Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Side pade harus tetep idup dalem kasih sopoq kance saq lain maraq semeton.

² Ndaq berat angende bẽng nyodoq dengan-dengan pendateng. Sẽngaq siq ngelaksaneang hal nike, ndẽqne sadar araq pire dengan saq sampun nerimaq malaẽkat lẽq balẽne.

³ Pade inget lẽq dengan-dengan saq araq lẽq dalem bui, anggep diriqde ẽndah araq lẽq dalem bui bareng kance ie pade. Dait dengan-dengan saq semẽlẽ-mẽlẽ teperlakuang, side pade harus inget lẽq ie pade maraq side pade ẽndah teperlakuang maraq nike.

⁴ Selapuq dengan harus nyatayang rase hormat lẽq janji nikahne, nike lantaranne senine-semame harus setie sopoq kance saq lainne. Dengan saq gawẽq perbuatan saq cabul dait dengan saq bezinah gen teadilin siq Allah.

⁵ Ndaq idupde tejariang panjak siq kẽpẽng, laguq side pade harus merase puas siq napi saq araq lẽq side. Sẽngaq Allah sampun bemanik, "Tiang tetu-tetu ndẽq gen ngalurang side dait Tiang tetu-tetu ndẽq gen bilin side."

⁶ Keranaq nike ite bani matur, "Tuhan nike Penulung tiang, tiang ndẽq takut. Napi saq bau tepiaq siq manusie lẽq tiang?"

⁷ Ndaq lupaq lẽq pemimpin-pemimpinde saq nyampẽang Manik Allah tipaq side. Perhatiang berembẽ lẽq penutuq idup ie pade dait turut teladan ie pade.

⁸ Deside Isa Almasih tetep pade, timaq laẽq, mangkin dait jangke selaẽq-laẽqne.

⁹ Ndaq alurang diriqde tepiaq sesat siq pengajahan-pengajahan saq ndẽq keruan. Atẽnte harus teteguqang siq rahmat Allah, nike saq solah; ndaq lantaran aturan-aturan mengenai keloran. Dengan-dengan saq laẽq taat lẽq aturan-aturan nike, ndẽq mauq manpaatne.

¹⁰ Ite bedowẽ sopoq mẽje taoq kurban jari ngaturang kurban tipaq Allah. Dait dengan-dengan saq ngelayanin lẽq dalem Kẽmah Tuhan, ndẽqne berhak ngelorang kurban saq araq lẽq atas mẽje taoq kurban nike.

¹¹ Daraq binatang saq teaturang jari kurban pengampunan dose, tejauq siq imam agung ojok Ruang Mahesuci, laguq bangkẽ binatang nike tetunuq lẽq luah kẽmah.

¹² Nike lantaranne Deside Isa ẽndah ninggal lẽq luah jebak belẽq kote jari persiq umat-Ne lẽman dose siq daraq-Ne mẽsaq.

¹³ Keranaq nike, silaq ite parek tipaq Ie lẽq luah perkẽmahan dait milu tehine bareng kance Ie.

¹⁴ Sẽngaq lẽq gumi ndẽq araq taoq ndot saq kekel umaq ite; ite boyaq kote saq gen dateng.

¹⁵ Keranaq nike, siq perantare Deside Isa, ite harus tetep memuji-muji Allah; nike jari kurban syukurte tipaq Ie, saq ite aturang langan ucapan jari mulieang pesẽngan-Ne.

¹⁶ Ndaq lupaq piaq hal saq solah dait saling tulung, sẽngaq niki kurban-kurban saq nyenengang Allah.

¹⁷ Pade taat lẽq prẽntah pemimpin-pemimpinde, dait pade tunduk lẽq ie pade. Sẽngaq ie pade tetep merhatiang jiwende, dait ie pade harus betanggung jawab tipaq Allah. Lamun side pade taat lẽq ie pade, ie pade bau begawẽan siq angen saq seneng; lamun ndẽq, make ie pade gen begawẽan siq angen saq sedih, dait hal nike ndẽq gen miaq side pade untung.

¹⁸ Pade terus do'eang tiang pade. Tiang pade yakin atẽ nurani tiang pade bersi. Sẽngaq lẽq dalem selapuq hal tiang pade tetep mẽlẽ ngelaksaneang napi saq kenaq.

¹⁹ Terutame sanget siq tiang tunas, adẽq side pade do'eang tiang adẽq Allah gelis gadingang tiang tulak ojok side.

²⁰ Allah sumber damẽ sejahtere, langan daraq perjanjian saq kekel, sampun jauq tulak lẽman tengaq-tengaq dengan ninggal Pengarat Agung selapuq dombe, nike Deside Isa Almasih, Junjungante Saq Mulie.

²¹ Semoge Allah sumber damẽ sejahtere nike nyempurneang side pade siq selapuq saq solah saq side pade perluang jari ngelaksaneang pekayunan-Ne. Semoge siq perantarean Deside Isa Almasih, Allah ngelaksaneang napi saq Ie kayunang lẽq dalem ite. Bagi Ie kemuliean selaẽq-laẽqne! Amin.

²² Tiang tunas adẽq side pade rẽde perhatiang selapuq nasẽhat-nasẽhat tiang niki, sẽngaq surat tiang niki ndẽqne bẽlo.

²³ Side pade harus nenaoq bahwe semetonte Timotius sampun lumbar. Lamun ie sampun dateng ojok tiang, laun tiang kance ie jangoq side pade.

²⁴ Sampẽang salam tiang pade tipaq selapuq pemimpinde dait tipaq selapuq dengan-dengan saq tehususang bagi Allah. Terimaq ẽndah salam lẽman semeton-semeton lẽq Italia.

²⁵ Rahmat Allah araq bareng kance side pade.

Ibrani

Video Ibrani 13

Ikuti Kami:

KONTAK | PARTISIPASI | DONASI