Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Sanggah sihol pasuangon-Ku bangsang-Ku, anjaha sihol pamalumon-Ku Israel, gabe talar ma dousa ni Efraim ampa hajahaton ni Samaria, ai ihorjahon sidea do panipuon, panangko mambongkari rumah, anjaha panrampok manrampasi i dalan-dalan.
2 Seng ipingkirhon sidea, na mardingat do Ahu bani ganup hajahaton ni sidea. Sonari iinggoti pambahenanni do sidea, i lobei ni bohing-Ku do ai.
3 Marhitei hajahaton ni sidea ipamalas sidea uhur ni raja, anjaha marhitei sipakulah-kulah ni sidea ipamegah kopala-kopala.
4 Haganup sidea unsong-unsong do usih do sidea songon parmasakan ruti na dob pinamalas, tapi na so ginaraan ni tukang ruti lobei paima siap iagu topung anjaha kambang ai marhitei ubat ruti.
5 Nini sidea, “Ari bosar ni rajanta!” Marmabuk-mabuk ma kopala-kopala minum anggur; iawas-awaskon raja ai do tanganni rap pakon sipanggeori ai.
6 Gajag do uhur ni sidea songon pamurunan laho manggeori; borngin songon na modom do ringis ni sidea, tapi patarni marjimbur ma ai songon gara ni apuy.
7 Haganup sidea milas do songon pamurunan, ibonduti sidea do panggomgomini. Haganup do raja ni sidea madabuh, anjaha ise pe lang humbani sidea na dilo-dilo Bangku.
8 Ipasaor Efraim do dirini hubani bangsa-bangsa; songon roti na so pinagoling do Efraim.
9 Halak na legan do mamangani gogohni, tapi seng mangahap ia ijai; uban ma bani uluni, tapi seng ibotoh ai.
10 Gijang ni uhur ni Israel do saksi bani na mangimbangsi; tapi seng mulak sidea bani Jahowa, Naibata ni sidea, anjaha seng ipindahi Ia, age pe sonai haganupan ai.
11 Songon asas do Efraim, oto anjaha seng maruhur; dilo-dilo bani Masir, sai laho hu Assur.
12 Sanggah na laho sidea, Huhaltupkon do puhot-Ku manangkap sidea; Hutarik do sidea hu toruh songon manuk-manuk na i awang-awang; Huajar do sidea halani hajahaton ni sidea ai.
13 Bursik ma sidea, ai lintun do sidea hun Bangku; magou ma sidea, ai marbalik do sidea hun Bangku; sihol do namin Ahu paluahkon sidea, tapi ladung do ihatahon sidea Bangku.
14 Seng dilo-dilo sidea hu Bangku humbani uhur ni sidea, tapi bani podoman i panumbahan-panumbahan do sidea doruh-doruh; irariki sidea do dirini halani gandum ampa anggur, manlawan do sidea hu Bangku.
15 Ahu do na mampargogohi tangan ni sidea, hape na jahat do ipingkiri sidea dompak Ahu.
16 Dompak Baal do sidea laho, gabe songon sior sipangoto-otoi do sidea. Rasei do kopala-kopala ni sidea marhitei podang, halani hajungkaton ni dilah ni sidea. Ai ma na mambahen bador sidea i tanoh Masir.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA