Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dangga Musa men gomnomna emedag mog misen dau geigouhw areg Allah esedeb naugb maman se lona daiyamo gacinero. Doba edag mena dau augwan gin dousaba. Hang leng Israel len lemarges dau sug len leic aremeta mogwihi lauwaharo dou Allah naugb meren sesar gin touwero. Doba astesda lona, kaba, len leicara laimo dangga naugb arisogomoc augwan beb huhugb namcirohob. Sug len leicara dag gini terimda, kaba, gini ansins dou maman dag Musa men gomnomna men goubesa emedeinyum naugb oguc dougwo leng Israel meren sesar augwan ecabeci dau len deseino Allah touwero. Doba ens ainyes dou len dau sug len len aud en naugb len lesijaresa en dag meren sesar augwan eb naugb len terimdaba.
2 Anai sug meren sesar augwan ediyebeiya dag misen dau lenohob, kaba, len leic aremeta mogwihi dou Allah ucucugb dag gini terimdei? Naro, len lemeic ara ara dou en ucucugb dangga deitero, doba len larges dau namcir. Anai len lecinaga dag meren sesar augwan, kaba, ediyebeiya dau lenohob. Hang len merdoc mes emeijesa an meren sesar touwero. Doba sug len lesijaresa Allah dag gini, kaba, len merdoc ebtou namcir dous.
3 Dobnaro. Sug len leic aremeta mogwihi lauwaharo dou Allah naugb meren sesar astesda lona se arisogomoc augwan dag gin terimda, kaba, ens dou len dag meren sesar emediyebeiya dau len touebma, doba eb naugb len terimdaba.
4 Anai sapi dara kambing merugwihi meren goubesa emedeinyum naugb oguc dougwo lusud meren sesar augwan dau len touwero.
5 Dangga hang, sug lona ebeij deinyorohob naugb sug Krisdus ouwaden dau bogo se cinogo gin, kaba, en enara dou Allah, endagai: Sug lusud lec aremeta mog se smougb, era sug len leic ara ara lauwaharo dou ban naugb ban baigdougwo meren sesar augwan dau len, kaba, ban abdoc emesgirahesa len an gin touwero. Dangga hang, ban besedeb maga hom naugb dan, dauntoba dan deic dan indaga gini omom naugb lusud meren sesar gin toua. Anai ban bemouwan naugb sug lusud leic aremeta mogwihi dara ara ara gus dag mogud dou ban deiterohob.
6 (10:5)
7 Dara sug Krisdus edebeij se cinogo ginohob, kaba, en enara dou Allah deit, endagai: Dan indugwenggini naugb dan daimo areg asesa banin abdoc mes augwan terimda, aimo dau areg len log deb se Surad Injil Meb Mohon eisaugb dan deb sug nosa touohob.
8 Dangga hang, sug Krisdus enara aimougtut dag Allah emouwan aremeta mogwihi dara ara ara dag mogud naugb lauwaharo dou en deitero. Dara en medoc emesgiraha an lusud sug len lec sapi mog se smougb lauwaharo dou en naugb en aigdougwo meren sesar touwero.
9 Dara en enara ucan deit dag eni moongga naugb en aimo areg asesa Allah enin medoc mes augwan terimda, kaba, gini ansins dag Allah oguc dougwo men gos dou acgunog se Musa men gomnomna. Hanoba en eic men gos dou menau naugb maman toua deitohob. Anai sug Krisdus enara dag gin, kaba, en emenara dau sug leng Israel lemedreg dau Musa men gomnomna an gin touwero. Doba dau sug len laimo gomnomna gini an gin terimdaba. Dangga hang, sug Allah oguc dougwo Musa men gomnomna dau maman dag ginohob, kaba, en emouwan naugb maman mameic aremeta mogwihi mauwaharo dou en naugb maman sesar toua deitero. Doba en ouwan naugb maman maperwei gini. Hanoba maman maic Krisdus mogwihi hom gin eng mauwaharo dou en naugb maman sesar dous.
10 Anai Krisdus, kaba, en emedreg dau areg Allah arougb en an gin touwero. Doba en owun enin medoc mes arjaga naugb en aimo areg asesa Allah enin medoc mes augwan terimda. Hanoba en eic enin maga bauwaharo dou Allah naugb maman sesar augwan toua. Dangga hang, sesar men gogom emeb naugb maman toua deitero. Doba Allah ouci maman debinim dag enin men logodeh naugb enin touohob. Anai sug Krisdus en omom naugb maman sesar mougwa cum dag ginohob, kaba, edeinyum naugb en edu sesar augwan dau maman beb huhugb namcir toua.
11 Dangga toua, gembala gesa taij dau Lewi medebeitor, kaba, len leinesa se dimei astesda lona naugb len leic ara ara lauwaharo dou Allah. Doba areg len leic dou en gin, kaba, dag aremeta mogwihi hom eng naugb lusud meren sesar dous. Dobnaro. Areg len leic dag lauwaharo dou Allah gin, kaba, augwan emedeinyum naugb sug oguc dougwo meren sesar dau len touwero, doba ebsugeb namcir.
12 Doba Krisdus, kaba, en eic enin mogwihi bauwaharo dou Allah naugb maman sesar mougwa cum dous. Dau, kaba, en eisaugb dig bogo naugb en edeigtou desij Allah se men maija moc dig en mesira misen. Hanoba en edag mougt mera medam desij en toua. Anai en mogwihi gin, kaba, edeinyum naugb edu lusud meren sesar augwan dau len beb huhugb namcirohob.
13 Dara en eigtou desij Allah sungga terimda edebeij lona sug Allah owun men moc len laugwan dag hotingga naugb len leb tainya en mohora touahabi, en emecicugwen.
14 Hang maman sesar hom emeb naugb maman toua deitero. Doba sug Krisdus eic enin mogwihi bauwaharo dou Allah naugb maman sesar mougwa cum dag ginohob, kaba, edu maman sesar augwan dau maman beb huhugb namcir. Hanoba Allah ouci maman debinim dag enin men lusud naugb en beb huhugb terimda touohob.
15 Augwan gini esogwa deisa areg maman Adehsud en enara dou Yeremia se Surad Injil Meb Mohon deb sug nosa touohob. Anai aimougtut, kaba, en enara dou en eisaugb leng Israel, endagai: Se lona daiyamo gacin, kaba, dan deic indan gos dou menau dou len deit. Dara dan demog indan gos dou menau gin se igdahab dou len toua deitero. Doba dan dog areg dan dos gini se len merdoc mes dous, dauntoba len merdoc moc dougwo augwan gin touwero. Doba len lauwam an augwan gin ucucugb terimda. Sug en enara dag graga dou Yeremiyohob, kaba, en enara ucan dou en deit, endagai: Se lona sug dan dog indan gos dou menau se len merdoc mes dag ginohob, kaba, dan indoc emeiseisan meren sesar dara meren geicara gecgu augwan toua deitero. Doba dan indoc moc dougwo augwan gin namcir. Areg graga augwan, kaba, misen namcir. Anai aimo dau areg Mena Gogoufu ouma debin gin dou maman touohob.
16 (10:15)
17 (10:15)
18 Sug Allah aigdougwo maman sesar dara maman geicara gecgu augwan dau maman dag ginohob, kaba, gembala gesa taij lemeic ara ara lemauwaharo dou Allah naugb maman sesar toua deitero, doba len larges dau namcir.
19 Dangga dan indagunerij, dara dan indamouwerij, sug Yesus eic enin mogwihi bauwaharo dou Allah naugb maman sesar, hanoba en edag maman Gembala Gesa Taij Moho Agas se tuari se bogo naugb maman dag gin touohob, kaba, maman mamahau dau sug maman mainesa Allah Men Dimei Gecabeci Namcir gin touwero. Doba maman maic mamus naugb maman mainesa dimei gini aud en namcir. Anai sug Yesus eic enin maga bauwaharo dou Allah dag ginohob, kaba, en ogod minc geb dougwo Allah Men Dimei gin dau maman. Hanoba en esa ucina menau aud Allah Men Dimei naugb en eic maireseb menau geb huhugb dou maman sungga toua.
20 (10:19)
21 (10:19)
22 Dangga hang, sug Yesus esa ucina geihwedaud Allah Men dimei naugb maman dag ginohob, kaba, maman mameija maman mamdocesa Allah en toua deitero. Doba sug maman mamdoc ecabecohob, kaba, maman maic mamus naugb madebeij en namcir. Anai en eic Krisdus mogwihi bargeh maman mamdoc mes an areg gecgu dau maman. Dara en edu maman mamaga dara duhu gecabeci touohob. Hang maman mamdoc emeijesa an maman sesar toua deitero. Doba maman macinaga dag augwan gini ediyebeiya dau maman dag misen namcirohob.
23 Dara maman mamarges dau areg en os dou mamanohob gini touwero. Doba maman maod mamina debsa en an areg maman maos madi deseino lusudohob gin toua namcir. Anai areg Allah en os dou mamanohob, kaba, en emarges dau gin touwero. Doba en aimo augwan gini an maman terimda.
24 Hanoba maman mamehig daum touwero. Doba maman mahilon ucina naugb maman maic mamdoc erleij doum ucucugb. Dauntoba maman mamdoc gororougwim dara maman maimo areg edag beim dara obosboro anim toua terimda.
25 Dara maman mamahau dau sug maman maucimdeb se tuari aninim dag ligbum gin touwero. Doba sug yen yecinaga dag maman Adehsud Men Lona Naugb Sug En Ecicugwen ebeij deinyorohob, kaba, maman manara mad mamanin mamdoc mes ucucugb terimda edreg dau nosa deit. Dauntoba maman maobsara dau sug maman mamdoc ebdebin an Krisdus gin touwero, doba maman mas agadgeij namcir.
26 Anai gareg dau maman, en ouman Mer Geigouhw eisaugb Krisdus. Hanoba en aimo en se men ucina se geica gin touohob. Doba cum, kaba, en eic mos naugb en eineg dau men ucina gin aud sesar ucugb deit, kaba, Krisdus en mogwihi ingma emeb naugb en toua deitero.
27 Doba en eigtou dara en medoc ohwohu an enin deb naugb Lona sug Allah ogod aremer aga lusud gin dous. Anai se Lona ingga, kaba, gareg en eic mos dou Allah dag ginohob, kaba, Allah medoc esrougb an en, hanoba en erba en se smougb gesrougb medam namcir toua.
28 Anai gareg en eic mos naugb en edreg dau Musa men gomnomna sug nosa, kaba, mougtir merdoc emeineg an en deitero. Doba sug lahwai, era merug homoi louma debin dag en edreg dau gomnomna gin dag misenohob, kaba, len leic gomom dou en toua.
29 Dangga hang, sug lusud leic gomom dou gareg en edreg dau Musa men gomnomna dag ginohob, kaba, dagiro eisaugb sud hom areg en eic mos naugb en obsara dau Krisdus aud sesar dag gin ucugb deita? Allah amsoho enei? Naro, en emamsoho sud hom gin touwero. Doba en eic gogom medam dou en bedreg dau leng nosa gin namcir. Anai men geicara augwan gin, kaba, dag en owun Allah Meisi Krisdus en moho. Dara en eic Mena Gogoufu en moho bacecim toua namcirohob. Anai Krisdus, kaba, en mogwihi edu men sesar augwan dau enohob. Dara en eir en mogwihi debin Allah men gos dou menau. Dauntoba areg Allah os gin, kaba, eb naugb sud hom gin toua terimda. Dara Mena Gogoufu, kaba, en medoc eineg an en naugb en eic areg geigouhw einyana dou en touohob.
30 Dara maman macinaga dau gin dag misen namcir. Anai augwan gini esogwa deisa areg maman Adehsud en enara dou maman mamjemouwer se Surad Injil Meb Mohon deb sug nosa touohob, endagai: Gareg dau yen en eicara gecgu, kaba, dan demamsoho en deb touwero. Doba dan demauni men geicara gecgu gini ucugb dou ens. Dara en enara deit, endagai: Dan demogod indan lusud meren aremer aga len toues.
31 Dangga hang, maman mameic mamus dou Allah gin touwero. Doba sug maman maobsara se en mesira mesohob, kaba, maman mahau dau en. Anai enin, kaba, maireseb, hanoba en mobisamougb namcirohob.
32 Doba yen, kaba, yen meigdoc eiseisan lona sug lusud lesai Mer Geigouhw eisaugb Krisdus dou yen gin terimda. Anai sug yen yebin mouf gini se yen meigdoc mes dag misenohob, kaba, lusud lesmesman yen, dara len logod yen abeba len gus meriresi terimda toua. Hang yen toua yaimo ucina mog erij ginohob, doba yen yemobsara dau gin touwero. Dara yen yemasid yenin dau yen meisir leng Krisdus gus sug lusud lesmesman len dara leic mog erij dou len touwero. Doba yen yeic meijus desij len naugb gin toua.
33 (10:32)
34 Anai sug len lerba ligbum dau yen meisir gini se tu gesisug, kaba, yen yemohw meijidgo dou len touwero. Doba yen yaimo len se ucina mog erij gin toua. Dara sug leng medigo Yesus leida meijen tu an meijen aremougb, kaba, yen meigdoc momogo an gin touwero. Doba yen meigdoc agahugouhw an Allah icira gin toua terimda. Anai yen yecinaga dag areg Allah os dou yenohob, kaba, hom emediyebeiya dau yenero. Doba eb se bogo beb huhugb naugb yen. Dara men mera gin, kaba, edreg medam dau meijen aremougb areg geb se cinogo gin toua namcirohob.
35 Dangga hang, yen yemahau dau sug lusud leic mog erij dou yen touwero. Doba yen yeic meijus naugb yen yaimo ucina mog erij gin toua. Anai sug yen yeicara yaimo dag gin terimda edebeij lona sug ouwedocohob, kaba, Allah emeic siouwa einyana medam dou yen toues.
36 Hang yen yemehig dau sug yen yaimo areg asesa Allah enin medoc mes touwero. Doba yen yaiyan meigdocesem naugb yen yaimo gin terimda. Anai sug yen yeicara dangga namcirohob, kaba, en emeic areg en os dou yenohob augwan dou yen toua.
37 Augwan gini esogwa deisa areg maman Adehsud en og deb se Surad Injil Meb Mohon deb sug nosa touohob, endagai: Cum, kaba, sud hom areg en esedeb naugb en en aud yenohob, kaba, en emeigtou dau yen toua deitero. Doba en emen aud yen toues.
38 Dara enin eng esulou maman se Surad Injil Meb Mohon dag gin deit. Dauntoba maman mamobsara dau en touwero, doba maman maimo en mer gin toua terimda. Hanoba en enara dou maman, endagai: Gareg en aimo areg asesa danin indoc mes terimda, kaba, dan demeic maireseb menau geb huhugb dou en toues. Anai en medoc ebdebin an dan indir ginohob. Doba gareg en medoc emebdebin an dan deitero, hanoba en ohw en medigo dou danohob, kaba, dan indoc emesgiraha an en touwero. Doba dan indoc esrougb an en namcir.
39 Doba maman gin, kaba, maman mamaimo leng laisacij dau Allah naugb len merur mor se dum smougb gin touwero. Doba maman mamdoc ebdebin an en terimda. Dangga, kaba, en emeic mor mor dou mamanero. Doba en eic maireseb menau geb huhugb dou maman dous.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA