Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini Jahowa ma hubani si Musa ampa hubani si Aron,
2 “Hatahon hanima ma hubani halak Israel, on do pinahan na boi panganonnima, humbani pinahan na i atas tanoh on.
3 Sagala pinahan na martambirik anjaha bolah dua tambirikni ai, anjaha marngayoh-ngayoh homa, boi do panganonnima ai.
4 Tapi seng bulih panganonnima humbani na marngayoh-ngayoh tumang atap na marbolah dua tumang tambirikni, umpamani unta, ai marngayoh-ngayoh do ia namin, tapi seng marbolah anggo tambirikni; maningon butak do ai bennima.
5 Sonai homa paes, marngayoh-ngayoh do ai namin, tapi seng marbolah tambirikni; maningon butak do ai bennima.
6 Sonai homa ampodi, ai marngayoh-ngayoh do ai namin, tapi seng marbolah tambirikni, maningon butak do ai bennima.
7 Sonai homa babuy, ai marbolah do namin tambirikni, tapi seng marngayoh-ngayoh; maningon butak do ai bennima.
8 Seng bulih panganonnima humbani juhutni, bangkeini pe seng bulih jamahonnima, maningon butak do ai bennima.
9 On do bulih panganonnima humbani haganup na adong ibagas bah: Sagala na maripis anjaha na marsisik na adong ibagas bah, ibagas laut atap ibagas bah banggal, bulih do panganonnima ai.
10 Tapi sagala na so maripis ampa na so marsisik ibagas laut atap ibagas bah banggal pe, ai ma sagala na manggulmit ibagas bah atap sagala na manggoluh ibagas bah, maningon hagigi do ai bennima.
11 Tongon, maningon hagigi do ai bennima; seng bulih panganonnima sibukni, anjaha bangkeini ai maningon hagigi do ai bennima.
12 sagala na ibagas bah, na so maripis ampa na so marsisik, maningon hagigi do ai bennima.
13 Anjaha on do humbani manuk-manuk na gabe hagigi bennima, seng bulih panganon ai, sihagigihononkon do ai: manuk-manuk nanggordaha, tapi garo-garo pakon lali,
14 haluhuy silopak, haluhuy sibirong ampa na samasam hujai,
15 sagala kawak ampa na samasam hujai,
16 burung unta, langkupa, undan, haluhuy sipiuan ampa na samasam hujai,
17 sipauk, bongkik pakon boluk,
18 silogou-logou, onggang ampa kiung laut,
19 sitanda ulog, siboru tasik ampa na samasam hujai, lingkaboh ampa anrip-anrip.
20 Sagala binatang etek siparhabong, na mardalan marompat nahei, maningon hagigi do ai bennima.
21 Tapi humbani binatang etek siparhabong, na mardalan marompat nahei, na boi panganonnima pitah siparhae-hae i atas ni naheini, na pinakeini manlumpat-lumpat i atas tanoh.
22 Hunjai boi do panganonnima on: Masam-masam ni balang habu, masam-masam ni balang horas, balang sahua ampa balang bangkuya.
23 Tapi sagala binatang etek siparhabong na legan, siompat nahei, maningon hagigi do ai bennima.
24 Anjaha marhitei on gabe butak do hanima, ʻBarang ise na manjamah bangkeini, maningon butak do ai ronsi bodari,
25 anjaha barang ise na mangusung bangkei ni sisonai ai, maningon burihanni do pakeanni, anjaha maningon butak do ia ronsi bodari.ʼ
26 Halani ai sagala pinahan na marbolah tambirikni, tapi lang bolah dua tambirikni ai anjaha lang marngayoh-ngayoh, maningon butak do ia bennima; barang ise na manjamah ai maningon butak do ia.
27 Anjaha sagala na mangonjolhon tanganni mardalan humbani binatang na mardalan marompat nahei, maningon butak do ai bennima; barang ise na manjamah bangkeini ai, maningon butak do ai ronsi bodari,
28 anjaha barang ise na mangusung bangkei ni ai, maningon burihanni do hiouni, anjaha butak ronsi bodari; maningon butak do ai bennima.
29 Anjaha on pe, humbani binatang sipanjulur i atas tanoh in, maningon butak do in bennima, “buyut, ubag, boraspati ampa masam-masamni,
30 bindoran, lobar, ilik, polang ampa lahuy.
31 Ai ma na mabutak bennima, humbani haganup sipanjulur, barang ise na manjamah ai, anggo domma matei ai, maningon butak do ai ronsi bodari.
32 Anjaha sagala na nidabuhan ni ai, anggo domma matei ai, maningon butak do ai, atap parugas hayu pe ai atap hiou atap hulingkuling atap ranjut, haganup parugas tene na pinakei, maningon ronjamon do ai hubagas bah, anjaha maningon butak do ai ronsi bodari, dob ai pe ase borsih ai.
33 Anjaha anggo adong madabuh sisonai hubagas parugas na pinauli humbani tanoh, sagala isini ai butak do ai, anjaha maningon rosakkononnima do ai.
34 Sipanganon aha pe ibagas ai, na boi sipanganon, na dob saor hujai bah, maningon butak do ai, anjaha siinumon, na boi inumon humbani parugas ai, maningon butak do ai.
35 Anjaha sagala na nidabuhan ni bangkei ni sisonai ai, maningon butak do ai; atap parmasakan pe ai atap tataring, maningon rosakkonon do ai, butak do ai, anjaha maningon butak do ai bennima.
36 Tapi anggo bah tubuh atap parigi pe, na marisi bah, pansing do ai; tapi ise na manjamah bangkei na ijai ai, gabe butak do ia.
37 Anggo madabuh bangkei ni sisonai ai bani bonih aha pe, na sihol sisaburhononkon, pansing do ai.
38 Tapi anggo isiramkon bah bani bonih ai, anjaha madabuh bangkei sisonai ai hunjai, gabe butak ma ai bennima.
39 Anggo matei pinahan, na boi sipanganonnima, ise na manjamah bangkeini ai maningon butak do ai ronsi bodari,
40 anjaha barang ise na mangankon bangkeini ai, maningon burihanni do pakeanni, anjaha maningon butak do ia ronsi bodari; sonai homa barang ise na mangusung bangkeini ai, maningon burihanni do pakeanni anjaha butak do ia ronsi bodari.
41 Sagala sipanjulur na manjulur i atas tanoh in, hagigi do ai, seng bulih panganon ai.
42 Sagala na manjulur bani boltokni, sagala siompat nahei na manjulur, atap sibuei nahei, sagala sipanjulur na manjulur i atas tanoh in, seng bulih panganonnima, ai hagigi do ai.
43 Seng bulih gabe hagigi dirinima bahenonnima marhitei sagala gilok-gilok sipanjulur; seng bulih pabutakonnima dirinima marhitei ai, ase ulang gabe butak hanima.
44 Ai Ahu do Jahowa Naibatanima, halani ai papansing hanima ma dirinima, ase gabe pansing hanima, ai na pansing do Ahu. Seng bulih pabutakonnima dirinima marhitei atap aha pe sipanjulur, na manjulur i atas tanoh in.
45 Ai Ahu do Jahowa, na mamboan hanima tangkog hun tanoh Masir, ase Ahu gabe Naibatanima; halani ai maningon pansing do hanima, ai na pansing do Ahu.
46 On ma titah pasal pinahan, pasal manuk-manuk ampa pasal haganup na manggoluh, na manggulmit ibagas bah, ampa haganup binatang-binatang, na manjulur i atas tanoh in,
47 ase ibotoh hanima parleganan ni na mabutak humbani na mapansing, ampa parleganan ni pinahan na bulih panganon humbani pinahan na so bulih panganon.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA