1 Ule, soaáḷ kita tontanií, kon libumai naton na'a in nobayongbií totok in nobalií saksi! Manangka intua, koligai ḷumbuíondon naton im bayongan inta mokoyoyiga ko'i naton bo dosa inta umuran mo'i-kompit makow ko'i naton. Bo koligai mositandingan ing kita mogaid kon onu inta pinoki aid ko'i naton.
2 Mogaid ing kita kon tua takin umuran mopirisaya ko'i Yesus, sin Sia tuata inta nopobangon kom pirisaya naton bo umuran noḷukad kom pirisaya naton nongkon pinomangkoianpamai dapot im pangabisannya. Nonahangbií ing ki Yesus iyoyiga kong kayu pinoyotalempang! Diaíbií pinandung-Nyamai im matoi kong kayu pinoyotalempang tua totokbií im moko'oyak. Tongaíbií ḷunganga inta korasa'an-Nya kon singgai mo'iduduimai in umuran pinonorop-Nya makow. Bo tana'a makow, Sia ilimituídon kon dotaí ing koḷanan i Allah bo nomarentah noyotakin-Nya.
3 Toropkah monimu naonda ing kororiga i Yesus sinumayow kon intau mita dinosa inta noramiji totok moḷawang ko'i-Nia! Tuamai umuranbií korigon ing gina bo umuran moharap.
4 Sin wakutu i mo'ikow moramiji totok moḷawang kon inta diaí mopia, diaípabií dodai onda mo'ikow nobakuat dapot iḷuaian duguí.
5 Bo dikabií liongon monimu in tonggina mita i Allah tana'a, inta inogoi-Nya ko'i monimu saḷaku ki adií-Nya mita: "Adií-Ku, tarukiradon kopira totok in totunduí i Tuhan, bo dikabií tumontoḷ aka toruían-Nya in ikow.
6 Sin sambokonbií i Tuhan intau mita inta kotabi-Nya, bo sambokon-Nyabií in intau inta inaku-Nya saḷaku ki adií-Nya."
7 Tarimabií monimu aka sambokon i Allah im mo'ikow. Sin Sia mosambok saḷaku ki Amaí naton. Sin diaíbií tobatuímai adií tongaí pomayak makow diaí sambokon i amaínya aka mogaid kon inta diaí mopia!
8 Aka mo'ikow diaídon mo'itakin sambokon naí mongoadií mita ibanea na'a, yo tua mangalenya mo'ikow de'eman bidon ki adií-Nya totokea, ta'e uatok bidon.
9 Kon dunia na'a oyuíonbií ing ki amaí naton. Sia motunduí ko'i naton, ta'e hormatonbií naton in sia. Bambií kabií ki Amaí naton kon soroga, tantuí mustibií ing kita tumonsiup ko'i-Nia simbaí mobiag ing kita.
10 Aka guyanga naton kon dunia na'a im motunduí yo noterbatasbií sin tongaíbií onu inta inanggap monia mopira. Ta'e aka ki Allah im motunduí yo tua ing kopia'anbií naton tontanií. Simbaí kita moko'ulií doman kon silai inta mopia nongkon i-Nia.
11 Totu'ubií kon kowakutu ing kita sambokon, diaíbií mosanang ing gina naton, sedang bo monakitbií totok. Ta'e mo'iduduimai kon tua, kita inta sinambok, yo sambok tatua im momaḷuibií kon oaíid naton, sahingga ing kita nobiagdon podudui in ibog i Allah, bo bungainya kon tua im mosangdon totok ing gina naton.
12 Tuamai, koropot in limamu inta nolemeí bo duḷudmu inta mo'uyot tua!
13 Bo umurandon bayak kon daḷan inta motondodai, simbaí sioḷmu inta nopeḷong tua diaí molitoi, ta'e mopia bidon.
14 Poramiji umuran mobiag motompia takin bayongan intau. Poramiji doman mobiag mokudus takin i Tuhan. Sin diaíbií tobatuímai intau moko'ontong ko'i Tuhan aka diaí mobiag natua.
15 ḷukadaibií simbaí diaí tobatuímai intau ḷumuai nongkon kobiagan inta pinodoyon kon totabi i Allah, simbaí diaí im mobalií rasum inta mokopomukaí kon ropatoi bo inta mokogoguya'at kong kobiagan intau mobayong.
16 ḷukadaibií doman simbaí diaí in intau mobiag mokotor andeka doií moguntun kon soaáḷ mita inta nongkon i Allah, naí inta inaidan i Esau. Sia nobarani totok nopotaḷui in haknya saḷaku adií guya-guyang tongaí lantaran ka'anon topindan.
17 Simbaí kota'auan monimu, naonda ing ki Esau mo'ibog moko'ulií kom barakat nongkon i amaínya, sia sinolak. Sin umpakahbií takin ombaḷ sia motayak kon daḷan mopoyotutui kon onu inta no'itaḷaí, ta'e diaí bidon ing kasampatannya.
18 Utat mita, mo'ikow in diaíbií mamangoi tumayow kon naí inta sinayowan in intau Israel kolipod. Mosia moyogintayow onu inta koliaian, naí umpamanya buḷud Sinai bo tuḷunya inta kodoko-dokot; mosia noyogintayow in sindip, bo ka'ada'an inta diaí totok motarang bo tompot moropot.
19 Mosia sinumayow kon singog in terompet, bo singog inta totok moko bongom-bongoḷ. Bo naonda intau mita Israel nokodongog kon singog tatua, nopo'igum totok im mosia simbaí singog tatua diaídon mosingog ko'i monia.
20 Si mosia diaídon mokotahang mokodongog kom parentah inta pinoyaput in singog tatua. Sin singog tatua noguman, "Bayongan inta nolia kom buḷud tana'a, mahaḷuk ande ki inekabií, yo mustibií arabon im batu dapot im matoi.
21 Inta inontong in intau mita Israel tua moko'ondok totok dapot ki Musa nosingog nana'a: "Mo'ondok bo mo'uyot in aku'oi!"
22 Tongaí aka mo'ikow namangoidon im buḷud Sion bo kotaí i Allah inta nobiag, tuata in Yerusalem inta kon soroga takin ribuan malaekat-Nya.
23 Mo'ikow sinumakin kon tobatuí pinoyodungkuḷan inta morame totok, pinoyodungkuḷan adií mita guya-guyang i Allah, inta pinaisdon in tangoi monia kom bonu in soroga. Mo'ikow namangoi sinumayow ko'i Allah hakim im bayongan intau na'a. Mo'ikow sinumayow kon roho mita intau mopia inta ain sinompurna.
24 Mo'ikow namangoi sinumayow ko'i Yesus, tonsigad in dodandian inta mobagu tua; mo'ikow sinumayow kon duguí pinomisik inta nojamin kon soaáḷ mita inta lebe mopia nongkon onu inta jinamin in duguí i Habel.
25 Manangka intua mokopo'ingat, sin dikabo mo'ikow doiídon mokidongog ko'i Nia inta nosingog tatua. Mosia inta doií mokidongog ko'i Nia inta namangoi in dunia na'a bo inta nopoyaput ing koyow nongkon i Allah, diaíbií mokoḷagui. Apa doman kita na'a inta nokodongog ko'i-Nia inta nosingog nongkon soroga! Aka kita bo doií mokidongog ko'i-Nia, yo diaíbií mokoḷagui ing kita!
26 Kowakutu intua singog-Nya moko-gempar kon dunia na'a. Ta'e tana'a makow Sia nodandi, "Komintanpa doman Aku'oi momia kon inta moko-gempar, de'emanbií tongaí kon dunia na'a ta'e kon ḷangitbií doman."
27 Tosingogon, "Komintapa doman" mogumanbií kom bayongan dunia inta aim pinomia na'a in danduíon bo ḷumbuíon, simbaí dongkadon inta diaí modanduí ing kotaḷaían.
28 Tuamai, kita musti umuran mopoyaput in sukur ko'i Allah, sing kita im motarima kon tobatuí karaja'an inta diaí modanduí nongkon i-Nia. Kita musti mopoyaput in sukur bo mo'ibadah ko'i Allah takin mohormat bo mo'ondok, podudui onu inta kino ibog-Nya tontanií.
29 Sing ki Allah naton naonda bo tuḷu inta mokopokak.

Studi Alkitab lengkap, silahkan lihat Alkitab SABDA :: Ibrani 12
Studi Alkitab mobile, silahkan lihat Alkitab Mobi :: Ibrani 12

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke