Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nasuromi Batara anjo Musa
2 ampabattui anne passalaka mae ri bansa Israel angkanaya, "Inai-nai ri kau yareka bansa maraeng niaka ammantang tuli ri alla’nu angkoro’bangkangi ana’na mae ri Rewata Molokh, musti nisambilai batu ri tau jaia sa’genna mate.
3 Inai-nai angkoro’bangkangi ana’na mae ri Rewata Molokh, nara’massi KemaKu siagang nahinai areng matangkasakKu. LaKuhukkungi siagang tenamo nalaKubilangi anggota ummakKu.
4 Punna tena namakkana-kana tau jaia mae ri panggaukanna tau kammaya anjo siagang tena nahukkungi sa’genna mate,
5 KalengKu langhukkungi anjo taua siagang sikontu kaluargana kammayatompa sikontu tau naaganga ambokoiA’ nampa anynyomba ri Rewata Molokh. Tenamo nalaKubilangi ke’nanga anggota ummakKu.
6 Tau a’lampaya appala’ tulung mae ri sanro appareka passisambungang siagang roh-roh tau matea, laKuhukkungi siagang tenamo nalaKubilang anggota ummakKu.
7 Katutui kalennu sollannu tuli matangkasa’, lanri iNakke Karaeng Allata’alanu.
8 Turuki hukkung-hukkungKu, lanri iNakkemi Batara, le’baka ansa’lakko untu’ KalengKu pata."
9 Napassareangi Batara anne paratorang-paratorang angkanaya, "Inai-nai antunrai manggena yareka anronna, musti nihukkung matei. Matei lanri salana tonji.
10 Punna nia’ tu Israel a’gau’ salimara’ siagang bainenna julu bansana, anjo taua siagang anjo bainea musti nihukkung matei.
11 Punna nia’ tu bura’ne assikatinroang siagang kalase’renna bainenna manggena, naparkosai ha’na manggena. Anjo bura’nea siagang anjo bainea musti nihukkung matei. Matei ke’nanga lanri salana tonji ke’nanga.
12 Punna nia’ tu bura’ne assikatinroang siagang mintunna bainea, anjo tau ruaya musti nihukkung matei. A’gau’ bawangi ke’nanga, siagang matei ke’nanga lanri salana tonji.
13 Punna nia’ tu bura’ne a’gau’ bawang siagang paranna tu bura’ne, anjo ke’nanga appakaringi’-ringiki siagang hinai panggaukanna, siagang musti nihukkung mate rua-ruai. Matei ke’nanga lanri salana tonji.
14 Punna nia’ tu bura’ne a’bunting siagang sitau baine nampa nabuntingi todong amma’na anjo bainea, anjo tau tallua musti nitunui sa’genna mate, lanri ampanggaukang tena nasilolongang ke’nanga. Anjo panggaukang kammaya takkulleai kajariang ri tangnga-tangnganu.
15 Punna nia’ tu bura’ne a’gau’ bawang siagang olo’-oloka, anjo taua siagang anjo olo’-oloka musti nibunoi.
16 Punna nia’ tubaine a’gau’ bawang siagang olo’-oloka, anjo bainea siagang anjo olo’-oloka musti nibunoi. Matei ke’nanga lanri salana tonji ke’nanga.
17 Punna nia’ tu bura’ne a’gau’ bawang siagang sari’battang bainena yareka sari’battang julu mangge namaraeng amma’na, yareka sari’battang julu amma’ namaraeng mangge, tenamo nanibilangi ke’nanga anggota ummakKu. Ampanggaukang tasilolongammi ke’nanga siagang musti natanggongi kodina kale’bakkanna.
18 Punna nia’ tu bura’ne assikatinroang siagang baine sitabanga battu bulanna, tenamo nanibilangi ke’nanga anggota ummakKu.
19 Punna nia’ tu bura’ne a’gau’ bawang siagang purinanna bainea, anjo tau ruaya musti natanggongi kodina kale’bakkanna lanri anjo panggaukanna ke’nanga.
20 Punna nia’ tu bura’ne a’gau’ bawang siagang bainenna purinanna bura’nea, anjo taua nahinai purinanna. Anjo bura’nea siagang anjo bainea musti natanggongi hukkunganna. Sa’genna mate ke’nanga takkulleai anggappa ana’.
21 Punna nia’ tu bura’ne angngalleangi bainenna sari’battanna, nahinai sari’battanna siagang ampanggaukang tasilolongangi anjo tu bura’ne kammaya. Sa’genna mate tena nalanggappa ana’."
22 Nakana Batara, "Turuki sikontu hukkungKu siagang parentaKu, sollanna tena nanibongkako battu ri pa’rasangang Kanaan, iamintu pa’rasangang Kutujua angngerangko anne kamma.
23 Teako palembai ada’-ada’ kabiasanna bansa niaka ammantang anjoreng. ErokKa’ Kusa’ring ta’langnge anciniki panggaukang ja’dala’na ke’nanga. Iaminjo saba’na naKubongka ke’nanga, sollanna nanukkulle antama’ ri anjo pa’rasanganga.
24 Pa’rasangang akkalumanynyanga siagang copponga buttana anjo, le’ba’mi Kupa’janjiang mae ri kau, jari Kupassareangi mae ri kau untu’ nupatang. INakke Karaeng Allata’alanu le’baka ansa’lakko battu ri alla’na bansa-bansa maraenga.
25 Lanri kammana anjo musti nuasseng bajiki nubatei angkanaya kereanga olo’-olo’ haranga siagang tenaya naharang. Teako angnganrei olo’-olo’ harang. Anjo olo’-olo’ kammaya le’ba’mi Kupattantu angkanaya harangi, jari punna nukanrei ikau kalennu a’jari ra’masa’.
26 Kusa’lakko battu ri alla’na bansa-bansa maraenga sollannu a’jari Kupatang. Musti matangkasakko lanri iNakke Batara, na iNakke matangkasakKa’.
27 Inai-nai tu bura’ne yareka tubaine appare’ passisambungang siagang roh-rohna tau matea, musti nisambilai batu sa’genna mate. Anjo taua matei lanri salana tonji."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA