Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali porenta i Musa ojo ewa lengke to taa mayoas mangkonong anu to matao to darata, pei porenta etu taa sewaju pei anu to darata etu. See naka porenta etu taa maya mampasilonga tau to mangangkeni pampue nsira mangampago i Pue Allah. Nempo ponto-ponto to’u sira mandudu ngkani naika mampampueka Ia pampue to sewajuwaju etu, pei palaong etu taa mampasilonga sira.
2 Apa ane monso pu’u tau rapakayongongika raya nsira saba yako ri pampue to napampueka nsira etu, ane ewa see sira damampobuuka dosa nsira ralapamo. Wali ane ewa see, sira tamo damangkeni wo’u pampue to etu kadua ngkaninya, apa raya nsira tamo mangepe sala ri tango i mPue Allah.
3 Pei si’a ewa wetu, apa yako pampue to nakeni nsira ponto to’u etu, see naka sira tare mangkalingan sira tau madosa.
4 Apa si’a yako ri raa nu nsapi to pongka pasi raa nu bembe to pongka naka pei dosa ntau rapalasi yau.
5 Wali see naka tempo i Kerisitu ma’i ri lino si’i, Ia manganto’oka i Pue Allah, to’oNya, “Komi taa mamporani binatang to nasimbaleka ntau Komi pasi pampue to yusa to napampueka ntau resi Komi. Pei Komi re’e mampasigenaka Aku koro to darapampueka resi Komi.
6 Ane pampue to ratunu pasi pampue to nakeni ntau see dosa nsira daralapa, ane ojo to etu taa mampakasanang Komi.
7 Wali see naka Aku, Kerisitu, manganto’o, ‘O Pue Allah, si’imo Aku. Aku ma’i damangika pamporani ngKomi ewa ratulis yami mangkonong Aku ri raya buku rayuyu.’.” Wali etu semo gombo i ngKerisitu resi i Pue Allah tempo owi.
8 Wali manasa ane ewa gombo etu i Pue Allah roomo mamposaka yau samparia pampue to rapake tempo ruyu, pei mangabolosika wo’u pampue to bou, etu semo palaong i ngKerisitu. Kamonsonya ane porenta i Musa, tau taa maya taa mangkeni pampue to tempo ruyu etu, pei pampue etu taa maya mampakalino dosa. Manasa kojo ewa wetu apa ane ewa gombo i ngKerisitu etu, i Pue Allah taa mamporani binatang to nasimbaleka ntau Ia pasi pampue to yusa to napampueka ntau resi Ia. Pasi i Pue Allah taa mamporani pampue to ratunu pasi pampue to nakeni ntau see dosa nsira daralapa. Pasi samparia pampue to etu paka taa mampakasanang i Pue Allah. Panewa roo see i Kerisitu manganto’oka wo’u i Pue Allah, to’oNya, “Si’imo Aku. Aku ma’i damangika pamporani ngKomi.” Wali batuanginya gombo i ngKerisitu etu, i Pue Allah mamposaka yau samparia pampue to rapake tempo ruyu etu panewa mangabolosika wo’u pampue to bou, etu semo palaong i ngKerisitu.
9 (10:8)
10 Wali i Yesu Kerisitu mampolaika pamporani i mPue Allah, pasi mampampueka koroNya resi Ia. Wali yako palaong to i Yesu Kerisitu sangkanija mangika etu, see naka kita mawali i Pue Allah Puenya. Pasi palaong etu tamo parluu raika wo’u kadua ngkaninya.
11 Wali to pampue nu agama nto Yahudi, ponto-ponto eo sira samparia makore mangangika palaong nsira. Pasi ponto-ponto eo sira mampampueka pampue to sewaju-waju, pei pampue to etu taa nakoto mampalasi yau dosa ntau.
12 Pei i Kerisitu ojo sangkanija mampampueka koroNya damangansompo dosa ntau, pasi palaong to nikaNya etu tamo parluu danaika wo’u kadua ngkaninya. Wali ojo karoonya Ia mangika palaong to etu Ia yau nto’u saruga pei matunda ri awe i mPue Allah ri tondo ngkana.
13 Pasi yako tempo etu Ia mangampea-mpeas temponya Ia danawaika i mPue Allah damangangkuasang baliNya.
14 Wali naka pei Ia matunda ri tondo ngkana i mPue Allah apa palaongiNya room. Apa yako pampue i ngKerisitu to samba’aja etu, Ia roomo mampasilonga tau to mawali i Pue Allah Puenya rataka ri singkasaenya.
15 Pasi i Nosa Mapasing mawali matamanasa resi kita mangkonong palaong to etu. Ia manganto’o ruyu, to’oNya,
16 “I Pue manganto’o, ‘Si’i semo parajanji to daKuika resi sira ri tempo to darata, Aku manganto’o, “PorentangKu daKuposaka ri raya nsira pasi daKutulis ri pampobuuka nsira.”’” Etu semo to uyunya nato’oka i Nosa Mapasing kita.
17 Panewa roo see Ia manganto’o wo’u, to’oNya, “Aku tamo damampobuuka dosa nsira pasi sala nsira.” Etu semo gombo i Nosa Mapasing.
18 Wali dosa ngkita pasi sala ngkita roomo nalapas i mPue Allah apa saba pampue i Yesu Kerisitu. Gana kojo palaong to inikaNya etu. See naka tamo re’e batuanginya kita mangkenika i Pue Allah pampue see Ia tamo mangkitanaka dosa ngkita.
19 Wali a’i-a’i, apa saba raa i Yesu, see naka kita tamo meka-meka rayanta masua ri raya nsongi to mapasing kojo damampotango i Pue Allah.
20 Kita masua mangalulu jaya to bou to mangawai katuwu. Wali i Yesu semo to mangawaika kita jaya etu apa Ia roomo mangansia rindi ronto ri wombo nsongi to mapasing kojo etu. Rindi ronto, etu semo raporapaka ewa koro i Yesu.
21 Pasi kita taa seja meka-meka apa kita re’e samba’a to pampue to bae kojo anggaNya to mampasilonga banua i mPue Allah ndate saruga.
22 See naka anu kita mangampago i Pue Allah ri kabuya ndayanta. Apa kita mangansarumaka kojo i Pue Allah damangantima kita. Pasi raya ngkita raporapaka ewa roomo napedasaka i ngKerisitu raaNya to mampakayongo see rayanta tamo mangepe sala ri tango i mPue Allah. Pasi koro ngkita raporapaka ewa rariuka ue to mayongo.
23 Wali anu kita mampakaroso pansarumaka to kita mampongakung pasi ne’e kita bata-bata rayanta, apa i Pue Allah semo to mangika parajanji resi kita pasi Ia maya rasarumaka.
24 Pasi anu kita mampobuuka see tansani ewa wimba dataika masipakaroso rayanta damamporayang sa’e pasi damangika palaong to matao.
25 Ne’e kita mandoo yau siromu sindara-ndara ewa to biasa naika ntau sangga’a. Pei anu kita kanjo’u-njo’u kadota-dota siromu pasi masipakaroso raya apa kita tansani daratamo temponya i Pue dama’i wo’u.
26 Apa ane kita roomo mandonge kareba to monso to yako resi i Pue Yesu pasi manasamo kareba etu, pei roo see kita mamporayaka mampobo’o i Pue, tare jaya to yusa darapalaes apa tare pampue to damangabayar dosa ngkita.
27 Ane tau mangika ewa wetu, matantu sira dameka rayanya mangampeas temponya sira danabotus i mPue Allah, pasi danahuku i mPue Allah. Apa huku i mPue Allah etu semo apu to mawea kojo mangkoni yau baliNya.
28 Wali tau to bo’onya mampalaika porenta i Musa tempo owi, ane re’e dua bara togo tau to matamanasa palaong ntau etu, tau etu tamo naporayang nto pobotus. Ia mansaka rahuku mate.
29 Wali ane ewa wetu kaparinya huku to narata ntau to mangewa porenta i Musa, bae wo’u huku to masipato narata ntau to mampobo’o Ana i mPue Allah. Apa tau to etu raporapaka ewa mangalombu yau Ia. Tau etu manganto’o tare batuanginya raa i Yesu, etu semo raa to tondong parajanji i mPue Allah, pei kamonsonya raa etu semo to mangika see ia mawali i Pue Allah Puenya. Pasi ia mangarowis Nosa to mangawaika to lino kanoto. Wali tau to mangika palaong to etu masipato mangarata huku to mapari kojo.
30 Apa kita tansani i Pue semo to manganto’o, “Aku semo to damamponsawaka, pasi Aku seja to damangabalasika huku to masipato. Pasi re’e wo’u to ratulis, to’onya, “Aku, i Pue, damangabotus taungKu.” Etu semo gombo i mPue.
31 Wali bae kojo kameka ndaya ntau to mangarata huku yako resi i Allah to tuwu.
32 Wali endo tempo ruyu, tempo komi owo mangantima kareba to monso to mangkeni reme. Tempo etu komi malagi ngkani mangarata kasesa pei komi ojo mangainsoka wali kasesa etu taa manganangi komi.
33 Wali ri rayanya komi mangarata kasesa etu, matempo-tempo komi narunes nsa’e pasi nasesai nsa’e ri tango ntau boros. Pasi re’e wo’u temponya yunu ngkomi rarunes pasi rasesai ewa wetu, wali tempo etu komi mangepe seja kasesa ndaya nsira.
34 Raya ngkomi bae pamporayang ngkomi mampobuuka yunu ngkomi to ratarungku apa saba sira mangalulu i Pue Yesu. Pasi tempo ngaya-ngaya ngkomi naoko yau ntau, komi ojo mangabiaka pasi ndende raya ngkomi. Naka pei ndende raya ngkomi apa komi mangansani anu to komi puenya to ndate saruga, anu to etu to tao-tao pei ngaya-ngaya to ri lino si’i, pasi anu to ndate saruga etu tare kapuranya.
35 Wali tempo palaong etu nawali resi komi seore, tempo etu komi taa meka-meka raya ngkomi. Wali ne’e rataji yau karoso ndaya ngkomi etu apa yako karoso ndaya ngkomi etu komi mangarata ntanapa to bae.
36 Wali pakabae sabara mangangika pamporani i mPue Allah, see ojo karoonya komi mangika komi damangarata anu to naparajanjika i mPue Allah.
37 Apa i Pue Allah manganto’o, “Tamo kojo masae daratamo Ia to dama’i, pasi Ia tamo damampea-mpeas wo’u.
38 Wali taungKu to singkonong pei Aku, tau etu datuwu apa saba pangayanya. Pei Aku taa damasanang resi tau to mangandolika tangonya yako pangayanya.” Etu semo gombo i mPue.
39 Pei kita si’a ewa tau to mangandolika tangonya etu panewa rapakaja’aka yau. Kita tau to mangaya i Pue semo wali kita rapalaes yako kapate.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA