Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ngini gee ka 'o ngo-ngaku moi salingou tatapu nimakadora moi de moi 'isoka 'o 'esa moi.

² 'Uwa niamongoro salingou niakidawongo 'o nyawa gee koniakinakowasi yomasido-dogumu nia woaka. Sababu koge'ena dau ge'ena yamuruo naga koyanakokawa 'ena yadawongokau 'o mala'ekati manga woaka.

³ Salingou niakingano-nganono 'o nyawa gee 'o buioka, 'isoka ngini mita de de 'ona 'o buioka. De 'o nyawa-nyawa gee yakisihaga-haga, salingou niakingano-nganono 'isoka ngini mita nidiai koge'ena.

⁴ 'O nyawa 'iodumu salingou yahoromati 'o ngaamoka, de 'o rokata de 'o wekata koidadiwa manga singina 'ilenge 'o nyawa 'ireguka. 'O nyawa gee yomakapake kaitimaronga de gee yoso-songou 'asa ma Jo'oungu ma Dutu wakihakimi.

⁵ 'Uwa 'o pipi niodo-dopokana so 'ena niparetano, ma ngini salingou niosanangi de 'okia naga gee naga nginioka. Sababu ma Jo'oungu ma Dutu wongosekau, "Ngoi 'asa kotonisidipidilikawa bolo kotonimadakawa."

⁶ Ge'enau so ngone pomoroini pongose, "Ma Jou ge'ena to ngoi 'ai ro-riwo, ngoi koimodonguwa; 'o nyawa koya'akunuwa 'ikadiai ngoino!"

⁷ Niakingano-nganono 'ania balu-balusu gee yositota-totara ma Jo'oungu ma Dutu wi demo nginika. Nimadelega kokia 'ona yo'ahu de yosongene, de nimaduru to 'ona manga ngo-ngaku.

⁸ Ma Yesus Kristus 'una tatapu ka koge'ena, ma sirasi, ma 'orasi ne'ena sigado kaisi'ado-'adonika.

⁹ 'Uwa nisiliba 'o sagala do-dotoko gee koyadae-daenikawa. To ngone nanga singina salingou 'isikuata de ma Jo'oungu ma Dutu wi singina ma sure; ge'enau 'ifoloi yaowa; 'uwa gee 'o sagala 'atorangi ma ngale 'o 'inomo. 'O nyawa-nyawa ma sirasi gee yamoteke 'o 'atorangi ge'ena, koyamakewa ma faedaa.

¹⁰ Ngone pomarimoiokau de ma Kristus, so 'una matero ka nanga su-suba moi sababu wosongenokau ma ngale nanga so-sowono watuusu. De 'o 'imam-'imam gee yamote-moteke yole-leleani ma Jo'oungu ma Dutu 'awi Woaka, 'ona yomoteke de de ngone matero ka 'o su-suba gee ma su-suba 'idu-dutuuku ma dekuoka koidadiwa ya'odomo.

¹¹ 'O haewani ma 'aunu gee yosisuba ma ngale 'o so-sowono ma ga-gaiki, ma 'Imam ma Amoko wa'asa 'o Ngii gee 'Itebini 'Ifo-foloika. Ma 'o haewani ge'ena yatuuku 'o woa ma dudunoka.

¹² Ge'enau so 'o Yesus mita wosangisara de wosongene 'o kota ma ngorana ma amoko ma dudunoka ma ngale watebini 'awi kawasa 'o sowonoka de to 'una ma sirete wi 'aunu.

¹³ Sababu ge'ena, nou ngone posikaika 'unaka gee 'isi-'ade-'ade posupu 'o kota ma dudunika, de pomoteke 'inasiti-tingoono de de 'una.

¹⁴ Sababu 'o duniaka ne'ena to ngone nanga ngii 'ika-kakali koi'iwa. Ngone panonu 'o ngii pomanoa-noa gee dua 'asa 'inakula.

¹⁵ Sababu ge'ena, ma ngekomo 'o Yesus, ngone salingou powisiare-arene ma Jo'oungu ma Dutu. Ge'ena 'imadadi to ngone nanga su-suba de nanga 'amalaha 'unaka gee ngone positedene de nanga demo-demo.

¹⁶ 'Uwa niamongoro niodiai yaowa-owa de nimakariwo moi de moi, sababu ne'enau 'o su-suba gee ma Jo'oungu ma Dutu 'awi singina yasanangi.

¹⁷ Niodomoteke 'okia naga gee nisibalu-balusu yosuloko de niaki'isene 'onaka. Sababu 'ona kaitaurika nisilega-lega, de ge'ena salingou 'imadadi to 'ona manga gina yotaari ma Jo'oungu ma Dutuka. Nako ngini niakisingounu 'onaka, 'ona 'idadi yomanarama de manga singina 'isa-sanangi. Nako ko'uwa, 'ona 'asa yomanarama de manga singina 'isusa-susa, de ge'ena ma faedaa koi'iwa nginioka.

¹⁸ 'Uwa niomaogoro minisilahidoa ngomi. Ngomi mianako 'amia singina 'itebi-tebini, sababu naga 'o sagala moi-moioka ngomi kaitaurika miomau miadiai 'okia naga gee 'iti-tiai.

¹⁹ 'Ifoloiosi ngoi toga'asoko tosigou-goungu, la ngini nisilahidoa ngoi la ma Jo'oungu ma Dutu woisigiliou nginika.

²⁰ Ma Jo'oungu ma Dutu wisimomikokau nanga Jou Yesus ngaro wosongenukou ma. Sababu 'una wosongene, ma 'orasi ne'ena 'una wodadi 'o So-sowohi ma Amoko ma ngale wonasowohi ngone, ge'ena la to 'una 'awi domba-domba. De mita sababu wosongene, so 'isitatapu 'o jaji 'ika-kakali gee ma Jo'oungu ma Dutu wodiai ngoneno.

²¹ Tanu ma Jo'oungu ma Dutu 'o sanangi ma titi gu'una, winisitotomo de 'o sagala yaowa-owa gee ngini nioparaluu ma ngale niadiai 'awi mau. Tanu ma ngekomo ma Yesus Kristus, ma Jo'oungu ma Dutu womanarama ngoneka 'okia naga gee wodua-duaka. Salingou ma Kristus winisiarene kaisi'ado-'adonika! 'Amin. Koge'enau.

²² Ngoi toga'asoko la ngini niosidi-diai 'okia naga tinido-dongosekau ne'ena de nia sabari. Sababu 'ai surati ne'ena koikurutuwa.

²³ Ngini salingou nianako, to ngone nanga 'esa moi 'o Timotius wisisupuokau 'o buioka. Nako ne'ena 'ai ngiiokau waino, 'asa towi'asa gee dua taika nginika.

²⁴ Niositotara 'amia tabea gee nisibalu-balusika yoodumu de ma Jo'oungu ma Dutu 'awi kawasa 'iodumika. Niadawongo mita nanga riaka dodotino 'o Italiaka manga tabea.

²⁵ Tanu ma Jou winisibarakati ngini 'Esa moi nioodumu.

Ibrani

Video Ibrani 13

Ikuti Kami:

KONTAK | PARTISIPASI | DONASI