Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia to kita' tomatappa' la tatta'ki' sipakamoja'.

² Mabassa kamu' mpaleppangngi lan bolami to tote'dapa miissenni, sanga te'da miissenni tauraka ba'tu malaeka'raka joo tau. Denmo tau ntoratu malaeka', to nasangari tau biasa bang, apa malaeka' ia.

³ Ingaranni to tau lan pangtarungkuan ammipumasussai. Na ia to tau tangngia bang gauk to digaukanni, la miingaran too butung to kamu' dipasusi joo.

⁴ La mikasiri' sola ngasan to kasibalian, na ia to tosibali danggi' naangah tolaen nasolan mamma', sanga ia to tomanggauk sala la nasessai Puang Allataala.

⁵ Danggi' napukaunan kamu' doi', apa pumasannang bangmi to apa miampui, sanga mangkamo napau Puang Allataala kumua, "La kupuinawa tarruhko, te'da kulassalaiko."

⁶ Iamo joo tabarani mangkada kumua, "Puangmo to Pangtulungku', te'damo kumalaja'. Te'da apa wa'ding napugauk tolino lako kaleku'."

⁷ Ingaranni to pekaamberan jamaa to mangkamo mpangpeissenan kadan-Na Puang Allataala lako kamu'. Ingaran tooi matumba to sipa'na ratu lako matena, ammialai palelean mata to kamatapparanna.

⁸ Te'da namembali to Puang Isa Almaseh, la jolona, la ia tee too na te'da cappa'na.

⁹ Danggi' mieloranni to mangrupa-rupa pangngajaran to sisala Kareba Kasalamatan mpatuju sala kamu'. Iara to kameloan penawan-Na Puang Allataala to la mpamawatang penawanta', tangngiara kande. Ia joo atoran kande te'da lalomo bua'na lako tonturu'i.

¹⁰ Ia to imang mangjama lan tenda passompan panggaraga tolino, te'da nasipato' la ngkandei to apa dipassompan jao ngenan pangkarobanta' lan Tenda-Na Puang.

¹¹ Susimi tee battuananna. Ia to rara karoba, to dipassompan menjaji karoba mangdampangan, nabawa Imang Lompo tama Ngenan Kaminang Macero. Apa ia to juku'na ditunu pu'puh jio saleanan kampong.

¹² Susi todami joo namate saleanan babangan kota to Puang Isa na ia to rara-Na mbasei dosana tolino.

¹³ Iamo joo tamalemo lako Puang Isa jio saleanan kampong antadicapa'-capa' sola.

¹⁴ Sanga te'da kampong la tanii mari'pih lan tee lino, apa ntajanriki' kampong to la tanii mari'pih keanu'.

¹⁵ Iamo joo antatuli mpassompan karoba pangpujian lako Puang Allataala, iamo to kadanta' mpujii, sanga Puang Isa.

¹⁶ Danggi' mitangnningaranni mpugauk kameloan nasitulung, sanga iamo karoba napumasannang Puang Allataala.

¹⁷ Mengkaturu' kamu' lako pekaamberan jamaami, ammituru'i to parentana. Tuli napuinawa kamu', sanga la napebalian lako Puang Allataala to apa mangka napugauk lako kamu'. Ia ammimengkaturu' lako, masannangngi mangjama, ianna te'da, masussai mangjama, na te'da bua'na lako kamu'.

¹⁸ Pellao doangankan. Kikatappa'i kumua melo to lan penawangki', sanga tuli madoangkan mpugauk kameloan.

¹⁹ Kupeta'da tongan ammipellao doanganna' anna madoi' Puang Allataala nneloranna' male mati'.

²⁰ Napatuo pole'mi Puang Allataala to Puangta' Puang Isa jio mai kamatean. Na ia tee too menjajimi Tomangrewa Tomala'bihta' rrewaiki' kita' to bembala'-Na, sanga kamatean-Na. Ia toomo joo kamatean-Na mpaassah basse te'da cappa'na to napaden Puang Allataala lako kita'. Iamo joo kumeta'da lako Puang Allataala to mpangben kamasannangan,

²¹ dennaa upa' na Puang Allataalamora mpasadian kamu' sininna to melona, la mpugauk pakkaeloran-Na. Dennaa upa' anna Puang Allataala toomora mpupenjajiki' to napumasannang, sanga Puang Isa Almaseh. La mpakala'bih tarruhki' Almaseh te'da cappa'na. Amin.

²² Kupeta'dai misabbara' ntarimai tee pangpakainga'ku', sanga te'da namalando tee sura'ku'.

²³ La miissen kumua dila'paranmi to Timotius padanta' tomatappa' lan mai pangtarungkuan. Ianna madoi' ratu inde', la kusolan ke malena' mati' ssikitan kamu'.

²⁴ Massallangkan lako sininna pekaamberan jamaami na lako sininna umma'-Na Puang Allataala iti'. Tarima tooi to sallangna padanta' tomatappa' jio Italia.

²⁵ Dennaa upa' nabarakka'i kamu' Puang sola ngasan. Padamo jolo' too.

Ibrani

Video Ibrani 13

Ikuti Kami:

KONTAK | PARTISIPASI | DONASI