Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On ma hata ni Jahowa na roh hubani si Hosea, anak ni si Beri, bani panorang ni si Usia, si Jotam, si Ahas pakon si Hiskia, ai ma raja-raja ni Juda, ampa bani panorang ni si Jerobeam, anak ni si Joas, raja ni Israel.
2 Sanggah na ipungkah Jahowa marsahap marhitei si Hosea, nini ma hubani si Hosea, “Laho ma ho, buat ma bam sada boru jalang, ase tubuh bam anak humbani boru jalang ai, ai sai inunut nagori in do marbangkisi, marbalik humbani Jahowa.”
3 Jadi laho ma ia anjaha ibuat ma si Gomer, boru ni si Diblaim; boratan rumah ma ia anjaha itubuhkon ma sada anak.
4 Jadi nini Jahowa ma hu bani, “Bahen ma goranni si Jesreel; ai tongkin nari mando luluhonon-Ku ma daroh ni Jesreel hubani ginompar ni si Jehu, anjaha parontihonon-Ku ma Harajaon Israel.
5 Anjaha bani panorang ai, ponggolhonon-Ku ma sior ni Israel i pamah Jesreel.
6 Boratan rumah ma use ia anjaha itubuhkon ma sada boru. Dob ai ihatahon Jahowa ma hu bani, “Bahen ma goranni si Lo-Ruhama (Na so hinaholongan); ai seng holong be uhur-Hu bani ginompar ni Israel, anjaha seng be marulak-ulakan uhur-Hu mangidah sidea.
7 Tapi marulak-ulakan do uhur-Hu anggo bani ginompar ni Juda, anjaha paluahon-Ku do sidea marhitei Jahowa, Naibata ni sidea; seng paluahon-Ku sidea marhitei sior atap podang atap porang atap huda atap jolma siajak huda pe.”
8 Jadi dob sirang minum si Lo-Ruhama, boratan rumah ma use parinangon ai, anjaha itubuhkon ma sada anak.
9 Dob ai nini Jahowa ma, “Bahen ma goranni si Lo-Ammi (Seng bangsang-Ku), ai seng be bangsang-Ku hanima, anjaha Ahu pe seng be Naibatanima.
10 Tapi ia bilangan ni bangsa Israel magira, maningon songon buei ni horsik na i topi ni laut do, seng tarsuhati atap tarbilangi. Anjaha gantih ni hata na dompak sidea ai, “Sedo bangsang-Ku hanima”, hatahononkon ma bani sidea, “Anak ni Naibata na manggoluh in!”
11 Jadi mardomu ma magira halak Juda rap pakon halak Israel, pabangkiton ni sidea ma bani sidea sada kopala, anjaha tangkog ma sidea hun nagori in, ai banggal do ari Jesreel ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA