Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Toratu agamang Yahudi e kětạeng mạngonggọu kěngkaune kụkěngkunawadẹ̌ mạanung hal᷊ẹ̌ mapia sarung duměnta ringangu wal᷊inewe mạanung hal᷊ẹ̌ ene tutune. Toratẹ̌ ene apawe tawe makakasukụ taumata apang dụděnta maněmba Ruata ringangu sasěmbang sire wẹ̌bawaěnge, manilaing taun-taung měngkai hanesẹ̌ sidutu měnẹ̌narakangu sasěmba ghahị e sěmbaụ.
2 Mangawe i sai-saing kụ měnẹ̌němba Ruata e mambeng těngadẹ̌ seng nipakawurěsi wọu rosa, tangu i sire sembelaing tawẹ pěndang u piạ dosang sire kụ sasěmba e selaing tawe sarung ipěllọ.
3 Kutẹu luhude manga sasěmba ilẹ̌onggọ apang taung kawe mapẹ̌tahěndung u taumata su kal᷊awọu rosan sire,
4 batụu mambeng těngadẹ̌ dahang sapi ringangu rahang kambing esẹ e tawe makakarědasẹ̌ dosa e.
5 Hakịu ene su tempong i Kristus narěnta su dunia, kụ i Sie něhengetang su Mawu Ruata, "I Kau tawe mẹ̌gaghausẹ̌ laonggọ dingangu sasěmba; kaiso i Kau e seng něndiahing badangu waugu Iạ.
6 I Kau e nạung tawẹ karal᷊uase su sasěmba tinongkạ arau su sasěmba waugu kal᷊aampungu rosa.
7 Tangu Iạ e nẹ̌bera, 'Ěndaung Iạ, Mawu! Iạ e kai riměnta waugu mẹ̌koạ apang kapulun'U kerẹewe mạbawohẹ mạanung batangeng-Ku e su ral᷊ungu Winohẹ Susi.'"
8 Humotong-motong i Kristus e něhengetang, "I Kau tawe mẹ̌gaghausẹ̌ laonggọ dingangu sasěmba; i Kau e tawẹ karal᷊uase su sasěmba binatang tinongkạ dingangu su sasěmba waugu kal᷊aampungu rosa." I Kristus něhengetang kerene, maningbe patikụ sasěmba e nisarakang tuhụ tiahang agamang Yahudi.
9 Bọu e i Kristus něhengetang, "Ěndaung Iạ, e Mawu! Iạ e kai riměnta waugu mẹ̌koạ apang kapulun'U." Kụ Mawu Ruata e něndědasẹ̌ patikụ sasěmba nạung kal᷊amona e, kụ niawengangu sasěmba i Kristus.
10 I Yesus Kristus seng nẹ̌koạ apang ikẹ̌kapulun Duata e ringangu něnarakangu watangeng'E hala nakoạ sasěmba. Dingangu sasěmba ene kụ nịkakoạ e sěnsul᷊ẹ baugu sarang marěngụ-děngụ, i kitẹ kěbị e niwurẹ̌si wọu rosa.
11 Apạeweng imang tau Yahudi měmpěmẹ̌munara apang kal᷊aěllo e, ringangu měngkai masau su sul᷊ene měmpěnarakang u sasěmba ghahịe mẹ̌sul᷊ung. Kaiso manga sasěmba ene mamben tawe makakarědasẹ̌ dosa e.
12 Kutẹu, i Kristus kawe kětạeng sěnsul᷊e něnarakangu sasěmba waugu kal᷊aampungu rosa, dingangu sasěmba ene kai waugu sarang marěngụ-děngụ. Bọuten nangěntudu sasěmba ene i Kristus naiangko su koanengu Mawu Ruata kụ nẹ̌parenta sěngkapẹ̌parenta ringang'E.
13 Kụ su orasẹ̌ ini e i Kristus měngẹ̌ngampal᷊ẹ̌ sarang Mawu Ruata mapẹ̌subang dumarokạ si Sie.
14 Hatede, ringangu sasěmba sěmbaụ e, i Kristus mạpakasukụ u taumata apang seng niapakawurěsi wọu rosa.
15 Su hal᷊ẹ̌ ene tangu, Rohkẹ̌ u Ruata e mal᷊aing nangonggọ u sasahidine si kitẹ. Rohkẹ̌ u Ruata e něhengetang,
16 "'Ini e kai pẹ̌dariandi sarung Takụ ikoạ dingang'i sire suapạeweng ěllo kụ sarung duměnta e,' ungkuěng u Mawu, 'Iạ e sarung měměmbing u manga tita-Ku e apasuẹ̌ su ral᷊ungu naung i sire, ringangu mamohẹ su ěndumang i sire.'"
17 Mawu Ruata e mal᷊aing něhengetang, "Iạ e sarung mẹ̌timbul᷊eng kal᷊awọu rosa ringangu kararal᷊akis'i sire."
18 Kụ kal᷊awọu manga rosa e ringangu manga kararal᷊akisẹ̌ e seng niampungang, kụ seng tawahal᷊uasu lai itonda sasěmbang kal᷊aampungu rosa e.
19 Tangu, manga anạ u sěmbaụ, ual᷊ingu kapapohongu Mawu Yesus, ute i kitẹ e wahani sumuẹ̌ su Huang Kasusiange.
20 Mawu Yesus seng namuka ral᷊eng buhu sěmbua waugu i kitẹ, kụ kai ral᷊eng makạonggọu pẹ̌bawiahẹ̌. Kụ dal᷊eng ene ute kai matěpasu rarěndunge, kụ kai wadang i Kristus sẹ̌sane.
21 Kụ i kitẹ orasẹ̌ ini e kai mạnaghuang sěngkatau imang mawantugẹ̌ e kụ mạngawasa su Wal᷊em Mawu Ruata.
22 Ual᷊ingu ene ute i kitẹ e mahuhaungken naung i kitẹ e matoghasẹ̌ su Mawu Ruata; ringangu pangangimang matoghasẹ̌, dingangu naung seng nawurěsi wọu pěndangu nẹ̌sal᷊a, ringangkewen badang kụ seng niwurěsing akẹ matilang e.
23 I kitẹ e pẹ̌tumpaedẹ̌ko pakasěgadẹ̌ su l᷊aakung pělaharapi kitẹ, batụu Ruata kai kapangimangeng dingangu i Sie sarung mapakasěhụ u kědon'E.
24 Dingangu i kitẹ e riọko mẹ̌kakakělla, tadeạu i kitẹ lawọbe makapẹ̌bawahansang baugu kuměndagu sěndinganeng i kitẹ e ringangu mẹ̌koạbe hal᷊ẹ̌ mapia.
25 I kitẹ e měngkai pakakěhagẹ̌ mẹ̌komol᷊ẹ̌ sěngkapẹ̌komol᷊ẹ̌, dingangu kumbahangbe měmpamalan pẹ̌kakakomol᷊ẹ̌ e kerẹ e tundung sěnggạ. Sěmbal᷊iau i kitẹ kawe hinong limembong kasatiane mẹ̌sẹ̌sasasa, batụu i kitẹ masingkạ u selaing tạ karěngụ e Mawu e sarung duměnta.
26 Batụu kamageng habarẹ̌ tutune wọu Mawu Ruata e seng nihabarẹ̌ si kitẹ, kutẹu i kitẹ měngkawe sěntiniạ mětẹ̌tatudẹ mẹ̌dosa e, ute semben tawẹ apa sasěmba saụ ipěndědasẹ̌ dosang kitẹ e.
27 Kětạeweng piạ dal᷊enge mang sěmbaụ matagẹ̌ baug'i kitẹ e kụ tumatěngo pěngadilangu Ruata e ringangu putungu ral᷊angeh'E kụ makatutung kěbị apan taumata rụdokạ si Sie!
28 Taumata kụ tawe tumatuhụ tiahan torat'i Musa e, ihukungu papate e tawẹ ampunge, kereu piạ sahidine rarua arau těllung katau, kụ kinaěbakeng i sie kawe piạ sal᷊ane.
29 Ene e limembong kawěhạ e hukumang hinong buạ u taumata kụ měnẹ̌nahida Ahusu Ruata e. Taumata ene tangu mạngěnna wal᷊inewe susi rahang pědarianding Duata e, kụ kai nạung kapapohong i Kristus kụ kawe namurẹ̌si wọu rosa e. I sie něhinakang Rohkẹ̌ měngangonggọu al᷊amatẹ̌ e.
30 I kitẹ e masingkạ u kai i sai tangu i Sie kụ něhengetang, "Iạ e sarung mamal᷊isẹ̌! Iạ e sarung měhukung!" dingangu i Sie lai nẹ̌bera u, "Mawu e sarung měhukung u kawanuan'E."
31 Apạ e makạtatakụ kereu manawo su l᷊imang Mawu Ruata Wiahẹ̌ e!
32 Pẹ̌tahěndungko kereapa kakakoạ u manga anạ u sěmbaụ e nạung su tempo nal᷊iu e. Su tempo ene, sarạeng tualag'u Mawu Ruata e simarang si kamene e, i kamene měngkai sěntiniạ mạsigěsạ; kaiso i kamene mang tatapẹ̌ měkẹ̌karadiahang masěgadẹ̌.
33 Kạdingạ i kamene makạhombang tatungkeang dingangu kẹ̌koateng bawialaěngu taumata. Kạdingạ l᷊ai i kamene mạsigěsạ sěngkapẹ̌tatahang dingang i sire apang kẹ̌koateng kerene,
34 dingangu i kamene mal᷊aing makạpěndang likibu taumatang tahungkụ. Dingangu su tempong kěbị apang tẹ̌taghuaneng i kamene pul᷊ahoěng, i kamene tangu měnarimạ u ene ringangu naung mal᷊uasẹ̌, batụu i kamene masingkạu i kamene wědang mạnaghuang sěmbaụ kụ limembong kapiane, kụ sarung mẹ̌daragẹ̌ sarang marěngụ-děngụ.
35 Ual᷊ingu ene, kumbahang měngkapěndụ u naung i kamene, batụu kamageng i kamene těbewe mạngimang, tangu piạbe wawal᷊ise masěllahẹ̌ baugu ene!
36 I kamene hinong mẹ̌tingkědang, tadeạu i kamene e makakatuhụbe kapulung Duata e ringangu makahombang kasasěhụ u kědon'E.
37 Batụu su ral᷊ungu Bukẹ̌ Susi e kạbawohẹ, "U seng kate kadodọ tempone, tangu i Sie kụ sarung duměnta e seng tạ kararěnane; i Sie seng tawe měnohọ u tempon darěntan'E.
38 Dingangu umatẹ̌-Ku matul᷊idẹ̌ e sarung mangimang kụ mẹ̌biahẹ̌; kai kamageng u piạ u wọu tal᷊oarang sire e sumohọ, tangu naung-Ku e tawẹ karal᷊uase si sie."
39 I kitẹ ini e wal᷊inewe taumata sụsohọ dingangu mạpal᷊idẹ̌. Kaiso i kitẹ e kawe taumata kụ mangimang su Mawu Ruata e ringangu ipakasal᷊amatẹ̌.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA