Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dhabuna PANGERAN ka Mosa, "Kabala ka ommat Isra’il Tang parenta reya: Ba’na kodu socce, sabab Sengko’, PANGERAN Allahna ba’na, socce.

² (19:1)

³ Saneyap oreng kodu padha hormat ka rama ebuna, ban kodu araya’agi are Sabat akantha se la eparenta’agi bi’ Sengko’. Sengko’ reya PANGERAN, Allahna ba’na.

⁴ Ja’ nyemba brahala. Ja’ agabay arca dhari logam ban ja’ nyemba arca se kantha jareya. Sengko’ PANGERAN, Allahna ba’na.

⁵ Mon ba’na ngatorragi kurban salameddan aropa keban, toro’ atoran-atoran se la etantowagi bi’ Sengko’, sopaja kurban jareya bisa’a etarema bi’ Sengko’.

⁶ Dagingnga kodu kakan e are bakto keban jareya esambelli otaba kalagguwanna. Karena daging se gi’ badha saellana lebat tello are kodu eobbar epatadha’, sabab daging jareya haram.

⁷ Mon karena daging jareya gi’ ekakan, kurban jareya bi’ Sengko’ ta’ etarema.

⁸ Pa’-sapa’a ngakan daging jareya sala polana ta’ ngargai barang se la eatorragi ka Sengko’ malolo. Oreng jareya ta’ eanggep Tang ommat pole.

⁹ Mon ba’na anye, ja’ metthek gandum se tombu e gir-penggirra teggalla, ban ja’ abali makompola re-karena gandum se gi’ badha e teggalla saellana anye.

¹⁰ Ja’ abali ka kebbunna anggurra kaangguy makompol re-karena buwana anggur se gi’ badha e bungkana saellana epetthek dha’-adha’na. Bariya keya wa’-buwa’an se la gaggar ja’ kala’. Dina me’ olle ekala’ oreng mesken otabana oreng manca. Sengko’ PANGERAN, Allahna ba’na.

¹¹ Ja’ co’-ngeco’, nepo otabana lecegan.

¹² Ja’ ajanji bit Tang nyama mon ba’na ta’ amaksod neptebbana janji jareya, sabab kalaban cara se kantha jareya ba’na ya-nyeya Tang nyama. Sengko’ GUSTE Allahna ba’na.

¹³ Ja’ merres sasamana otabana arampas barangnga. Opana oreng se alako ka ba’na ja’ tahan maske pera’ samalem.

¹⁴ Ja’ abasto oreng kopok ban ja’ nyaba’ bato e jalan se elebadi oreng buta sopaja oreng buta jareya ta’ tatandhung. Ba’na kodu tako’ ban hormat ka Sengko’, sabab Sengko’ GUSTE Allahna ba’na.

¹⁵ Pajujur mon ngadili parkara; ja’ nolonge oreng se mesken, ban ja’ patako’ ka oreng sogi.

¹⁶ Ja’ mabalattra petenna e antarana reng-oreng sabangsana ba’na dibi’, me’ olle ba’na ta’ daddi lantaranna matena sasamana. Sengko’ reya PANGERAN.

¹⁷ Ja’ nyempen sake’ ate ka sapa’a bai. Mon ba’na atokar ban sapa’a bai, pamare gallu orosan jareya, me’ olle ba’na ta’ dusa polana oreng laen.

¹⁸ Ja’ males sake’ ate ka oreng ban ja’ baji’ ka oreng laen, tape taresnae sasamana pakantha taresnana ba’na ka aba’na dibi’. Sengko’ reya PANGERAN.

¹⁹ Toro’ Tang parenta kabbi. Ja’ malake’e ebin ban ebin laen se ta’ padha macemma. Ja’ namen bibit dhu macem e dhalem settong kebbun otaba teggal. Ja’ ngangguy kalambi se etennon bi’ bennang dhu macem.

²⁰ Mon badha oreng lalake’ ajanji ajuwala dunor bine’na ka lalake’ laen kaangguy ekasellera, dineng oreng se melle dunor jareya gi’ ta’ majar, ban oreng se ajuwal dunor jareya tedhung apolong ban dunor jareya, se kadhuwa jareya kodu padha eokom, tape ta’ olle eokom mate, sabab maske baramma’a babine’ jareya gi’ dunorra.

²¹ Lalake’ jareya kodu ngeba dumba lake’ ka adha’na Tang Kemah Socce menangka kurban tebbusanna kasala’an.

²² Imam kodu ngurbannagi dumba jareya e dhalem opacara panyocceyan, sopaja dusana oreng jareya esapora’a. Sengko’, Allah, tanto pas nyapora dusana oreng jareya.

²³ Mon ba’na la maso’ ka nagara Kana’an, ban la namen acem-macem bungkana wa’-buwa’an e jadhiya, saabidda tello taon se dha’-adha’na wa’-buwa’an jareya kodu eanggep haram, ta’ olle kakan.

²⁴ E taon se kapeng empa’ buwana kabbi kodu eatorragi ka Sengko’, PANGERAN, menangka tandha sokkor.

²⁵ E taon se kapeng lema’ buru buwana olle ekakan ba’na. Mon atoran reya bi’ ba’na etoro’ kabbi, bungkana wa’-buwa’anna ba’na bakal sajana bannya’ buwana. Sengko’ reya PANGERAN, Allahna ba’na.

²⁶ Ja’ ngakan dhara. Ja’ ngangguy mo-elmo gaib.

²⁷ Ja’ agunteng obu’ e bagiyan erengnga cethagga, ban ja’ nyokor janggu’.

²⁸ Ba’na ja’ alokae kole’na kaangguy masange dha-tandha otabana alokae badanna menangka tandha ja’ ba’na sossa polana kapateyan. Sengko’ reya PANGERAN.

²⁹ Ja’ magaggar darajadda’ ana’ bine’na ba’na kalaban nyoro ana’na ba’na jareya daddi sondel e kowel. Mon ba’na ngalakone se kantha jareya, ba’na macemmer nagarana, ban tengka se ta’ pantes bakal bannya’a e nagara jareya.

³⁰ Raya’agi are Sabat ban hormadi kennengngan se la kusus kaangguy kaparlowan abakteya ka Sengko’. Sengko’ reya PANGERAN.

³¹ Ja’ menta babala’an ka dhukon se ahubungan ban arrohna reng-oreng mate. Mon ba’na ngalakone jareya, ba’na najjis. Sengko’ PANGERAN, Allahna ba’na.

³² Hormadi oreng towana. Ba’na pahormat ban patako’ ka Sengko’, sabab Sengko’ reya PANGERAN.

³³ Ja’ juba’ ate ka oreng manca se badha e nagarana ba’na.

³⁴ Ka reng-oreng manca jareya ba’na papadha ban ka reng-oreng sabangsana dibi’ ban taresnae reng-oreng jareya akantha kataresna’anna ba’na ka aba’na dibi’. Kaenga’e ja’ ba’na dibi’ tao daddi oreng manca e Messer. Sengko’ PANGERAN, Allahna ba’na.

³⁵ Ja’ nepo oreng laen ngangguy okoran palsu, tembangan otaba ker-taker palsu.

³⁶ Angguy meterran, tembangan ban ker-taker se bendhe. Sengko’ PANGERAN, Allahna ba’na, ban Sengko’ la ngeba ba’na kalowar dhari Messer.

³⁷ Toro’ sakabbinna Tang hokom ban Tang parenta reya. Sengko’ reya PANGERAN."

Imamat

Video Imamat 19

Ikuti Kami:

KONTAK | PARTISIPASI | DONASI