Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu, "Sabban Sengko’ terro mabarasa Tang ommat Isra’il ban mabaliya kabadha’anna akantha asalla, se etangale’e Sengko’ pera’ kajahadanna ban dusana reng-oreng jareya. Reng-oreng jareya saleng tepo, maso’ ka bengkona oreng co’-ngeco’a, arampok oreng e rong-lorong.
2 Reng-oreng jareya ta’ tao apekker ja’ Sengko’ ngenga’ana kajahadanna jareya kabbi; sa-dusa jareya akantha se nyapo’e reng-oreng jareya, daddi terrang etangale’e bi’ Sengko’."
3 PANGERAN adhabu, "Ra’yat aehteyar masennengnga atena rato ban para kaom oreng agungnga pamarenta’an kalaban nepo ban kon-lalakon se jahat.
4 Reng-oreng jareya kabbi padha tokang kiyanat ban ta’ esto. Kabaji’anna akantha mardha e tomang se bi’ tokang eppanna roti ta’ eparabbang sabellunna adunna daddi.
5 E bakto are pestana rato, ra’yadda ratona ban om-kaom oreng agungnga epangenom anggur sampe’ mabu’ ban atengka akantha oreng budhu. Dhi-budhina rato aneng-sennengngan ban para pangkiyanat jareya.
6 Akantha apoy e dhalem tomang bariya keya neyat jahat ban kapeggellanna ra’yat jareya samalem benteng panas akantha mardha e dhalem atena, e baja laggu rabak ce’ rajana.
7 E dhalem napso kapeggellanna, ra’yat jareya mate’e pin-pamimpinna. Ratona kabbi padha epate’e etoro’ gilir. Tape maske kabadha’an la ce’ juba’na kantha jareya, tadha’ oreng settonga se adu’a menta tolong ka Sengko’."
8 PANGERAN adhabu, "Bangsa Isra’il asakongkel ban sa-bangsa e sabingkerra, sampe’ daddi akantha roti se massa’ saseba’.
9 Reng-oreng jareya ta’ apangrasa ja’ polana se asakongkel ban sa-bangsa jareya se la’-mala’ maelang kakowadanna dibi’. Ajalla la para’, tape reng-oreng jareya ta’ tao.
10 Kaangkowanna oreng Isra’il katon ce’ terrangnga, daddi buktena kasala’anna. Maske badha kadaddiyan jareya kabbi, reng-oreng jareya gi’ ta’ endha’ nyare Sengko’ ban ta’ endha’ abali ka Sengko’, GUSTE Allahna.
11 Isra’il ajar-ganjir akantha dara se budhu. Dha’-adha’na reng-orengnga menta bantowan ka Messer, saellana jareya pas buru ka Asyur!
12 Tape sabban reng-oreng jareya lebat, Sengko’ masanga jaring epamega’a reng-oreng jareya akantha se mega’ mano’. Reng-oreng jareya bi’ Sengko’ eokoma lantaran kajahadanna se la ekataowe bi’ Sengko’.
13 Palang reng-oreng jareya sabab nyenglae Sengko’! Bi’ Sengko’ epatompessa polana alaban ka Sengko’. Bi’ Sengko’ terro epasalamedda, tape kabakteyanna ka Sengko’ pera’ gabayan.
14 Reng-oreng jareya ta’ adu’a saongguna ka Sengko’. Mon adu’a badanna ebujeggagi ka katedhunganna, pas nanges agingging akantha se elakone oreng se ta’ parcaja ka Sengko’. Mon adu’a menta gandum ban anggur, badanna elokae akantha reng-oreng se nyemba diba. Reng-oreng jareya alaban onggu ka Sengko’!
15 Maske reng-oreng jareya eparaja ban epakowat bi’ Sengko’, tape reng-oreng jareya asakongkel alaban ka Sengko’.
16 Ros-terrosan noro’ ba-diba se ta’ andhi’ kobasa pa-apa sakale. Reng-oreng jareya ta’ ekenneng andellagi akantha gandhiba se kendhur. Pin-pamimpinna sombong pacacana, daddi reng-oreng jareya bakal epateyana ban peddhang, ban ekala’-gella’a oreng Messer."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA