Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Komiu topomparasaya, jadi komiu kana bate-batena mosimpotove mpo tona nosampesuvu.

² Nee makaja raramiu mantarima torata makava ri banuamiu naupa torata haitu ledo nisanimiu, sabana nariamo sanu tona nantarima bo nantande torata ledo nisanira, tano mai toratara haitu *malaeka nu Alatala.

³ Toramo bo tulungimo tona nitarunggu evamo komiu mboto nitarunggu nosanggani-nggani ante ira. Bo toramo bo tulungimo tona nipakasusa sabana pomparasayara, evamo kasusamiu mboto.

⁴ Ponjamboko kana rabilamiu pura-pura. Nee mompakagero ponjambokomiu ante mompogau tona ledo bereimiu mboto, sabana Alatala mombahuku tona nompogau tona ledo bereina mboto.

⁵ Nee mompotove doi gaga sampe komiu aga natuvu mangelo doi. Tapi kana maosa raramiu ante anu naria nte komiu. Apa Alatala mboto nanguli ivei: "Ledo ntoto Kupalaisi iko."

⁶ Haitu sampe kita mabia manguli ivei: "Tupumo Topotulungi yaku, jadi ledo maeka yaku. Ledo ria nuapa-nuapa mamala rapovia ntona ka yaku."

⁷ Pekirikamo katuvu pakeni-pakeni anu nanggeni Tesa nu Alatala ka komiu bara ipia. Pariarantaimo jonjo katuvura bo kamatera, bo pasialamo pomparasayara.

⁸ Toramo! I Yesus Kristus ledo nabali-bali, lako ri nggauluname sampe sii-sii bo sampe ri kasae-saena.

⁹ Nee sampe komiu masalandala lako ri pepatuduki nakana ante mangoseaka mpengaya-ngaya pepatuduki anu nontani lako ri pomparasayata, evamo pepatuduki atura-atura pangande. Nadea tona bara ipia nangoseaka atura-atura pangande, tapi atura haitu ledo nanggeni belo ka topangoseakana. Aginapa kita mompakaroso rarata mompekirika kabelo rara nu Alatala, apa haitumo anu nanggeni belo ka kita.

¹⁰ Kita topomparasaya naria *lanta pesomba, haitumo *kayu salib i Kristus anu namate nombasompo dosata. Topanggeni pesomba ri Banua Petupu ntoYahudi nitagi mangande bau lako ri binata nisambale majadi posompo dosa. Ivesia muni tona da nangoseaka atura-atura pesomba agama Yahudi, ledo mamala manggava belo lako ri kamate i Kristus.

¹¹ Nangoseaka Atura-atura agama Yahudi, raa lako ri binata nisambale majadi pesomba posompo dosa, kana rakeni nu Pakeni nTopanggeni Pesomba riara Tombi Nelabi Kagasana. Bo karobata nu binata haitu kana rapalabu ri savaliku ngata.

¹² Ivesia muni najadi ante i Yesus. Ia nikeni ri savaliku bobaa ngata Yerusalem bo nipatesi. Ia namate ala raaNa majadi pesomba posompo dosa anu nompakalali dosa ntodeaNa.

¹³ Sabana haitu, kita kana mesuvu hau nte Ia ri savaliku ngata, nasadia rasalai nosanggani-nggani nte Ia. Batuana, kita kana mombakabasaka anu nioseakata nggaulu bo aga momparasaya i Yesus, nau bara isema manjalai kita.

¹⁴ Apa ri dunia hitu ledo ria ponturota naroo, tapi kita nanjarumaka ponturo nabelopa ri suruga ri tempo makava.

¹⁵ Jadi ante petulungi i Yesus, kita kana masaro manggeni pesombata ka Alatala. Kita kana mombatoiya Ia bo manguli tarima kasi ka Ia, apa haitumo nireke pesombata.

¹⁶ Bo nee rakalingasita mositulungi bo movia anu nabelo, sabana haitu muni nireke pesombata anu nompakadamba rara nu Alatala.

¹⁷ Oseakamo parenta-parenta nu pakeni-pakenimiu bo pekoumo nte ira, sabana iramo nombajagai pomparasayamiu. Makava tempona bara maipia ira kana manguli pakalanto ri ngayo nu Alatala berimbana komiu nikeniakara. Jadi pekoumo nte ira ala ira mamala mantui pokarajaa haitu ante damba nu rara. Ane komiu ledo mekou, aga masusa rarara bo haitu ledo manggeni belo ka komiu.

¹⁸ Sampesuvu-sampesuvu, posambayakamo kami. Nisani kami, rara ntai kami nagasa apa kami batena madota mokainggu nabelo riara mpengaya-ngaya.

¹⁹ Bo kuperapi ante mpuu-mpuu raraku ala komiu momposambayaka yaku, ala yaku masalisa rakeni nu Alatala manjili tou nte komiu.

²⁰ Alatala nompakatuvu mpanjili Tuputa Yesus lako ri kamateNa. Jadi Ia najadi Topoevu nakuasa anu nompoevu kita bimba-bimbaNa. RaaNa nipatiti nompakaasa pojanji nu Alatala ante kita, bo pojanji haitu rapake sampe ri kasae-saena. Kuperapi Alatala, puna katuvua nabelo, mompakagana ka komiu pura-pura anu nabelo niparaluumiu, ala rapakulemiu movia dotaNa. Kuperapi Ia manggeni komiu movia anu nipokonoNa ante petulungi i Yesus Kristus. Iamo masipato ratoiyata bo rabilata sampe ri kasae-saena. Amin!

²¹ (13:20)

²² Sampesuvu-sampesuvu, kuperapi nte komiu posabaramo mangepe tesa nitulisiku hitu, sabana suraku hitu ledo nandoe ntoto.

²³ Kana rasanimiu, sampesuvuta i Timotius nikabasakamo lako ri tarunggu. Ane masalisa ia tumai nte yaku, kukeni ia mosanggani-nggani nte yaku tou mosinggava nte komiu.

²⁴ Pakavote tabe kami ka pura-pura pakenimiu bo ka pura-pura todea nu Alatala ri situ. Bo tarimamo tabe lako nte sampesuvuta sampomparasaya ri propinsi Italia.

²⁵ Kuperapi Tupu mombadekei belo ka komiu pura-pura.

Ibrani

Video Ibrani 13

Ikuti Kami:

KONTAK | PARTISIPASI | DONASI