Yangasenna ke’nanga natunggengi. Kereanga la’bi parallu, papare’ uringa, yareka butta pika? Maka lakkullei anjo apa nipareka akkana mae ri tumappare’na, "Teai ikau amparekka’"? Yareka akkullei anjo baranga angkana ri ia, "Tena apa-apa akkulle nugaukang"?
17 Nia’ paruntu’ kana kamma anne, "Tasalloami na’jari pa’lamung-lamungammo romang lompoa, na butta pa’lamung-lamunganga a’jari romang lompo."
18 Anjo wattua tau tongoloka lanalangngereki kana-kana nibacaya battu ri se’reang kitta’, siagang tau butaya, ia sassanga tallasa’na sumpaeng, lakkullei accini’.
19 Tau kasi-asia siagang tau hinaya lanakasiaki ammotere’ kate’neang Napassareanga Allata’ala matangkasa’na Israel.
20 Iaminjo kale’bakkanna sikamma tau anjallakkangai paranna tau siagang anghinayai Allata’ala. LaNahukkungi Allata’ala sikontu tau dorakaya,
21 tau nangaia ampitinai paranna tau, tau ampappisangkangai nihukkung tau ja’dalaka, siagang tau appa’la’banga carita-carita balle-balle sollanna tanggappaya kaadelang tau lambusuka.
22 Lanri kammana anjo, Batara, iamintu Allata’alana Israel le’baka ampakabebasaki Abraham, kamma-kamma anne Nakana, "Ikau bansaKu, tenamo nalanihinako pole siagang tenamo nalapi’lasa’ rupannu lanri siri’-siri’.
23 Saba’ punna nucini’ sikamma ana’nu Kupassareanga mae ri kau, lanuakuiMa’ angkana iNakkemi Allata’ala matangkasa’na Israel. LanupakalompoMa’ siagang lamalla’ mako mae ri Nakke.
24 Tau toloa lappilajaraki ammahang siagang tau tuli a’moro-moroa lasannangi niajara’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA