Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma hubani si Musa, “Hatahon ma hubani malim-malim, anak ni si Aron, anjaha patugah ma hubani sidea, seng bulih butakan ni malim dirini bani halak na dob matei i tongah-tongah ni bangsani,
2 sobali bani diha-dihani na sangkan: bani inangni, bapani, anakni, boruni, saninani,
3 bani botouni na so laho ope, halani sangkan do bani; bani on boi do butakonni dirini.
4 Bani botou na dob marhajabuan seng bulih pabutakonni dirini, gabe butak holi ia marhitei ai.
5 Seng bulih lepongon ni malim uluni, atap iritip ujung ni gumisni, atap irariki angkulani.
6 Maningon pansing do sidea bani Naibatani, anjaha seng bulih butak bahenon ni sidea goran ni Naibata ni sidea; ai sidea do sigalangkon galangan marhitei apuy bani Jahowa, sipanganon ni Naibata ni sidea; halani ai maningon pansing do sidea.
7 Seng bulih sidea marjolmahon boru jalang atap naboru na dob binutakan, sonai homa naboru na dob pinaulak ni dalahini seng bulih buaton ni sidea, ai pansing do malim bani Naibatani.
8 Halani ai maningon papansingonnima do ia, ai ia do sigalangkon sipanganon bani Naibatanima; maningon pansing do ia bennima, ai na pansing do Ahu Jahowa, na papansingkon hanima.
9 Anggo ipabutak sada boru ni malim dirini marhitei parriah-riahon, na pabador bapani do ia ai; maningon matei do ia tutungon ibagas apuy.”
10 Tapi anggo sintua ni malim, ai ma kopala i tongah-tongah ni saninani, na dob iuseihon minak pamminakion ai bani uluni, na dob niuras laho mamakei pakean na mapansing ai, seng bulih jangga-jangga bahenonni uluni atap rigatanni pakeanni.
11 Seng bulih dohoranni bangkei ni atap ise pe, age bani bapani atap inangni pe seng bulih pabutakonni dirini.
12 Seng bulih luar ia humbani ianan na mapansing in, ase ulang gabe butak ibahen ianan na mapansing ni Naibatani, ai domma bani minak pamminakion ni Naibatani; Ahu do Jahowa.
13 Maningon anak boru do sibuatonni gabe jolmani.
14 Naboru na mabalu, atap na dob sinirangkon, atap na dob binutakan atap boru jalang, seng bulih buatonni ai, tapi anak boru, na humbani bangsani do boi buatonni bahen jolmani,
15 ase ulang gabe butak ginomparni ibahen i tongah-tongah ni bangsani, ai Ahu do Jahowa, na papansingkonsi.”
16 Dob ai nini Jahowa ma hubani si Musa,
17 “Hatahon ma hubani si Aron, ise pe lang humbani ginomparmu na martikas, torus marsundut-sundut, na boi roh hun dohor laho manggalangkon sipanganon bani Naibata.
18 Ise pe lang na martikas na boi roh hun dohor; dalahi na pitung atap na repat, parbohi na penek atap parnahei na marsiganjangi;
19 dalahi na maponggol naheini atap tanganni pe;
20 dalahi na gundung atap na pengpeng, na palouon matani, na huluson, na hurapon atap na hona kasih.
21 Sagala dalahi na martikas humbani ginompar ni si Aron, malim ai, seng bulih roh hun dohor laho manggalangkon galangan marhitei apuy bani Jahowa. Martikas do ia, halani ai seng bulih roh ia hun dohor, laho manggalangkon sipanganon bani Naibatani.
22 Bulih do ia mangan humbani sipanganon ni Naibatani, humbani na tang mapansing ai ampa na pansing ai,
23 tapi seng bulih ia masuk hubagas hirei-hirei ai atap dohoranni anjapanjap ai, ai martikas do ia, ase ulang gabe mabutak ibahen ianan-Ku na pansing in; ai Ahu do Jahowa na papansingkon sidea.”
24 Sonai ma ihatahon si Musa hubani si Aron, hubani anakni ai ampa hubani haganup bangsa Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA