Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Seng bulih paulionnima naibata-naibata bennima, anjaha gana-gana ampa tugu batu seng bulih paulionnima bennima, sonai homa batu na margambar-gambar seng bulih pajongjongonnima i tanohnima laho marsombah hujai; ai Ahu do Jahowa, Naibatanima.
2 Maningon ramotkononnima do ari Sabat-Ku, anjaha mulia ma bennima ianan-Ku na mapansing in; Ahu do Jahowa.
3 Anggo marparlahou hanima ibagas paraturan-Ku anjaha ijolom hanima titah-Ku anjaha domu hujai ihorjahon hanima,
4 jadi bereon-Ku ma bennima udan bani panorangni, anjaha bereon ni tanoh in ma gogohni, anjaha hayu na i ladang pe bereonni do buahni.
5 Jadi das ma panorang mardogei bennima hubani panorang mambuat buah anggur, anjaha na mambuat anggur das hubani na manabur, bosur ma hanima mangankon sipanganonnima, anjaha sonang marianan i tanohnima.
6 Bahenon-Ku do mardamei-damei tanoh in, anjaha sonang ma hanima modom, sahalak pe seng dong panonggoti bennima; siapkonon-Ku do binatang panoroh hun tanoh in, anjaha podang pe seng montas hun tanohnima.
7 Pabalionnima do munsuhnima, anjaha rasei do sidea bahenon ni podang i lobeinima.
8 Lima halak humbennima mardakdak saratus halak, anjaha saratus halak humbennima mardakdak saloksa; radag do munsuhnima bahenon ni podang i lobeinima.
9 Marpanatap do Ahu bennima tumpakon-Ku do hanima mabuei anjaha patotapon-Ku do padan-Ku bennima.
10 Mangan omei usang do hanima, anjaha paluaronnima do lobei na usang ai ase adong ianan ni omei bayu.
11 Pajongjongon-Ku do ianan-Ku i tongah-tongahnima, anjaha seng magigi Ahu mangidah hanima.
12 Mardalani do Ahu i tongah-tongahnima, anjaha Ahu do Naibata bennima, anjaha hanima gabe bangsang-Ku.
13 Ahu do Jahowa, Naibatanima, na dob mambobahon hanima luar hun tanoh Masir, ase ulang be jabolon ni sidea hanima. Huponggolhon do hayu ni pasangannima anjaha Ahu do mambahen totap langkahnima.
14 Tapi anggo seng ibalosi hanima Ahu anjaha seng ra hanima mandalankon haganup titah in,
15 anjaha anggo teos do uhurnima bani paraturan-Ku anjaha magigi hanima mangidah uhum-Ku, gabe seng ijolom hanima haganup titah-Ku, anjaha marhitei ai iosei hanima padan na Hubahen ai,
16 Ahu pe bahenon-Ku ma sonon bennima, “Pasogopon-Ku ma na mabajan bennima, Tirahap ampa pane-pane, na mambahen miloh matanima anjaha melus goluhnima. Sisoya-soya do manabur hanima, ai munsuhnima do na mangankon ai.
17 Dompakkonon-Ku do bohing-Ku manlawan hanima, ase italuhkon munsuhnima hanima, halak na mangkagigihon hanima do na manrajai hanima, anjaha maporus do hanima, age pe seng dong na mardakdak hanima.
18 Anjaha age pe sonai lanjar do seng itangihon hanima Ahu, gabe nunuton-Ku ope mangajar hanima, pitu hali lompit, halani dousanima ai.
19 Ropukon-Ku do na nienjengkonnima ai, anjaha bahenon-Ku do langitnima songon bosi, anjaha tanohnima in songon tombaga.
20 Soya do halojaon ampa hinorjahonnima, seng bereon ni tanohnima in gogohni, anjaha seng marbuah hayu na i ladang in.
21 Anjaha anggo manlawan ope hanima Bangku, anjaha seng ra hanima mambalosi Ahu, jadi nunuton-Ku ope mamukul hanima, pitu hali lompit, domu hubani dousanima ai.
22 Suruhon-Ku do binatang panoroh manlawan hanima, sorohonni do dakdanaknima anjaha parsedaonni pinahannima anjaha paotikonni do bilangannima, gabe malungun ma dalannima.
23 Anjaha anggo seng tunduk ope hanima bani pangajaran-Ku, tapi ilawan hanima ope tong Ahu,
24 jadi Ahu pe imbangon-Ku do hanima anjaha bogbogan-Ku do hanima, pitu hali, halani dousanima.
25 Parohon-Ku do podang bennima, na manluluhon padan na Hubahen ai, anjaha anggo maporus hanima hubagas hutanima, tongoson-Ku do sampar hu tongah-tongahnima, anjaha ondoskonon-Ku do hanima hubagas tangan ni munsuh.
26 Anggo Huropukkon ma parbohalannima ai, jadi masakon ni sapuluh naboru ma rutinima ibagas sada parmasakan ruti, anjaha iboan mulak ruti ai bennima martimbangan, seng boi bosur hanima mangan.
27 Anjaha anggo seng ope homa itangihon hanima Ahu, tapi ilawan ope Ahu,
28 jadi Ahu pe manringis do manlawan hanima anjaha ajaron-Ku do hanima, pitu hali lompit, halani dousanima.
29 Maningon panganonnima do daging ni anaknima ampa borunima.
30 Anjaha parsedaon-Ku do buntu-buntu parsombahannima anjaha rumbakkonon-Ku do tiang sinombahnima, anjaha sampakkonon-Ku bangkeinima bani ropuk-ropuk ni naibata-naibatanima, anjaha magigi do Ahu mangidah hanima.
31 Parreongon-Ku do huta-hutanima anjaha parsedaon-Ku ianan na mapansing na bennima, anjaha seng ra be Ahu manganggoh misbou ni galangannima.
32 Tongon, Ahu sandiri mambahen tarulang tanoh in, ase tarsonggot munsuhnima, na roh marianan hujai mangidah ai.
33 Tapi anggo hanima erapkonon-Ku do hu tongah-tongah ni bangsa parbegu, anjaha Ahu mangondamkon podang hun pudinima, ase gabe halimisan tanohnima anjaha mareong ia hutanima.
34 Jadi hamalaskonon ni tanoh in ma tahun-tahun Sabatni ai, sadokah panorang tarulang ai, anjaha i tanoh ni munsuhnima ia hanima; jadi marsaran ma tanoh in, anjaha ihamalaskon Sabatni ai.
35 Sadokah panorang na tarulang ai, marsaran do tanoh ai, ai ma parsaranan, na so tarpasarankonsi bani panorang marsaran ai, na maningon sidalankononnima namin, sanggah marianan hanima ijai.
36 Anjaha halak na tading hun bennima bahenon-Ku do marhabiaran uhur ni sidea i tanoh ni munsuhnima, gabe maporus do sidea halani pardaras ni bulung-bulung na masak, anjaha maporus do sidea songon na niayak ni podang, anjaha mardabuhan sidea age pe seng dong na mangayak.
37 Marsijombaan do sidea, songon sanggah maporus iayak podang, age pe seng dong na mardakdak. Seng manahan hanima manlawan munsuhnima,
38 anjaha maningon magou do hanima i tongah-tongah ni bangsa parbegu, anjaha bois hanima panganon ni tanoh ni munsuhnima.
39 Tapi halak na tading hun bennima, maningon mandatei do halani hajahaton ni sidea i tanoh ni munsuhnima; sonai homa halani hasalahan ni ompungnima na mangonai bani sidea, mambahen mandatei sidea.
40 Tapi anggo iundukkon sidea do hajahaton ni sidea ampa hajahaton ni ompung ni sidea ai, ai ma na mangeluk ai sidea hun Bangku, anjaha homa manlawan sidea hu Bangku,
41 halani ai do ase Hulawan sidea anjaha Huboan sidea hu tanoh ni munsuh ni sidea anggo ipaunduk sidea do uhur ni sidea na so marsunat ai, anjaha mubah sidea humbani hajahaton ni sidea ai,
42 jadi mardingat ma Ahu bani padan na Hubahen bani si Jakob, si Isak ampa si Abraham, anjaha tanoh ai pe dingaton-Ku do.
43 Tapi anggo tanoh ai maningon tadingkonon ni sidea do lobei, ase ihamalaskon tanoh ai Sabatni ai sadokah na tarulang ai anjaha sidea seng ijai marianan; sidea sandiri do na maningon mamorsan hajahaton ni sidea, halani na iambukkon sidea ai paraturan-Ku anjaha magigi sidea bani titah-Ku.
44 Tapi age pe i tanoh ni munsuhni ai sidea, seng ambukkonon-Ku anjaha hagigihonon-Ku sidea anjaha seng gabe magou tumang Hubahen sidea, marhitei na Humasabkon padan-Ku na hubani sidea ai, ai Ahu do Jahowa, Naibata ni sidea.
45 Ingaton-Ku do, halani sidea, padan na Hubahen ai bani ompung ni sidea, na dob Hubobahon luar hun Masir, ibagas pangidah ni bangsa parbegu, ase gabe Naibata ni sidea Ahu; Ahu do Jahowa.”
46 In ma paraturan, uhum ampa titah na niadongkon ni Jahowa hubani halak Israel i Dolog Sinai marhitei si Musa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA