Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma hubani si Musa ampa si Aron,
2 “Marsahap ma ho pakon halak Israel hatahon ma hubani sidea, anggo marnunut roh bonih bani sada dalahi, gabe butak do ia marhitei partiris ni bonihni ai.
3 Sonon do parbutakni ai marhitei partiris ni bonihni ai; atap marnunut pe roh bonihni ai, atap na dob maronti pe ai, anggo ia butak ma.
4 Sagala podoman na pinodoman ni halak na tirisan bonih ai maningon butak do, anjaha sagala ugas-ugas na hinundulanni maningon butak do.
5 Barang ise na manjamah podomanni maningon susionni do pakeanni, anjaha paridionni dirini ibagas bah anjaha maningon butak do ia ronsi bodari.
6 Barang ise na hundul bani ugas na hinundulan ni halak na tirisan bonih ai, maningon susionni do pakeanni anjaha paridionni dirini ibagas bah, anjaha maningon butak do ia ronsi bodari.
7 Barang ise na manjamah angkula ni halak na tirisan bonih ai, maningon susionni do pakeanni anjaha paridionni dirini ibagas bah, anjaha maningon butak do ia ronsi bodari.
8 Anggo dais tijur ni halak na tirisan bonih bani sada halak na borsih, maningon susionni do pakeanni anjaha paridionni dirini ibagas bah, anjaha maningon butak do ia ronsi bodari.
9 Anjaha ganup palana na hinundulan ni halak na tirisan bonih ai maningon butak do.
10 Barang ise na manjamah na dob ongga tinibalanni, maningon butak do ronsi bodari.
11 Anjaha barang ise na jinamah ni halak na tirisan bonih, seng parlobei iburihi tanganni ibagas bah, maningon susionni do pakeanni anjaha iparidi dirini ibagas bah, anjaha maningon butak do ia ronsi bodari.
12 Parugas dapur na humbani tanoh, na jinamah ni halak tirisan bonih ai, maningon bolahkonon do; tapi parugas dapur na humbani hayu maningon burihan do ia ibagas bah.
13 Anggo malum ma halak na tirisan bonih ai humbani naboritni ai, maningon hiraonni do bani pitu ari bahen pangurasionni; maningon susionni do pakeanni anjaha paridionni dirini ibagas bah mardalan, dob ai pe ase borsih ia.
14 Bani ari paualuhkon maningon buatonni do dua anduhur ginti barang dua anak ni asas, anjaha maningon roh do ia hu lobei ni Jahowa, hu labah ni lampolampo partumpuan ai, anjaha iberehon ma ai bani malim ai.
15 Galangkonon ni malim ai ma ai, sada gabe galangan pardousaon, na sada nari gabe galangan situtungon; ibahen malim ai ma pardearan bani i lobei ni Jahowa, halani partiris ni bonihni.
16 Anggo sabur bonih ni sada dalahi, maningon paridionni do dirini ibagas bah, anjaha maningon butak do ia ronsi bodari.
17 Anjaha sagala hiou atap bobak pe na ihonai bonihni ai, maningon burihanni do ai marhitei bah, anjaha maningon butak do ia ronsi bodari.
18 Anggo modom sada dalahi rap pakon sada naboru anjaha sabur bonihni, haduasi sidea maningon paridionni do dirini ibagas bah anjaha maningon butak do sidea ronsi bodari.
19 Anggo roh pantang ni hiou ni sada naboru siganup bulan, maningon butak do ia ibagas pitu ari, anjaha barang ise na manjamahsi, maningon butak do ia ronsi bodari.
20 Anjaha sagala pinodomanni sadokah na butak ai ia maningon butak do ai; anjaha sagala na hinundulanni homa maningon butak do ai.
21 Barang ise na manjamah podomanni maningon susionni do pakeanni, anjaha paridionni dirini ibagas bah, anjaha maningon butak do ia ronsi bodari.
22 Barang ise na manjamah ugas na dob ongga hinundulanni, maningon susionni do hiouni anjaha maningon paridionni dirini ibagas bah, anjaha maningon butak do ia ronsi bodari.
23 Anjaha barang ise na manjamah barang aha na tibal i atas podomanni atap bani na dob ongga hinundulanni, maningon butak do ia ronsi bodari.
24 Anggo modom sada dalahi rap pakonsi, gabe dais habutakonni ai bani dalahi ai, maningon butak do ia pitu ari dokahni, anjaha ganup podomanni na pinodomanni ai butak do.
25 Anggo dokah roh pantang ni hiou ni sada naboru, seng pitah bani parroh ni pantang ni hiouni hinan, barang hundokah ai marimbang parroh ni pantang ni hiouni hinan, maningon butak do ia sadokah parroh ni pantang ni hiouni ai; maningon butak do ia usih songon bani panorang habutakon na somal.
26 Ganup podoman, na pinodomanni sadokah parroh ni darohni ai, maningon songon podoman habutakon ni ai do ai bani; anjaha sagala na hinundulanni maningon butak do, songon sanggah panorang habutakonni ai.
27 Barang ise na manjamah ai maningon butak do, anjaha maningon susionni do pakeanni, anjaha paridionni dirini ibagas bah, anjaha maningon butak do ia ronsi bodari.
28 Tapi anggo borsih ma ia humbani darohni na sai roh ai, hiraonni ma bani pitu ari dokahni, anjaha dob ai gabe borsih ma ia.
29 Bani ari paualuhkon maningon buatonni ma dua anduhur ginti barang dua anak ni asas, anjaha iboan ma ai hubani malim ai, hu labah ni lampolampo partumpuan ai.
30 Igalangkon malim ai ma ai, sada gabe galangan pardousaon anjaha pardearan bani i lobei ni Jahowa halani habutakon ni pantang ni houni na roh ai.
31 Sonai ma paluahonmu halak Israel humbani habutakon ni sidea, ase ulang matei sidea ibagas habutakon ni sidea ai, marhitei na pinabutak ni sidea ianan-Ku, na i tongah-tongah ni sidea ai.
32 Ai ma titah bani halak na tirisan bonih ampa bani halak na sabur bonihni, gabe butak marhiteihon ni ai;
33 ampa bani naboru na marnaboritkon pantang ni hiouni, ampa bani halak, dalahi atap naboru na sabur bonihni, ampa bani sada dalahi, na modom i lambung ni naboru na mabutak.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA