Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ho, ěndaibe i kitẹ hala e tẹ̌tal᷊iwungang u sahidi kereng kakěpal᷊e! Ual᷊ingu ene tangu i kitẹ e měměllọkong kal᷊awọu apang mẹ̌měhạ si kitẹ e, dingangu rosa e sěntiniạ měngkate mětẹ̌těnděkạ si kitẹ e. Kụ i kitẹ e pakatatoelẹ̌ bue su pẹ̌tandungang tẹ̌tatěngoěng i kitẹ.
2 Kụ timonang kitẹ e pakatuntụbe sol᷊ong anun Mawu Yesus, u kai i Sie namangung pangangimang i kitẹ e dingangu nẹ̌padul᷊i wọu tětạe sol᷊ong pangěnsueěnge. Mawu Yesus mědẹ̌dararagu sigěsạ su kalu kuruisẹ̌! I Sie tawe mẹ̌dariang mate su kalu kuruisẹ̌ e kawe apạ e makamea. I Sie kětạeweng mětẹ̌tahěndung karal᷊uasẹ̌ kụ sarung kapěndangeng'E su samurine. Orasẹ̌ ini e i Sie mạiang su koanengu kal᷊aianengu Mawu Ruata, kụ mẹ̌pẹ̌parenta sěngkapẹ̌parenta ringang'E.
3 Kěnnang pěngěnna kai kereapa sigěsạ u Mawu Yesus tụtatěngo ral᷊awangu taumata waradosa kụ kereng katědụ e! Ual᷊ingu ene tangu abe pěmpẹ̌těngkal᷊omeng naung i kamene ringangu abe kěngkapěndụ.
4 Batụu su ral᷊ungu pẹ̌kakaradiahang i kamene mẹ̌sekẹ u rosa e, bědangbe lain tawe měsẹ̌sekẹ sarang tẹ̌dokangu raha e.
5 Dingangu abe kiwul᷊ei sasasang Mawu Ruata e, kụ seng nionggọ si kamene kere manga anạ'E: "Anạ-Ku, pakatitike wue pakapia-pia těntirong Mawu e, dingangu abe kěngkanawo naung'i kamene, kamagengu i Sie lumangehẹ̌ si kamene.
6 Batụu Mawu e mạněntiro apang taumata kụ ikẹ̌kěndag'E, dingangu i Sie mẹ̌gěnggeserẹ̌ si sain-sain kụ niakun'E kere anạ'E."
7 Kụ i kamene pěmpěnarimạ bue papahang u Ruata kere sěmbaụ těntirong sěngkatau i amang. U sude wue mạdiadi kụ anạ tawe papahangeng i amang?
8 Kereu i kamene tawe papahangeng kere kěbị manga rariọ bal᷊ine ini e, ute i kamene wal᷊inewe anạ tutune, kaiso kawe anạ su wela.
9 I kitẹ e kawe piạ i amang i kitẹ su dunia. I sie mạněntiro si kitẹ mase i kitẹ e mạngadatẹ̌ si sie. Kụ limembo miěbạ i Amang i kitẹ marohkẹ̌ su sorga e, nal᷊ahẹ u i kitẹ e hinong sauneng kumakoho si Sie tadeạu i kitẹ e mẹ̌biahẹ̌.
10 Manga gaghurang i kitẹ su dunia e mạněntiro si kitẹ su ral᷊ungu tempo piạ kětakenge, tuhụewe su pěndangeng i sire kawe mapia. Arawe Mawu Ruata e mạněntiro si kitẹ e kawe waugu kapiang kitẹ hala, mědeạu i kitẹ e ipakasusi ringang'E.
11 Kahěngang bue, su tempong i kitẹ e tẹ̌těntiroěng, papahang ene tawe nẹ̌tatal᷊ahino su naung i kitẹ e, kaiso kai makạkasusa. Kai samurine ute, waug'i kitẹ kụ apang seng bọu nitěntiroěng tangu, papahang ene makapěbẹ̌biahẹ̌ si kitẹ e tụtuhụ kapulun Duata, kụ mapěbẹ̌buam pěndangu karal᷊unsemahẹ̌ si kitẹ e.
12 Batụu ene tangu ěndaị hengkẹ takiahu nělome e, ringangu hatedẹ̌ko wukunu kụkende ene!
13 Kụ pěmpahundal᷊engko sidutu sural᷊eng matene, tadeakengu laedu kempal᷊ẹ̌ e tawe mẹ̌gaghal᷊isa, kaiso kawe sauneng mahuntinambang kapiane.
14 Pěmpẹ̌tuměgal᷊ẹ̌ko pẹ̌darame ringangu kěbị taumata e. Pědeạko kasasusi samatang baugu Mawu e. Batụu tawẹu sarang sěngkatau makasilo Mawu e kereu i sie tawe měbiahẹ̌ kerene.
15 Pakatanure wue kumbahang sarang piạu sěngkatau sumẹ̌bang bọu kapiang tatal᷊ěntụ u Mawu e, tadeạu kumbahangbe piạ u makoạ kere kalu makạkilu sutal᷊oarang kamene kụ makasahaghe ringangu makagholang taumata l᷊awọ e kahian daghuse.
16 Pakatanure wue u kumbahang piạu mawuang arau piạ u tawẹ pandungange su pẹ̌bawiahẹ̌ marohkẹ̌ e, kere nạung kẹ̌koateng i Esau. I sie nẹ̌bal᷊ụ u kal᷊aiakange, tumbạeng ual᷊ingu kaěng sělamạ.
17 I kamene masingkạu wọu ene i Esau mapulu makahombang al᷊amatẹ̌ ene wọ'i amange, kutẹu i sie kai nisuhudẹ̌. Batụu manilaing dingangu kakiạ i sie mědẹ̌deạ dal᷊engu měmal᷊ui pẹ̌sasal᷊ane, kai i sie seng tawe nakareạ loahe waugu ene.
18 Manga anạ u sěmbaụ tawe riměnta tumatěngo munara sěmbaụ e kere tẹ̌tatěngoěng u tau Israelẹ̌ e nạung. I sire tụtatěngowe apang hinong ikẹ̌kasaghipo, kụ kai Wul᷊ud'u Sinai ringangu putunge kụ kararamasage ruděllị e; i sire tụtatěngo kararěndung, kasasunaubẹ̌, dingangu rěllang;
19 i sire rụděndengelu wal᷊ěmbengu slompretẹ̌, dingangu tingihẹ̌ měbẹ̌bera maihạ. Ene piạ e tau Israel nakaringihẹ̌ tingihẹ̌ ene, i sire mědẹ̌dorong sěngapang botonge tadeạu tingihẹ̌ ene kuhạ e relaing saụ mẹ̌bisarang sire.
20 Batụu i sire seng tawe makatahang dumaringihẹ̌ laorong tingihẹ̌ ene. Batụu tingihẹ̌ ene kai měbẹ̌bera u, "Kěbị apang kụ měnẹ̌nenggehẹ̌ bul᷊ude ini e tawẹ tiahane měnsang i sie binatang arau walạewe měnsang i sai lai, harusẹ̌ ěntungeng batu sarang pakapate."
21 Apang kụ kinasilon tau Israelẹ̌ e mambeng makạtatakụ sarang i Musa e nakawera u, "Iạ e natakụ dingangu simal᷊ungkende!"
22 Kaiso ral᷊iune, i kamene seng diměnta su wongko'n Sion dingangu su soan Mawu Ruata wiahẹ̌ e, kụ kai i Yerusalem su sorga e ringangkewen manga malạekatẹ̌ e hiwune kal᷊awọe.
23 I kamene němpẹ̌tol᷊e komol᷊ang u ral᷊uasẹ̌ -- pẹ̌sasombangengu manga anạ u Ruata mal᷊aiakang e, kụ areng i sire e mạdarol᷊ẹ̌ su ral᷊ungu sorga e. I kamene riměnta mẹ̌těngon Duata e mělahukungu patikụ taumata e. I kamene tụtatěngong kal᷊awọu rohkẹ̌ u taumata mapia e, kụ seng niapakasukụ.
24 I kamene riměnta mẹ̌těngon Mawu Yesus, Měnanal᷊oara waugu pẹ̌dariandi wuhu ene; i kamene mẹ̌těngon daha nipakatědọ kụ makaual᷊i apạeweng něngalembong kapiane i kaual᷊i wọu rahan Habel.
25 Ual᷊ingu ene pakapapia wue i kamene, kumbahangbe sarang i kamene tawe mapulu rumaringihẹ̌ si Sie kapělẹ̌hengetange. I sire kụ apan tawe mapulu rumaringihẹ̌ si Sie riměnta su dunia ringangu měhabaru hengetang u Mawu e, tawe makakatal᷊angu watangenge. Dumakeleng kate i kitẹ ini kụ dụdaringihẹ̌ si Sie měbẹ̌bera wọu sorga! Kereu i kitẹ tawe mapulu rumaringihẹ̌ e, ute mal᷊iwirẹ̌be kereapa i kitẹ e!
26 Su tempo ene tangu tingih'E nakapẹ̌gẹ̌gahẹ̌ dunia e. Kai orasẹ̌ ini e i Sie nẹ̌kědo, "Sěnsul᷊ẹko l᷊ai, Iạ e sarung mapẹ̌gẹ̌gahẹ̌ e wal᷊inewe kětạu runia e, kaiso kawe lai langị e."
27 Bawera, "sěnsul᷊ẹko l᷊ai e" mělẹ̌lahẹ u kaguwạu dunia seng nariadi sarung kakiokang dingangu al᷊ingang, tadeạu mal᷊ěmbe kate apang tawe makiọ.
28 Ual᷊ingu ene tangu, i kitẹ pakitarimakasẹ bue su Mawu Ruata ringangu ual᷊ingu i kitẹ e nakatarimạ bọi Sie kararatuang sěmbaụ kụ tawe ghuminuẹ̌. I kitẹ e pakitarimakasẹ bue pẹ̌kal᷊iomaneng su Mawu Ruata, pakasasuměllung dingangu piạ takụ e, tuhụewe mẹ̌tatal᷊ahino su kapulun'E.
29 Batụu Ruatang kitẹ e kai mẹ̌sul᷊ungu putung makạhěngisẹ̌.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA