Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pakakakěndagẹ̌ko sidutu i kamene sěmbaụ su wal᷊ine lawọ taumatan Sahani anạ u sěngkatau.

² Abe ghoẹ̌ i kamene měnarimạ u taumata raghị su wal᷊eng kamene. Batụu pẹ̌kakoạ kerene, kai wọu nariadi kụ piạ taumata kụ tawe nikahěnganeng kutẹu kawe nạung něnarimạu malạekatẹ̌ su ral᷊ungu wal᷊ene.

³ Pěmpẹ̌tahěndung apang mạtatahungkụ e, mẹ̌sul᷊ungu l᷊ai i kamene kạtatahungkụ sěngkatahungkụ dingang i sire. Kụ i sai-saịeweng balạewe koạ i kamene e, pẹ̌tahěndung bue u i kamene mal᷊aing kẹ̌koateng kerene.

⁴ Patikụ taumata e harusẹ̌ měnodẹ u lulune maadatẹ̌ su hal᷊ẹ̌ u pẹ̌kakawing, u kai ene hakịu pẹ̌sěngkawingang e harusẹ̌ pakasatia sěmbaụ su wal᷊ine. Taumata taha pẹ̌sundal᷊ẹ̌ e ringangu taumata nawuang sarung ihukungu Mawu Ruata.

⁵ Piawe pẹ̌bawiah'i kamene pẹ̌kawasaěngu ěnning su roitẹ̌ e, kaiso pěmpẹ̌kětạbeng apang piạ su watangengu. Batụu Mawu Ruata e seng něhengetang, "Iạ e tawe sarung mapakawala arau sarung maněntang i kau."

⁶ Batụu ene i kitẹ e wahani makapẹ̌bera u, "Mawu e kai Mẹ̌tul᷊ungu iạ, iạ e tawe matakụ. Kaia koatengu taumata e si siạ?"

⁷ Abe kiwul᷊ei manga měngangahạ si kamene e kụ mělẹ̌habaru hengetangu Mawu Ruata e si kamene. Kakěllaiko kereapa i sire měmpẹ̌biahẹ̌ e, ringangu kereapa i sire měngkairị e, ringangu pěmpẹ̌těnnoko pangangimang i sire e.

⁸ Mawu Yesus Kristus e těbewe mẹ̌sul᷊ung, baẹ kal᷊imona, orasẹ̌ ini, ringangu sarang marěngụ-děngụ.

⁹ Kumbahang i kamene mangonggọu loahe su kal᷊awọu haghin těntiro makạl᷊aherang kụ makapal᷊idẹ̌ si kamene. Naung i kitẹ e harusẹ̌be toghasengu kapian naungu Ruata e, u kai ene e mapia, kumbahangbe kawe ual᷊ingu manga kal᷊awọu atorangu pal᷊ahungkaěng. I sai-sain nạung kal᷊amona e tutuhụ kal᷊awọu atorang ene e tawe makahombang ual᷊ine apa.

¹⁰ I kitẹ e kai piạ pananěmbaěng i kitẹ sěmbaụ pěmamělokangu sasěmba su Mawu Ruata. Dingangu manga imang kụ mětẹ̌tangkiang su ral᷊ungu selong pẹ̌kakal᷊iomanengang, ute tawe wotonge kuminạ sasěmba kạpapěllọ su wowon pananěmbaěng ene.

¹¹ Dahang binatang kụ isẹ̌sěmba kere laonggọ baugu ipěngampung dosa, kawe nịbawawang imang mawantugẹ̌ e sol᷊ong dal᷊ungu Huang Kasusiange arawe kasuangu binatang ene e sẹ̌sane nitongkạ su l᷊ikudu raseng.

¹² Kai ual᷊ingu ene hakịu Mawu Yesus mal᷊aing napohong su l᷊ikudu pasěllangengu soa e waugu ipěmurẹ̌si umate wọu rosa e ual᷊ingu rahan'E sẹ̌sane.

¹³ Ual᷊ingu ene tangu mahịe i kitẹ e makoạ sol᷊ong anun'E sul᷊ikudu selo e mase manal᷊udẹ̌ sasamedẹ̌ sěngkapěnal᷊udẹ̌ dingang'E.

¹⁴ Batụu su dunia ini e tawẹ apa pẹ̌tatanakeng sarang marěngụ e waug'i kitẹ e; i kitẹ kai mědeạ pẹ̌tatanakeng kụ sarung damahi.

¹⁵ Ual᷊ingu ene, lumiung Mawu Yesus e, i kitẹ e hinong sidutu mẹ̌dẹ̌dalo Mawu Ruata; u ene kai makoạ kere gaghěllị tatarimakasẹ i kitẹ e si Sie kụ isěmbang kitẹ e wọu wuạen biwihẹ̌ baugu mẹ̌dalo areng'E.

¹⁶ Abe kiwul᷊eng mẹ̌koạ mapia e ringangu mẹ̌tatul᷊ung, batụu kai ini e manga gaghěllị kụ makal᷊uasẹ̌ naungu Ruata e.

¹⁷ Pakatatuhụ bue su manga parentang měngangahạ i kamene e, ringangu pakasasuměllung bue si sire. Batụu i sire e sidutu měnẹ̌nahimata himukud'i kamene, dingangu i sire e hinong mẹ̌těngong sasimbang i sire su Mawu Ruata e. Kamagengu i kamene matuhụ si sire e, ute i sire makapěmunarawe ringangu naung mal᷊uasẹ̌; arawe mạeng u tala ute; i sire sarung piạ karal᷊umběhạ e měmpěmunara e kụ ene tawe makapẹ̌barauntu si kamene.

¹⁸ Sěntiniạbe pěmpẹ̌kal᷊iomaneng baug'i kami e, u i kami e mạngiakingu naung i kami e matilang, batụu i kami e sidutu mang mapulu mẹ̌koạ ene tuhụewe katul᷊ide.

¹⁹ Kụ napal᷊iụewe makapědẹ̌dorong si siạ e sěngapang botonge, tadeạu i kamene měmpẹ̌kal᷊iomanengbeng iạ e. Pẹ̌kal᷊iomanengko tadeạu Mawu Ruata e karimakọ měngkai limembong kal᷊ighạ e mẹ̌bawa si siạ kapia sol᷊ong anung kamene.

²⁰ Mawu Ruata e seng namiahẹ̌ Mawung kitẹ i Yesus Kristus bọu papate. Ual᷊ingu papatene, orasẹ̌ ini e i Sie seng nakoạ Mělal᷊ukadẹ̌ Mawantugẹ̌ si kitẹ manga dombane. Papatene ene mal᷊aing mạněgadẹ̌ pẹ̌dariandi kakalẹ̌ nikoạ u Mawu Ruata e ringang'i kitẹ.

²¹ Mal᷊owọko Mawu Ruata puěngu karal᷊unsemahẹ̌ e mapakasukụ i kamene e ringangu patikụ apang mapapia e ghẹ̌gausang i kamene e waugu mẹ̌koạ apang kapulun'E. Mal᷊owọko lumiun Mawu Yesus Kristus e, Mawu Ruata e mẹ̌karadiahang su ral᷊ung i kitẹ e, apạeweng ilẹ̌ěnning'E. Kụ apakaraloko i Kristus e sarang marěngụ-děngụ! Aming.

²² Iạ mědẹ̌dorong tadeạu i kamene měmpěnaung bue kal᷊awọu sasaku ini e ringangu kasasabarẹ̌, batụu suratẹ̌ku ini e tawe tumanị e manandu.

²³ Kěngkasingkạ bue i kamene u anạ u sěmbaụ i kitẹ i Timotius e seng niapasěbang bọu ral᷊ungu tahungkụ e. Kereu i sie seng damahi sol᷊ong tampạku ini e, i sie hědong takụ paringaneng su tempong iạ mẹ̌tiwo si kamene sarung.

²⁴ Paul᷊ịkong tabeạ i kami su apang měngangahạ si kamene ringangu su patikụ kawanuan Duata. Tarimạko l᷊ai tatabeạ u manga anạ u sěmbaụ bọu Italia.

²⁵ Mal᷊owọko Mawu e měngal᷊amatẹ̌ si kamene manga anạ u sěmbaụ patikụ.

Ibrani

Video Ibrani 13

Ikuti Kami:

KONTAK | PARTISIPASI | DONASI