Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas kejadin-kejadin si tersena arah teruh enda perlu lit persembahen kerna dosa, eme: Adi lit sekalak ipindo pengadilen kesaksinna tapi la iberekenna keterangen kerna kai si nggo idahna tah ibegina, erdosa ia janah ia jine ngaloken akibatna.
2 Adi lit kalak ngkuit ntah kai-kai si la bersih rikutken aturen agama, umpamana bangke rubia-rubia, amin pe la isengajana nggo meluat ia, dingen ersalah ia.
3 Adi kalak ngkuit alu la sengaja kai saja si pantang si asalna i bas manusia nari kenca ietehna perbahanenna e, minter ia ersalah.
4 Adi lit kalak terlanjur ersumpah ntah kerna kai-kai gia, kenca itehna perbahanenna e, ersalah ia minter.
5 Adi lit kalak ersalah, iakukenna lah kesalahenna e,
6 janah selaku tebus dosana e, arus ipersembahkenna biri-biri tah kambing beruna man TUHAN. Imam arus mpersembahken persembahen guna dosa kalak ndai.
7 Adi la kalak ngasup nikapken biri-biri ntah kambing, ipersembahkenna lah man TUHAN dua ndukur ntah dua nderapati jadi penebus dosana. Sada guna persembahen dosa, sada nari guna persembahen tutungen.
8 Iberekenna lah e man imam. Imam mpersembahken perik-perik si pemena man persembahen dosa. Iputurna lah kerahung perik-perik e, tapi la seh sirang ras takalna.
9 Kenca bage ipirpirkenna sitik darehna ku dingding batar-batar. Dareh si lebihna ipespes seh keri mambur ku teruh batar-batar e. Enda me persembahen kerna pengalemi dosa.
10 Kenca bage maka ipersembahken imam ka perik-perik si sada nari ndai jadi persembahen tutungen rikutken aturen-aturenna. Bagenda lah perbahan imam mpersembahken persembahen kerna dosa kalak ndai, janah ialemi me dosa kalak ndai.
11 Adi dua ndukur ntah dua nderapati pe la ia ngasup nikapkenca, ipersembahkenna lah sada kilo tepung jadi persembahen pengalemi dosa. La banci itamana minak saitun ntah pe kumenen i babo tepung e, sabap labo e persembahen pangan tapi persembahen pengalemi dosa.
12 Ibaba kalak ndai lah e man imam, gelah ibuat imam tepung e sempukul tandana maka kerina tepung ndai nggo ipersembahken man TUHAN. Emaka itutungna i das batar-batar jadi persembahen guna pengalemi dosa.
13 Bagenda lah ibahan imam mpersembahken persembahen kerna dosa kalak ndai, janah ialemi me dosa kalak ndai. Tepung si tading jadi sikerajangen imam, bali ras si ibahan nandangi persembahen pangan.
14 TUHAN mereken aturen-aturen si tersurat arah teruh enda man Musa:
15 Adi lit kalak erdosa la erkiteken sengaja, la terberekenca penggalaren si nggo itetapken jadi sikerajangen TUHAN, arus maka ipersembahkenna sada bajar biri-biri ntah kambing si la lit sitik pe man pandangen jadi penebus kesalahenna e. Erga biri-biri ntah kambing e itentuken sue ras patoken si sah.
16 Igalarina lah kai si langa igalarina e. Jenari arus ka pe itambahina galarna seperlimana nari. Iberekenna lah si e man imam, emaka imam mpersembahken asuh-asuhen ndai jadi persembahen kerna dosa kalak ndai. Emaka dosana ialemi.
17 Adi lit kalak erdosa alu la sengaja erkiteken ngelanggar sada bagin i bas perentah-perentah TUHAN, ersalah ia, janah arus maka itebusina kesalahenna e.
18 Ibabana lah man imam jadi tebusna sada bajar biri-biri ntah pe kambing si la lit sitik pe man pandangen. Ergana itentuken rikutken patoken si sah. Imam nehken persembahen kerna dosa kalak ndai, emaka ialemi me dosa kalak ndai.
19 Si eme persembahen guna nebusi dosa si ilakoken man TUHAN.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA