Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mo'ikow musti umuran mositabian saḷaku intau mita Keresten inta mogutat.
2 Dika mo'ondo-ondok im motarima kon intau mita inta diaípa nogoginta'auan monimu aka mongandup in sia kom baḷoimu. Sin noko'imontandon nobalií, oyuíon intau no'ibog pinongandupan in intau mita inta diaí nogoginta'auannya, bo na'anta mosia tua im malaekatbií mita.
3 Bo tantuídon kong gina makow im mosia inta kom bonu im ponjara naonda bo mo'ikow kom bonu doman im ponjara noyotakin monia. Bo intau mita inta pinomia ibo-ibog umuran kong gina-gina doman makow im mosia naonda bo pinomia doman natua im mo'ikow.
4 Mustibií untuon makow mangale in tonibuḷoi, tuamai doyowa motonibuḷoi musti mosisatia'an tobatuí bo tobatuí. Sin intau inta mogaid kom mokotor bo inta mononualing in adilonbií i Allah.
5 Aka mobiag yo dikabií kawasa'an in ibog kon doit, ta'e kosanangbií im momakeí kon onu inta no'uliímu sing ki Allah nogumandon nana'a, "Aku'oi in diaíbií mopomayak makow andeka monaḷaímai ko'inimu."
6 Tuamai mobaranibií ing kita moguman, "Ki Tuhan im mototuḷungku, tuamai aku'oi diaí mo'ondok. Onubií im mota'au aidan in intau ko'inakoí?"
7 Dikabií koliongan monimu in itoi mita monimu inta mopoyaput ing koyow i Allah ko'i monimu. Tarukirabií naonda ing kobobiag monia bo naonda ing kopopatoi monia, bo duduiai ing kopopirisaya monia.
8 Ki Yesus Kristus diaíbií mobaḷu-baḷui, kolipod, masai na'a bo modapotkabií ing kopaḷutannya.
9 Dika mo'ibog mo'ikow poyayingon in totunduí mita inta mokoherang ko'i monimu. Gina naton na'a musti irigonan in totabi i Allah, tuabií im mopia, de'emanbií atorang mita soaáḷ koka'anon. Intau mita inta tungkuḷ intua dinumudui kon atorang mita tatua diaí noko'ulií kom mangalenya.
10 Oyuíonbií im meja pobobogoian naton kon sosumbah ko'i Allah. Bo imang mita inta nogaid kom bonu im Baḷoi Tuhan, diaíbií mota'au moka'an kong kurban inta kon tudu im meja tatua.
11 Duguí im mahaḷuk inta pinosumbah saḷaku kurban pongampungan kon dosa dinia i imang moḷoben kon Ruangan Inta Totok Mosuci, ta'e awak im mahaḷuk tatua sinubaíbií kon ḷuai im perkemahan.
12 Manangka intua ki Yesus minatoi doman kon ḷuai ngara moḷoben ing kotaí sim mondarit kon umat-Nya nongkon bayongan dosa. Duguí-Nyabií tontanií im pinoduguí-Nya.
13 Tuamai, koligai mayak ing kita ko'i-Nia kon ḷuai im perkemahan bo moyotakin-Nya singkuleon.
14 Sing kon dunia na'a diaíbií in tampat pogutunan mononoi ko'i naton, kita im mayakbií motayak kon tampat pogutunan kon singgai mo'iduduimai.
15 Tuamai potonsigad naton ko'i Yesus, kita musti umuran modayow ko'i Allah; tua in nobalií kurban sukur naton ko'i-Nia, inta pinosumbah naton pinongin singog im bibig sim mopomulia kon tangoi-Nya.
16 Dona'ai koliongan monimu im mogaid kon inta mopia bo mosituḷungan, sin na'abií ing kurban mita inta mokosanang totok kong gina i Allah.
17 Duduiaibií onu im pinarentah i itoi mita monimu bo kodu-kodudui doman ko'i monia. Sim mosia umuran monarukira makow kong kobiaganmu bo mustibií im mosia mobertanggung jawab ko'i Allah. Aka mo'ikow bo motoindudui ko'i monia, daí mosanangbií ing gina monia mogaid, ta'e aka diaí yo monakit ing gina monia mogaid, bo tua in diaíbií mobogoi ing ka'untungan ko'i monimu.
18 Tantubií sambayangai ing kami. Moyakinbií ing kami kon notulidbií totok ing gina nami, sim pomuḷoi ing kami mogaid kon yagi-yagi, tantubií inta mobanar in aidan nami.
19 Po'igumonkudon totok, sambayangaipa in aku'oi baí ḷagidon diaan mangoi i Allah ko'i monimu.
20 Ki Allah nomiagdon bui ko'i Yesus Kristus Tuhan naton nongkon kinopatoian-Nya. Lantaranbií popatoi-Nya tatua, daí masai na'a Sia nobaliídon Gombala momulia ko'i naton inta domba-Nya mita. Kinopatoian-Nya tatua noposah bidon kon dodandian mononoi inta inaidan i Allah takin inaton.
21 Po'igum makow, ki Allah inta nobalií pangkoi ing kobiagan motompia, umuran mobogoi im bayongan inta mopia inta paraḷu pakeíon monimu mogaid kon onu inta ko'ibog i Allah. Bo po'igumon doman makow takin totuḷung i Yesus Kristus, popoaidon i Allah ko'i naton onu inta ko'ibog-Nya. Tantuíbií dayow ing ki Kristus dapot ing kopaḷutannya. Amin.
22 Po'igumonku ko'i monimu utat mita, simbaí indongoganpa monimu in tongginaku mita na'a takin gina mosanang, sin nopoḷokbií in suratku tana'a.
23 Musti kota'auanmu, kong ki Timotius ki utat naton pinobebasdon nongkon ponjara. Aka mo'iangoidon in sia ko'inakoí, daí diaankubií in sia aka mamangoidon aku'oi mokipodungkuḷ ko'i monimu.
24 Poyaputpa in salamku kom bayongan itoi monimu bo bayongan intau inta mopirisaya ko'i Allah. Bo tarima domandon in salam nongkon i utat mita naton kom butaí in Italia.
25 Igumonku makow, ki Tuhan umuran mobogoi im barakat ko'i monimu komintan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA