Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Allah fahet fag toho hiyag nisaruk inap arimano anggolo wereg lit hinan hag toho hililip toho kilap nenesuhen anggin angge nunubam werehon men siyahonen walabit wat nenesuhon men nunubam se amag ulug nonggoloho umbusul. Pupu angge laruk lit ap sa tam atmisi ulug laruk lamuhup ulug hiyag nisarisi ane hikit toho sat kel ta fug angge ninine roho laruk lamuhuk.
2 Laruk lit Nonowe Yesus ninil ki roho yet haruk lit welamul. At ino Ubam ninindi wenggel haruk laheyon ino fam hondog neneplug laruk lit mondabi fanoma nunumbahik laruk. At ino fanoma wereg lit Ahiyeg toho welalep angge famen aben Inggaliyap turukmu osokowa fisibareg teltuk ahan ha ribag. Teltuk ahan ha ribareg Allah inggik pikit fil lehoma hur atfareg wereg.
3 Ap siyag ane turuk inaben alem angginon ari At ubam imbibagma Indi yuwag toho wereg lit ha ribag ane honoluk toho welamok. Hit hinindi anggin toho wereg lit hinilaheg amuhup tohon yet teg lamok.
4 Hiren siyag ane fam wal-wal amul ulug yik aptukmu mep wilip am fug angge hininggik yik eneg aptuk latikip.
5 Hit An namlohoki welahep ulug hunubam uruk lit komo heneptuk ane henepeleg atisi? "Namloho, haren Ninikni Allahn komo haptuk ane fahet apma reg puk fug. Komo haptuk lit pet haptuk halug hindi anggin toho wenggel ha fug.
6 Ninikni Allahn ap Indi enesug inap arimano Ele ine roho komo eneptuk, Namloho ulug wenggel harukon ino fano welamag ulug Ele olok toho pet turuk lit Inggiken watuk."
7 Alem angginon hunubam atuk halug Allahn An numalikisi hag toho welahep ulug komo heneptuk. Umalikisi inikniyen ele ine roho komo eneptuk elehon wereg ano?
8 Ap obog toho unubam alem angginon emberuk hag toho hit hunubam oho alem emberuk eleg halug hit hiniknisi elehon hag toho wereg lit iknileg eneg welahep.
9 Niniknisi yuhonen enele ine roho pet neneptuk latusama nit nenekol toho wereg lit enele holtuk latukuk. Holtuk latukuk anggeyen nit nonoluk welamuhuken poholma kinangma wereg angge Inikni ele holuk fug angge welahe ha reg?
10 Niniknisi yuhon arimanowen il misig eneg iren peruk latusa ane roho enele ine roho komo neneptuk latusa. Komo neneptuk latusa angge famen At inowen An men mangno roho fanoma welamuhuben nit fahet eneg Indi wenggel haruk lit Ele ine roho komo neneptuk.
11 Alem angginon obog toho atam ap unubam atuk halug ap ino ahiyeg toho welam fug angge ahummu siyag toho wereg. Ari roho wereg angge famen alem unubam atukon inowen milal eneptukmu it arimanowen anggen fanowon yihik feruk lit inindi yuwag atukmu pikir ane eneg turuk.
12 Ari fahet te hininggik wiyig toho werehon ineyap taruk lit hunuyug elek turukon henelenggen kiyap taruk lamok!
13 Hunuyug siyahon suwani yako waruhu rohon ke pikit toho hale ferukon fam laruk lit hunuyug wirik toho soptuk lamuhupmu hunuyug siyahon fano aruhu.
14 Ap obog toho men mangno roho wereg lit fano ane turuk lamuhuben yami ruruk lamuhup. Ap san fano ane turuk eleg halug Allah hahu fug.
15 Ap misihen Allah indi enesuhon ino embeselug lahu rohon kahaleg lamuhup. Yabukmu sarongge kilaptuk lahepma mun angge man angge siyag atuk hag toho ap anggolo siyag amuhup tohon honoluk toho welamuhup.
16 Pabi-pabi ane turuk lit hun Esau abuwaben tibag hag toho turuk lamuhup fug. At inowen abuwaben suburu osohowon namin pibareg wandabon welahi angge famen ilabowon atmin ibag.
17 Fobik welatfareg nikniyen Allah unuk fam hi napmisi pibag angge famen hi ribag fuhon ari hit honoluk. Uba anggolo yatfag angge famen inggarehen siyag ane tibahon ino hebeloho fanowap tuk fug teg latfag.
18 Hit tom alma waharikibon ino tom Sinai hininggik fam sen hawon alma waharikip fug. Indok ambulpul uloglog turuk lit hinan hililip tehen hik tegma siyelu fu rurukmu tom ino alma waharikip fug.
19 Tom ino fam pinggong ele humon uruk lit Ele anggolo urukmu it holtuk latfag inap arimanowen nit nunubam Hele nin eke uk fug ulug heng tibag.
20 "Wam oho tom ino alma laruk halug helep fam ware fesiyok," ulug komo enepfag ane ino anggin tehen enekol toho welatfag.
21 Tom ino famen turuk ane it arimanowen yet hibareg enekolen hirimuruk turuk latfagma Musan oho, "An oho nakol hihireg nuwag elek turuk," ibag.
22 Hit Sion punumu waharikip. Allah oluk werehon ino Ibam Yerusalem poholmon malaikat teng-teng angge luhaloho weregma ap anggolo oho enehiyehen palu roho wereg ambeg hir oho enembeg waharikip.
23 Allah umalikisi wandabon ununuk suwesingga fam haharoho poholma forohowon men Allahn ap obog toho minggir enebuhuwon ino men ap inindi fanowon tam palimuwap eneptisiyon enehime men palu roho weregma iniraham waharikip.
24 Allah sali keron imbibahon ino teko lahu ulug Yesus pulmu wereg lit yet harukon ino weregma waharikip. At amep unubam ketne reberuson ino Habel amep hag toho welam fug angge mep ele ine anggolo roho urukon wereg.
25 Ele hunubam hiyag hisarukon ino henembol fil aruhu rohon yet teg lamok. Allahn kinangma Ele urukmu enembol yig Itfag inap arimano fano wilip atfag fugmu wene poholman hiyag nisarukon nenembol yig Utuk halug fano wilip ahe ha reg?
26 It welatfag li arimano Allahn ele urukmu kinang yuk tibag. Ketiya nit welahe li oho Allahn ele uruk lit, "Nin fobik eke Anden kinang eneg yuk isahuk fug, poholet kinanget yuk isahuk," ulug sali imbibag.
27 Aren "nin fobik eke" yuk isahu ane fahet nit hiyag nisaruk lit mun angge man angge wal tiyag angge yuk turukon arimano nin aruhumu yuk turuk eleg angge mondabi welaruhu ulug seleg toho hiyag nisaruk.
28 Nori, yuk turuk eleg ambeg ino nit ngi amuhuken Allah fam Ninikni uruk lit At indimuwen fano perukon hikit toho let turuk lit nenekol toho wereg lit At hi ruruk lamuhuk.
29 Ninikni Allah ino indok ambulpul ulog turukon hag toho wereg.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA