Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Hagani keti tetap mengasihi peperda keti sebagai jelma-jelma Kristen sai bemuari.

² Dang segan nerima di lambanmu jelma-jelma sai makkung keti kenal. Mani jama ngelakuko injuk reno, pernah jelma, tanpa sadar, radu nerima malaikat di lambanni.

³ Ingokdo jelma-jelma sai delom bui, seolah-olah keti juga wat delom bui jejama jama tian. Rik jelma-jelma sai diperlakuko sewenang-wenang, hagani keti ingok jama tian seolah-olah keti juga diperlakuko injuk reno.

⁴ Sunyin jelma harus nunjukko sikap hormat tehadap perkawinan, udi sebabni hagani rua mekajong setia peperda tian rua. Jelma sai hajor rik jelma sai bezinah haga diadili ulih Allah.

⁵ Dangdo hurikmu dikuasai ulih cinta jama duit, kidang hagani keti puas jama api sai wat jama niku. Mani Allah radu cawa, "Nyak mak haga naganko atau haga ninggalko niku."

⁶ Ulihni seno ram bani cawa, "Tuhan iado Sai Nulungku, nyak mak merabai. Api sai dapok manusia lakuko tehadapku?"

⁷ Dang lupa jama jelma-jelma sai mimpin niku sai nyampaiko luhot Allah jama niku. Perhatikodo injuk repa tian hurik rik injuk repa tian mati, rik cuntohdo iman tian.

⁸ Isa Almasih tetap gegoh jak tumbai, tano, rik sampai selama-lamani.

⁹ Dang naganko sunyin macam ajaran sai aneh-aneh nyesekko keti. Hati ram harus dikuatko ulih kebetikan hati Allah, udido sai betik; dang ulih atoran-atoran tentang kanikan. Jelma-jelma sai tumbai naati atoran-atoran ano mak mansa faedahni.

¹⁰ Ram ngedok sai mezbah untuk mempersembahko kurban jama Allah. Rik imam-imam sai ngelayani di delom Kemah Tuhan, mak berhak nganik kurban sai wat di atas mezbah udi.

¹¹ Rah binatang sai dipersembahko sebagai kurban untuk pengampunan dusa, diusung ulih imam agung mik Ruang Mahasuci, kidang bangkai binatang udi tenggalan disuah di luah perkemahan.

¹² Udido sebabni Isa juga mati di luah rangok gerbang kota untuk ngecahko umat-Ni jak dusa jama rah-Ni tenggalan.

¹³ Ulihni seno, ijado ram mik jama Ia di luah perkemahan rik nutuk dihina jejama Ia.

¹⁴ Mani di bumi mak ngedok rang tinggal sai kekal untuk ram; ram nyepok rang tinggal sai haga ratong.

¹⁵ Ulihni seno, liwat Isa, hagani ram selalu memuji-muji Allah; ano merupako kurban syukor ram jama Ia, sai ram persembahko liwat cawa dibeber untuk ngemuliako gelar-Ni.

¹⁶ Dang lupa ngelakuko sai betik rik saling setulungan, mani injido kurban-kurban sai nyenangko hati Allah.

¹⁷ Tutukdo perintah jelma-jelma sai mimpin niku, rik tundukdo jama tian. Mani tian selalu merhatiko jiwamu, rik tian harus betanggung jawab jama Allah. Kik keti taat jama tian, tian dapok beguai jama senang hati; kik mawat, maka tian haga beguai jama sedih hati, rik udi mak nguntungko keti.

¹⁸ Terusdo bedua untuk sekam. Sekam yakin hati sekam murni, mani delom sunyin hal sekam haga ngelakuko api sai benor.

¹⁹ Khususni kumohon nihan, in keti ngeduako nyak in Allah geluk ngusung nyak muloh jama niku.

²⁰ Allah radu ngehurikko Tuhan ram Isa jak kematian. Mani kematian-Ni ano Ia tano jadi Gembala Agung bagi ram, yakdo biri-biri-Ni. Kematian-Ni ano juga ngesahko perjanjian kekal sai disani Allah jama ram.

²¹ Semoga Allah sumber sejahtera udi ngelengkapi keti jama sunyin sai betik sai keti perluko untuk ngelakuko kehaga-Ni. Semoga liwat perantaraan Isa Almasih, Allah ngeguaiko di delom ram, api sai dimirakko-Ni. Hagani Almasih dipuji selama-lamani! Amin.

²² Nyak ngilu in keti sabar ngeperhatiko petuah-petuahku inji, mani suratku inji mak terlalu kejung.

²³ Hagani keti pandai bahwa puari ram Timotius radu dibebasko jak bui. Kik ia radu mik rangku inji, nyak haga ngusungni waktu nyak napol keti kanah.

²⁴ Sampaikodo salam sekam jama sunyin jelma sai mimpin niku rik jama sunyin umat-Ni Allah. Terima juga salam jak puari-puari di Italia.

²⁵ Semoga Tuhan ngeberkati Puari sunyinni.

Ibrani

Video Ibrani 13

Ikuti Kami:

KONTAK | PARTISIPASI | DONASI